भजन 138

भगवान कर किरपा के निता धन्यबाद कर बिनती

दाऊद कर गाना

1मै पूर मन लग तोर धन्यबाद करिहों,

देउतन के आगू मै तोर गाना गइहों।

2मै तोर पवितर मंदिर के पल्ला परनाम करिहों,

अउ तोर करुना अउ सच्चाई के कारन

तोर नाम कर धन्यबाद करिहों,

काखे तै अपन बचन के अपन बडा नाम लग जादा दरजा दय हबस।

3जउन रोज मै गोहराय, उहै रोज तै मोर सुन लइस,

अउ मोके बल दइके हियाव बंधाइस।

4हे यहोबा, भुंइ के सगलू राजा तोर धन्यबाद करही,

काखे उनही तोर बचन सुने हबै।

5अउ ऊ यहोबा कर तेज के बिसय हे गइहिन,

काखे यहोबा कर महिमा बडा हबै।

6अगर यहोबा बडा हबै,

तउभरमा ऊ नमर मनसे के पल्ला देखथै,

पय घमंड के दुरिहां लग चीन जथै।

7चाहे मै संकट कर बीच हे रहों,

तउभरमा तै मोके जिन्दा करिहे,

तै मोर गुस्सा बैरिन के बिरुध्द हाथ बढाइहे,

अउ अपन दहिना हाथ लग मोर मुकति करही।

8यहोबा मोर निता सगलू कुछु पूर करही, हे यहोबा,

तोर करुना हरमेसा कर हबै,

तै अपन हाथन के कामन के छांड झइ दे।