भजन 111

परभु कर स्तुति

1भगवान कर स्तुति यहोबा कर स्तुति करा,

मै सीधा मनसेन कर समूह हे अउ

मंडली हे पूर मन लग यहोबा कर धन्यबाद करिहों।

2यहोबा कर काम बडा हबै, जेतका ओखर लग खुस रथै,

ऊ उनखर उप्पर धियान लगाथै।

3ओखर काम बढिया अउ एस्वरमय होथै अउ ओखर धरम हरमेसा तक बने रही।

4ऊ अपन चकित कर काम के सुरता कराय हबै,

यहोबा अनुगरहकारी अउ दया करे बाले हबै।

5ऊ अपन खोजै बालेन के खाना दय हबै,

ऊ अपन टीमा के हरमेसा तक सुरता रखही।

6ऊ अपन परजा के देस-देस के भाग दे कर निता,

अपन कामन के प्रताप देखाय हबै।

7सच्चाई अउ नियाव ओखर हाथन के काम हबै,

ओखर सगलू ग्यान बिस्वासओग हबै,

8ऊ हरमेसा अडिग रही,

ऊ सच्चाई अउ सिधाई लग करे हर हबै।

9ऊ अपन मनसे के मुकति करे हबै,

ऊ अपन टीमा के हरमेसा कर निता ठहराय हबै,

ओखर नाम पवितर अउ भययोग हबै।

10दिमाक कर मूल यहोबा कर भय हबै,

जेतका ओखर आदेस के मानथै, उनखर दिमाक निक्खा होथै,

ओखर स्तुति हरमेसा बने रही।