होसे 7

1जब मै इस्राएल के निक्खा करथों, तब एप्रैम के पाप अउ सोमरोन के बुराई परगट हुइ जथै, उन छल लग काम करथै, चोरटा घर हे चोरी करै के जुगाड बनाथै, अउ चोरटन के दल घर के बाहिर लूटथै, 2तउमा उन नेहको सोंचथै कि यहोबा हमर सगलू बुराई के सुरता रखथै। इहैनिता अब उन अपन कामन के जाला हे फंसहीं, काखे उनखर काम मोर नजर हे बने हबै।1

राज-महल हे बिद्रोह कर योजना

3उन राजा के बुराई करै लग, अउ सासन के झूठ बोलै लग खुस करथै, 4उन सगलू के सगलू बेभिचारी हबै, उनखर नफरत भट्ठी हे लगे आगी के मेर सिलगथै, जेही तब तक चुरामैबाले नेहको डोलाथै जब तक पिसान चुरै के निता तइयाड नेहको हुइ जाय। 5हमर राजा के जनम दिन हे हाकिम अंगूर कर रस पीके नसा हे भुत्त हुइ गइन, ऊ मजाक करै बालेन लग अपन हाथ मिलाइस। 6जब तक ऊ घात करै निता ताक हे लगे रथै, तब तक ऊ अपन मन तन्दूर भट्टी के जसना तइयार करे रथै, उनखर पकामै बाले रात भर सोउत रथै, ऊ सकरहा के तन्दूर भट्टी के धंधकत आगी के जसना लाल हुइ जथै। 7उन सगलू के सगलू तन्दूर भट्टी के जसना बरत आगी, अउ अपन सासक के नास करथै, उनखर सगलू राजा मारे गय हबै, अउ उनखर मसे कउनो मोर दुहाई नेहको देथै।

इस्राएल अउ दूसर देस

8एप्रैम राज-राज के मनसेन लग मिले जुले रथै, ऊ न घर कर रहिस अउ न घाट कर।2 9परदेसियन ओखर बल के टोर डारिस, पय ऊ इके नेहको जानथै, ओखर मूड हे कहुं-कहुं चरका चूंदी हबै, पय ऊ इके नेहको जानथै। 10इस्राएल कर घमंड उहै के बिरुध्द गवाही देथै, हइ सगलू बातन के रहत भरमा, ऊ अपन भगवान यहोबा के पल्ला नेहको फिरिन अउ न उके खोजिन। 11एप्रैम अक्ठी नसमझ पनबुडिया कर जसना हुइ गय हबै, जेखर कुछु ग्यान नेहको हबै, उन मिस्रिन के दुहाई देथै अउ अस्सूर छो कढ जथै। 12जब उन जाय, तब उनखर उप्पर मै अपन जाला फइलाहुं, मै उनही असना तान लेहुं जसना बादर कर चिरइया खींचे जथै, जब मै सुनहुं कि अक संग झुंड हे अकजुट होथै, ता मै उनही सजा देहुं। 13उनखर हे हाय, काखे ऊ मोर लिघ्घो लग भटक गय हबै, उनखर सत्यानास होय, काखे उन मोर लग धोखा करे हबै, मै उनही छंडाउत रहों, पय उन मोर लग झूठ बोलत आय हबै। 14उन मन लग मोर बिनती नेहको करथै, पय अपन डसना हे पडे हर हाय-हाय करथै, उन दाना अउ नबा अंगूर के रस पामै के निता भीड लगाथै, अउ मोर लग झगडा करथै। 15अगर मै उनखर बांह के बांधेव, अउ उनखर बांह के बलवान करत आय हव, तउमा उन मोर बिरुध्द बेकार सोच रखथै। 16उन मुडत तो हबै, पय भगवान के पल्ला नेहको, ऊ नरै बाले धनही के जसना हबै, इहैनिता उनखर हे सासन अपन गुस्सा भरे हर बातन के कारन तलबार लग मारे जइहिन, मिस्र देस हे उनखर मजाक उडाय जाय के इहै कारन होही।