होसे 8

यहोबा मूरती-पूजा के निता इस्राएल के बुराई करिस

1अपन मुंह हे तुरही लगा, ओखर बैरी बाज चिरइया के जसना भगवान के घर हे झपटही, काखे मोर घर के मनसे मोर टीमा के टोरिन, अउ मोर नियम के टोरे हबै। 2उन मोर लग बोहत आरो लग कइहिन, “हे हमर भगवान, हम इस्राएली मनसे तोके जानथन।” 3पय इस्राएल के भलाई के मन लग निकाड दय हबै, इहैनिता बैरी ओखर पाछू पडही। 4उन राजन के ठहरा-उत रहिन, पय मोर इक्छा लग नेहको, उन सासक के ठहरात रहिन, पय मोर अनजान हे उन अपन सोन-चांदी लइके मूरती बनाय लइन, जेखर लग नास हुइ जाय।1 5हे सोमरोन, ऊ तोर सोना कर रकरा लग घिरना करथों, मोर गुस्सा उनखर हे भडके हबै, उन बेकसूर होय लग कब तक देरी करहिन? 6हइ इस्राएल लग होय हबै, अक्ठी मिस-तिरी उके बनाइस, ऊ मूरती भगवान नेहको हबै, हइ कारन सोमरोन कर ऊ रकरा खन्डा-खन्डा हुइ जही। 7जब उन हवा बोथै, ता उन बडेरा काटथै, दाना कर अक्ठी खेतवा जउन नेहको पकथै, ऊ कबहुन रोटी पइदा नेहको करथै, पय अगर पको जइ, ता परदेसी उके खाय जइहिन। 8इस्राएल झटक लइस, अब उन आने राज मसे असना ढिलवा ठहरी जसना बेकार भडवा हबै। 9काखे उन अस्सूर के असना कढ गइन, जसना पतेरा के गदहा झुंड लग बिछड के रथै, एप्रैम मनसे परेमी के मजदूरी हे रखे हबै। 10इहैनिता उन आने राज मसे मजदूर बनाय के रखै, तउमा मै उनही अकजिघा करिहों, उन सासक अउ राजा के बोझ के कारन घटै लगहिन। 11एप्रैम मनसे पाप बलि करै के बोहत लग बेदी2 बनाय हबै, उनै बेदी उनखर पापी ठहरै के कारन हबै। 12मै तो उनखर निता अपन नियम के कइनठे बात लिखत आय हव, पय ऊ उनके पराय समझथै। 13उन मोर निता बलि तो करथै, अउ पसु बलि करथै, पय ओखर फडुहा मांस हबै, उन खुदय उके खथै, पय भगवान उनखर लग मगन नेहको होथै, अब ऊ उनखर अधरम के सुधि लइके उनखर पाप के सजा देही, ऊ मिस्र देस हे लउट जइहीं। 14काखे इस्राएल अपन बनामै बाले के बिसर के3 महल बनाइन, अउ यहूदा के मनसे बोहत लग गढैबाले सहर के बसाय हबै, पय मै सहरन हे आगी लग-इहों, अउ ओखर लग उनखर गढ नास हुइ जइ-हिन।