भजन 147

सर्वसक्तिमान भगवान कर महिमा

1यहोबा कर स्तुति करा,

काखे अपन भगवान कर भजन गाना निक्खा हबै, काखे ऊ मन के निक्खा हबै,

ओखर स्तुति करा केतका सुखत अउ निक्खा हबै।

2यहोबा यरुसलेम के बसाथै,

ऊ निकडे हर इस्राएलियन के अकजिघा करथै।

3ऊ टूटे मन बालेन के निक्खा करथै,

अउ उनखर खत्ता हे मलहम-पट्टी बांधथै।

4ऊ तरइयन के गिनथै,

अउ उनखर मसे अक-अक्ठी नाम रखथै।

5हमर परभु महान अउ बडे सक्ति हबै,

ओखर दिमाक अपरम्पार हबै।

6यहोबा गरीब मनसेन के सम्भारथै,

अउ दुस्टन के भुंइ हे गिराय देथै।

7धन्यबाद करत हर यहोबा कर गाना गाबा,

बीना बजाउत हमर भगवान कर भजन गाबा।

8ऊ आकास के बादर लग छाय देथै,

अउ भुंइ के निता बादर के तइयारी करथै,

अउ डोंगरन हे चारा उगाथै।

9ऊ पसुन के अउ कउवा के छउना के जउन गोहराथै,

खाना देथै।

10नेहको तउन ऊ घोडवा के बल के चाहथै,

अउ नेहको डउका के गोडन लग खुस होथै।

11यहोबा अपन सेबकन लग खुस होथै,

मतलब उनखर लग जउन ओखर करुना माया आसरा लगाय रथै।

12हे यरुसलेम, यहोबा के बडाई कर हे सिय्योन,

अपन भगवान के स्तुति कर।

13काखे ऊ तोर फेरकन के खम्भन के मजबूत करे हबै,

अउ तोर टोरवन के आसिरबाद दय हबै।

14ऊ तोर सीमा हे सुरक्छा सान्ति देथै,

अउ तोके निक्खा-निक्खा गोहूं लग संतुस्ट करथै।

15ऊ भुंइ हे अपन आदेस फइलाथै,

ओखर बचन बोहत तेज लग दाउरथै।

16ऊ ऊन चीज बरफ गिराथै,

अउ जाड के राख के चीज पाला बिथरथै।

17ऊ बरफ के खंडा गिरथै,

ओखर कर हर ठंड के कउनो सह सकथै?

18ऊ आदेस दइके उनके पिघलाथै ऊ हवा बहाथै,

तब पानी बहै लागथै।

19ऊ याकूब के अपन बचन, अउ इस्राएल के अपन तरीका

अउ नियम बताथै।

20कउनो अउ राज लग असना बरताव नेहको करिस,

अउ ओखर नियमन के दूसर नेहको जानै,

यहोबा कर स्तुति करा।