पचमां भाग
(भजन 107—150)
परभु समस्या लग अजाद करथै
यहोबा कर धन्यबाद करा, काखे ऊ भला हबै,
अउ ओखर करुना हरमेसा के हबै।
यहोबा के छंडाय हर असना कहै,
ऊ तुमके उनखर बैरिन के हाथ लग
बचाय लइस
अउ उनखर देस-देस लग पूरब-पस्चिम अउ उत्तर-दक्छिन1 लग
अकजिघा करे हबै।
उन पतेरा हे मरुभुंइ के गली हे भटकत फिरथै,
अउ कउनो बसे हर सहर नेहको पाइन।
भूख अउ पियास के कारन उनखर
परान मुरझाय मेर हुइ गय रथै।
तब उन अपन मुसीबत हे परभु के दुहाई दइस,
अउ परभु समस्या लग उनके छंडाइस।
अउ उनही सीधे गली हे चलाइस,
ताकि उन बसै के निता कउनो सहर जा पहुंचिस।
मनसे यहोबा कर करुना के कारन, अउ उन चकितकाम के कारन,
जउन ऊ मनसेन निता करथै, ओखर धन्यबाद करबे।
काखे यहोबा पियासे जीव के सन्तुस्ट करथै,
अउ भुखाय हर मनसे के निक्खा चीज लग सन्तुस्ट करथै।
कुछ अंधियार अउ मिरतू कर छाय हे बइठे हर जेलियर,
अउ दुख हे पडे अउ सांकड लग जकडे हर रथै।
इहैनिता कि उन भगवान कर बचन के बिरुद्ध चलै,
अउ परमपरधान कर सहमत के बेकार जानिन।
तब ऊ उनके कस्ट दवारा दबाइस, उन ठोकड खाय के गिर पडिन,
अउ उनके कउनो सहारा नेहको मिलिस।
तब उन संकट हे यहोबा के पुकारिस,
अउ ऊ संकट लग उनही बचाइस।
ऊ उनही अंधियार अउ मिरतू कर छाय मसे निकाड लइस,
अउ उनखर बन्धन के टोर डारिस।
मनसे यहोबा कर करुना के कारन,
अउ उन चकितकाम के कारन जउन ऊ मनसेन निता करथै, उनखर धन्यबाद करै।
काखे ऊ पीतर कर फेरका के टोरिस,
अउ लोहा के बेडिन के खन्डा-खन्डा करिस।
कुछ अपन अपराध स्वभाव के कारन नंगाइन,
अउ कुकरम के कारन पीरा हे रथै।
उनही खाना लग कउनो मेर के मतलब नेहको रथै,
अउ उन मिरतू दूरा तक पहुंच चुके रथै।
तब उन मुसीबत यहोबा के घोसना देथै,
अउ ऊ संकट लग उनके बचाथै, ऊ मोर बचन दवारा निक्खा करथै।
मनसे यहोबा करुना के कारन,
अउ उन चकितकाम के कारन जउन ऊ मनसेन के निता करथै, उके का धन्यवाद करबे।
परभु के करुना कर निता, मनसेन के निता करे गइस,
ओखर चकित के कामन के निता ऊ ओखर बडाई करी।
अउ ऊ धन्यबाद कर बलि चढइ, अउ जयजयकार करत हर,
ओखर कामन के बखान करी।
जउन मनसे जिहाज हे समुन्दर हे चलथै,
अउ महासागर हे हुइके धंधा करथै।
उन यहोबा के कामन के,
अउ उन चकित कामन के जउन ऊ घहिड समुन्दर हे करथै, देखथै।
काखे ऊ आदेस देथै, तब बडेरा आ गइस,
जउन लहर के उठाय दइस।
लहरा बादर तक ऊंच उठ जथै,
अउ फेर सागर के गहिड हे तरी आ जथै,
दुख के कारन उनखर परान पइरै लगथै।
उन ढनगत रहिन, दरुहा कर जसना लडखडाउत हबै,
अउ उनखर दिमाक नास हुइ चुकथै।
तब उन संकट हे यहोबा लग बिनती करिन,
अउ ऊ संकट लग उनही बचाइस।
यहोबा बडेरा के सांत करिस,
अउ सागर के लहरा स्थिर हुइ गइस।
तब उन खुस हुइन, काखे उनही सांति मिलिस,
ऊ उनही बन्दरगाह तक पहुंचाय दइस, जिहां उन जाय के चाहथै।
मनसे यहोबा के करुना के कारन,
अउ उन चकित काम के कारन जउन ऊ मनसेन के निता करथै, ओखर धन्यबाद करै।
उन मनसेन के मंडली हे ओखर बोहत बडाई करै,
सियानन के दरबार हे ओखर महिमा करै।
ऊ नदिया के पतेरा बना देथै,
अउ पानी के झरना के सुखाय हर भुंइ कर देथै।
उहां के निवासिन के बेकार बेउहार के कारन,
फडुहा बाले भुंइ के बंजर माटी हे बदल देथै। ऊ पतेरा के पानी के तलवा, अउ निरजल भुंइ के पानी के झरना हे बदल देथै।
तब ऊ उहां भुखाय हरन के बसाथै,
कि उन बसै के निता सहर तइयार करै।
अउ खेती बाडी करै, अउ अंगूर कर बगिया लगामै,
अउ आने-आने मेर के फडुहा उपजामै।
यहोबा उनही आसीस देथै, कि उन बढत जाय,
ऊ उनखर पसुन के घटै नेहको देथै।
फेर अंधियार, अउ समस्या अउ दुख के कारन,
ऊ घटत अउ दब जथै।
अउ ऊ सासक के बेज्जती लग
लादके गली रेगिस्तान पतेरा हे भटकत हबै।
ऊ कमजोर के दुख लग छंडाय के ऊंच हे रखथै,
अउ उनही गेडरन के झुंड मेर परवार देथै।
सीधे मनसे देखके खुस होथै,
अउ सब दुस्ट मनसे अपन मुंह बंद करथै।
जउन कउ हुसियार होय, ऊ हइ बातन हे सुरता करिहे,
अउ यहोबा कर करुना के कामन हे सुरता करी।
Source notes (1)
- Footnote मूल हे समुन्दर लग
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.