होसे 9

होसे इस्राएल के निता सजा के घोसना करिस

1हे इस्राएल, तय राज-राज के मनसेन के जसना खुसी हे मगन झइ हो, काखे तै अपन भगवान के छांड के बेसिया बने, तै बोहत दाना के हर अक्ठी खनेड हे बेसिया के कमाई खुसी लग लय हबस। 2ऊ न तो खनेड के दाना लग टुल्य हुइहिन, अउ न अंगूर कर रस कुन्ड लग अउ नबा अंगूर कर रस घटे लग धोखा खइहिन। 3उन यहोबा के देस हे नेहको रह पइहिन, पय एप्रैम मिस्र देस छो लउट जइहिन, अउ उन अस्सूर हे असुध्द चीज खइहिन। 4उन परभु के निता अंगूर कर रस के बली नेहको दइहिन, अउ न उनखर बलि उके भाही, उनखर रोटी सोक करै बाले के जसना खाना होही, जेतका उके खइहिन सगलू असुध्द हुइ जइहिन, काखे उनखर खाना उनखर भूख बुझामै कर निता होही, ऊ भगवान के घर हे नेहको आय सकहिन। 5निस्चित टेम के तेउहार अउ भगवान के तेउहार के रोज तुम काहिन करिहा? 6देखा, ऊ नास होमै के डर के मारे गइन, पय ऊ मर जइहीं अउ मिस्र के रहैबाले उनखर लोथ अकजुट करही, अउ मोप सहर के रहैबाले उनही माटी दइहिन। उनखर कीमती चांदी के चीज जंगली झाडी के बीच हे पडही, अउ उनखर तम्बू हे कांटा बाले झाडी उगही। 7सजा के दिन आय हबै, पलटा लेय के दिन आय हबै, अउ इस्राएल हइ जान लेही। उनखर बोहत लग बेकार काम अउ बडे घिरना के कारन आगू कर बात करै बाले तउन मूरुख, अउ जउन मनसे के उप्पर आतमा उतरथै, ऊ पगला ठहरही।1 8एप्रैम मोर भगवान के पल्ला चउकी-दार हबै, आगू कर बात गुठे बाले सगलू गली हे सिकारी कर फान्दा हबै, अउ ऊ अपन भगवान के घर हे बैरी होय हबै। 9उन गिबा सहर कर रोज बोहत बिगडे हबै, इहैनिता ऊ उनखर अधरम के सुधि लइके उनखर पाप के सजा देही।

इस्राएल के पाप अउ ओखर परिनाम

10मै इस्राएल के असना पायों,2 जसना कउनो पतेरा हे अंगूर पायों, अउ तुम्हर पुरखन हे असना नजर के जसना अंजीर के पहिले फडुहन हे नजर डाले हव, पय उन पोर डोंगर के बाल देउता के लिघ्घो जायके अपन के लाज के कारन होय के निता सउप दइस, अउ जेखर उप्पर मोहित हुइ गय रथै, ऊ उहै के जसना बेकार हुइ गइन। 11एप्रैम सहर के सान चिरइया के जसना उड जही, न कउनो के जनम होही, न कउनो डउकी के लरका होही, अउ न कउनो डउकी लादा हे होही। 12चाहे ऊ अपन लरका-बच्चन के पालन-पोसन करके बडो करी, तउमा मै उनही इहां तक बिगर लरका के करिहों कि कउनो नेहको बचही, जब मै उनखर लग दुरिहां हुइ जइहों, तब उनखर हे लानत हबै। 13जसना मै सोर के देखो, ओसनेन एप्रैम सहर के मन परसंद जिघा हे बसे हर देखो, तउमा उके अपन लरकन के हतिया कराइया के आगू लइ जाय के पडही। 14हे भगवान, उनही सजा दे, तै काहिन दइहे? हइ कि उनखर डउकिन के गरभ गिर जाय, अउ छाती सुखाय हर रहै।3

इस्राएल हे परभु कर नियाव

15उनखर सगलू बुराई गिलगाल सहर हे हबै, उहै मै उनखर लग घिरना करेव, उनखर बेकार कामन के कारन मै उनही अपन घर लग निकार दइहों, उनखर लग फेरै माया नेहको रखिहों, काखे उनखर सगलू सासक बिद्रोह करै बाले हबै। 16एप्रैम कर मनसे ऊ पउधा के जसना हबै, जिनखर जड झुराय गइस, ओहमा फडुहा नेहको लगही, उनखर डउकिन के चाहे लरका पइदा करै, तउमा मै उनखर पिरिया लरकन के मार दइहों।

अक्किल बाले इस्राएल के बारे हे बोलथै

17मोर भगवान कर मै सेबा करथो, ऊ अपन मनसेन के छांड देही, काखे उन ओखर बात नेहको सुनिन। उन राज-राज हे भटकत रइहिन।