भजन 19

रचना हे भगवान कर महिमा

परधान बजामै बाले कर निता दाऊद के गाना

1आकास हे भगवान के महिमा के बखान करत हबै,

अउ आकास ओखर कारीगरी के परगट करत हबै।

2दिन लग दिन लगेतार बात चीत करथै,

अउ रात के रात ग्यान सिखाथै।

3न तो बोली हबै, अउ न भासा,

जिहां उनखर सब्द सुनाई नेहको देथै।

4फेर उनखर आरो सगलू भुंइ हे फइल जथै,

अउ भुंइ के सीमा तक उनखर आरो, भगवान आकास के बीच बेरा कर निता

अक्ठी अड्डा बनाय हबै।1

5जउन दुलहा कर जसना अपन महल लग निकडथै,

ऊ सूरबीर कर जसना अपन दउर दउरै हे खुस होथै।

6ऊ आकास कर अक छोर लग निकडथै,

अउ ऊ दूसर छोर तक चक्कर लगाथै,

अउ ओखर गरमी सबके पहुंचथै।

भगवान कर नियम

7यहोबा कर नियम खरा हबै,

ऊ परान के अच्छा कर देथै,

यहोबा कर नियम बिस्वासओग हबै,

मामूली मनसेन के ग्यानमान बनाय देथै।

8यहोबा कर सिक्छा सीधा हबै,

हिरदय के खुस कर देथै,

यहोबा के आदेस साफ हबै,

ऊ आंखन हे उजियार लइ आनथै।

9यहोबा के भय पवितर हबै,

ऊ सबरोज तक स्थिर रथै,

यहोबा के नियम सही अउ पूर मेर लग नेक हबै।

10ऊ तो सोन अउ बोहत खरा सोन लग बढके सुंदर हबै,

ऊ रस लग अउ टपकै बाले छत्ता लग बढके मीठ हबै।2

11ऊ मोके तोर हरवाह के ग्यान देथै,

ओखर आदेस मानै के फडुहा मोके मिलथै।

12अपन गलती के कोन समझ सकथै,

मोर गुप्त पाप लग तै मोके पवितर कर।

13तै अपन हरवाह के ढीठ कर पापन लग बचाय रख,

ऊ मोर उप्पर राज झइ कर पाबै,

तब मै सिध्द हुइ जइहों,

अउ बडा पाप लग बचे रइहों

14मोर मुंह कर बचन

अउ मोर हिरदय के धियान तोर लिघ्घो सुइकारयोग होय,

हे यहोबा भगवान मोर चट्टान मोर मुकति करइया।