भजन 139

भगवान के पूर ग्यान अउ परवाह

परधान बजामैबाले कर निता दाऊद कर गाना

1हे यहोबा, तै मोके जांचके जान लय हबस।

2तै मोर उठय बइठय के जानथस

अउ मोर बिचारन के दुरिहां लग समझ लेथस।

3मोर चलै अउ सोय के तै निक्खा पूछतांछ करथस,

अउ मोर पूर आदत के भेद जानथस।

4हे यहोबा, मोर मुंह हे असना कउनो बात नेहको,

जेही तै पूर मेर लग न जानत होस।

5तै मोके आगू पाछु घेर रखे हबस,

अउ अपन हाथ मोर उप्पर रखे रथस।

6हइ ग्यान मोर निता बोहत कठिन हबै,

हइ गहिरा अउ मोर समझ लग बाहिर हबै।

7मै तोर आतमा लग भागके कछो जांव?

या तोर आगू लग कछो भगों?

8अगर मै आकास हे चढियों, ता तै उहां हबस,

अगर मै अपन डेसना अधोलोक हे बिछांव ता उहों तै हबस।

9अगर मै भिनसारे के किरन हे चढके

समुन्दर के पार जाय बसिहों।

10ता उहां तै अपन हाथ लग मोर अगुवाई करिहे,

अउ अपन दहिना हाथ लग मोके पकडे रइहे।

11अगर मै कइहों कि अंधियार हे लुक जांव

अउ मोर चारो पल्ला के उजेड रात के अंधियार हुइ जही।

12तउभरमा अंधियार तोर लग नेहको लुकाही,

रात तो दिन कर बरोबर उजियार देही,

काखे तोर निता अंधियार अउ उजियार दुनो अक जसना हबै।

13मोर मन कर मालिक तो तै हबस,

तै मोके दाय कर लादा हे बनाय।

14मै तोर धन्यबाद करिहों, इहैनिता कि मै भयंकर अउ अदभुत मेर लग बनाय गय हव,

तोर काम चकित कर हबै,

अउ मै इके निक्खा जानथो।

15जब मै गुप्त हे बनाय जथो,

अउ भुंइ कर तरी जिघन हे बनाय जथो,

तब मोर हाडा

तोर उप्पर लग लुके झइ रहै।

16तोर आंखी मोर भद्दा तत्व के देखिस,

अउ मोर सगलू अंग जउन दिन-दिन बनत जथै,

ऊ बनाय जाय लग पहिले

तोर किताब हे लिखे हर रथै।

17मोर निता हे भगवान, तोर बिचार का खास हबै,

उनखर गिनती के जोड कइसन बडा हबै।

18अगर मै उनही गिनथै, ता ऊ कुदरा के ककरा लग जादा ठहरी,

जब मै जाग उठथों, तब तोर संग रथो।

19हे भगवान, जरूर तै दुस्ट के खून करिहे,

हे खुनहा, मोर लग दुरिहां हुइ जा।

20काखे ऊ तोर चरचा चतुराई लग करथै,

तोर बैरी तोर नाम झूठ बात हे लेथै।

21हे यहोबा, का मै तोर बैरिन लग घ्रना नेहको रखो,

अउ तोर बिरोधिन लग गुस्सा नेहको होयों?

22हां, मै उनखर लग पूर घ्रना रखथो,

मै उनही अपन बैरी समझथों।

23हे भगवान मोके जांचके जान ले,

मोके परख कर मोर चिन्ता के जान ले।

24अउ देख कि मोके कउनो बुरी आदत हबै,

कि नेहको, अउ सब रोज के रास्ता हे लइ जा।