भजन 112

भगवान कर भक्त के खुसी

1भगवान कर हरवाह खुसी लग हइ कहिके महिमा कर

का धन्य हबै ऊ डउका जउन यहोबा के भय मानथै

अउ ओखर आदेसन लग बोहत खुस रथै,

2ओखर लरका भुंइ हे सक्तिसाली होही,

सीधा मनसे कर लरका आसीस पइहिन।

3ओखर घर हे धन डेरा रथै

अउ ओखर धरम हरमेसा बने रही।

4सीधा मनसेन कर निता अंधियार कर बीच हे उजियार निकडथै,

ऊ अनुगरहकारी, दयावंत अउ धरमी होथै।

5जउन डउका अनुगरह करथै अउ उधार देथै,

ओखर भलाई होथै, ऊ नियाव हे अपन मुकदमा के जीतही।

6ऊ तो हरमेसा तक अडे रही,

धरमी के सुरता हरमेसा तक बने रही।

7ऊ बेकार संदेस लग नेहको डरथै,

ओखर हिरदय यहोबा हे यकीन धरै लग स्थिर रथै।

8ओखर हिरदय संभारे हर हबै,

इहैनिता ऊ न डरही, पय अपन बैरिन हे आंख लग देखके संतुस्ट होही।

9ऊ किरपा लग गरीबन के दान देथै,

ओखर धरम हरमेसा बने रही,

अउ ओखर सींग महिमा कर संग ऊंच करे जही।

10दुस्ट इके देखके गुस्सा करही,

ऊ दांत पीस-पीसके गल जइहिन,

दुस्टन के लालसा पूर नेहको होही।