होसे 5

1हे याजको, हइ बात सुना, हे इस्राएल के सगलू घराना, धियान दइके सुना, हे राजा के घराना, तुम कान लगाबा, काखे तुम्हर नियाव करे जही, काखे तुम मिसपा सहर हे फान्दा अउ ताबोर डोंगर हे लगाय हर जाला बन गय हबा। 2उन बिगडे हर घोर हत्या करे हबै, इहैनिता मै उन सगलू झन के सजा देहुं। 3मै एप्रैम के भेद जानथो, अउ इस्राएल के दसा मोर लग लुके नेहको हबै, हे एप्रैम, तै ओखर बेभिचार करे, अउ इस्राएल असुध्द होय हबै।

मूरती पूजा के बिरोध होसे के चेतन्त

4उनखर काम उनही अपन भगवान के पल्ला फिरै नेहको देथन, काखे बेभिचार करै बाले आतमा उनखर हे रथै, अउ उन भगवान के नेहको जानथै। 5इस्राएल के घमंड उहै के बिरुध्द गवाही देथै, अउ इस्राएल अउ एप्रैम के अपन पाप कारन ठोकर खाही, अउ यहूदा उनखर संग ठोकड खाही। 6उन अपन गेडरा-छेडिन अउ दूसर जीव जन्तु लइके यहोबा के निता बलि चढामै खोजै जथै, पय ऊ उनके नेहको मिलही, काखे ऊ उनखर लग दुरिहां हुइ गय हबै। 7ऊ बेभिचार के लरका पइदा होय हबै, एखर बाद उन यहोबा कर परति अबिस्वास-घात करे हबै, हइ कारन अब नबा जोनइहा अउ उनखर हिस्सन के नास के कारन होही।

इस्राएल अउ यहूदा के बीच युध्द

8गिबा हे तुरही अउ रामा हे तुरही फूंकै, बेतावेन1 हे ललकार के कथै, हे बिन्यामीन, अपन पाछू देख। 9नियाव के रोज हे एप्रैम सूनसान हुइ जही, जउन बात होय के निस्चित हबै, मै उहै के संदेस इस्राएल के सगलू कुर के दय हबै। 10यहूदा कर हाकिम2 उनखर मेर हबै, जउन भुंइ के सीमन के टोरै बाले बन गय हबै, मै उनखर उप्पर अपन गुस्सा लग पानी के जसना उडेलहुं। 11एप्रैम हे अतिया-चार करे गय हबै, ऊ मुकदमा हार गय हबै, काखे ऊ मूरती पूजा के रास्ता हे मन लगायके ऊ आदेस हे चलिस। 12इहैनिता मै एप्रैम के निता किरवा के जसना अउ यहूदा के घराने के निता पाप के जसना हुइहों। 13जब एप्रैम अपन नांगा, अउ यहूदा अपन खत्ता देखिस, तब एप्रैम अस्सूर के लिघ्घो गइस, अउ यारेब3 राजा के हइ कहिके पठोथै। पय ऊ न तुमके निक्खा कर सकथै, अउ न तुम्हार खत्ता निक्खा कर सकथै। 14काखे मै एप्रैम कर निता बघवा अउ यहूदा के घराने के निता जबान बघवा बनाहुं। मै खुदय उनही फाड के लइ जहुं, जब मै उठाय लइ जइहों, तब मोर पंजा लग कउ नेहको छंडाय सकथै। 15जब तक ऊ खुद के दोसी मानके मोर दरसन कर खोजी नेहको होही, तब तक मै अपन जिघा हे नेहको लउटहुं, अउ जब उन संकट हे पडहिन, तब ऊ मोके खोजै लगहीं।4