भजन 146

मुकति करइया भगवान कर स्तुति

1यहोबा कर स्तुति करा हे मोर मन,

यहोबा कर महिमा कर।

2मै जीवन भर यहोबा कर स्तुति करत रइहों, जब तक मै बने रइहों तब तक मै,

अपन भगवान कर भजन गाउत रइहों।

3तुम परधानन हे यकीन झइ रखबे, न कउनो मनसे हे,

काखे ओहमा मुकति करै के भी सक्ति नेहको।

4ओखर परान निकडही, उहो माटी हे मिल जही,

उहै रोज ओखर सगलू सोच नास हुइ जही।

5का धन्य ऊ हबै, जेखर सहायक याकूब कर भगवान हबै,

अउ जेखर यकीन अपन भगवान यहोबा हे हबै।

6ऊ आकास अउ भुंइ अउ समुंदर

अउ उनखर हे जउन कुछु हबै, सगलू दाता हबै,

अउ ऊ अपन बचन हरमेसा के निता पूरा करत रही।

7ऊ पिसे हरन कर नियाव चुकाथै,

अउ भूखन के रोटी देथै।

यहोबा कैदिन के छंडाथै।

8यहोबा अन्धरन के आंखी देथै

यहोबा निहुरे हरन के सीधा ठाड करथै

यहोबा नेकी काम करै बाले मनसेन लग माया रखथै।

9यहोबा परदेसिन के रक्छा करथै

अउ अनाथन अउ बिधवा के सम्भालथै,

पय दुस्टन के गली के टेढका मेढका करथै।

10हे सिय्योन, यहोबा हरमेसा कर निता,

तोर भगवान, पीढी-पीढी राज करत रही,

यहोबा कर स्तुति करा।