होसे 4

भगवान के इस्राएल हे आरोप

1हे इस्राएलियन, हइ देस के रहैबा-लेन के संग मुकदमा हबै, हइ देस हे न कुछु सच्‍चाई हबै, न कुछु करुना अउ न कुछ भगवान कर ग्यान हबै,1 2इहां सराप देय, झूठ बोलै, हतिया करैके, चुरामै के, अउ गलत काम करै के छांड कुछु नेहको होथै, उन नियम के टोर के गलत काम करथै अउ खूनै-खून होउत रथै। 3हइ कारन हइ देस रोही, अउ पटउरा के जीव-जन्तुन, अउ आकास कर चिरइया सगलू मुरझाय जइहीं, अउ समुन्दर कर मछडी नास हुइ जइहीं।

भगवान के पुजारिन हे आरोप

4देखा, कउनो बात-बिबाद झइ करै, अउ न गधार, काखे तोर मनसे तउन पुजारी लग बात-बिबाद करै बालेन के जसना हबै, 5तै दिन दुपहरी ठोकड खाही, अउ रात के आगू कर बात गुठेमै बाले तोर संग ठोकड खाही, अउ मै तोर दाय इस्राएल के नास करिहों, 6मोर ग्यान के नेहको होय लग मोर परजा नास हुइ गइस, तै मोर ग्यान के बेकार जाने हबै, इहैनिता मै तोके अपन पुजारी रहै के अयोग्य घोसित करिहों, इहैनिता कि तै अपन भगवान के नियम के छांड दय हबस, मै तोर लरका-बच्चा के छांड देहुं। 7जसना उन बोहत बढत गइन, ओसनेन उन मोर बिरुध्द पाप करत गइन, मै उनखर इज्जत के बदला उनखर बेज्जती करिहों, 8तुम मोर मनसेन के पापन लग धन्नड बनथा, अउ तुम चाहत हबा कि अउ बोहत पाप करी। 9इहैनिता जउन मनसेन के दसा होही, उहै याजक के होही, मै उनखर बेकार कामन के सजा देहुं, अउ उनखर कामन के जसना उनके बदला देहुं, 10तुम बलि के अपन बांटा खइहीं, तउमा भुखाय रइहीं , तुम दूसर देउतन के पूजा करिहा, तउमा तुम्हर लरका नेहको होही, काखे तुम मोर लग दुरिहां हुइके आने देउतन के पाछू चलथा, काखे तुम यहोबा कर पल्ला मन लगामै के निता छांड दय हबा।

भगवान दवारा मूरती पूजा के दोस

11भगवान हइ कथै, बेसिया-गमन अउ पुरान अंगूर कर रस अउ नबा अंगूर कर रस, हइ तीनो दिमाक2 खराब करथै।3 12मोर परजा के मनसे लकडी के पुतला लग सबाल करथै, अउ उनखर लकडी उनके भभिस्य गुठेथै, काखे गलत काम करामै बाले आतमा उनही दे, अउ अपन भगवान के वस हे होय के छांड के बिस्वास-घात करथै, अउ उन खुद के आने देउता के हाथ हे सउप दय हबै। 13बांझ, चिनार अउ नान बांझ रूख के छाया निक्खा होथै, इहैनिता ऊ उनखर तरी अउ डोंगरन कर चोटिन हे तपसिया करथै, अउ डोंगर के इटिल्ली हे धूप जलाथै, हइ कारन तुम्हर टोरिया बेभिचारनी अउ तुम्हर बहु बेसिया बन गय हबै। 14जब तुम्हर टोरिया बेसिया अउ तुम्हर पुतउ बेभिचार करै, तब मै उनके सजा नेहको दइहों, काखे मनसे खुदय गलत काम करै के संग सुनसान जिघा हे जथै, अउ मूरती पूजा करै बालेन के संग हुइके तपसिया करथै, अउ जउन मनसे नेहको समझथै, उन नास हुइ जइहीं। 15हे इस्राएल, अगर तै बेभिचार करथस, तउमा यहूदा दोसी नेहको बनिस, गिलगाल के झइ आबा, अउ न बेतावेन के कढ जा, अउ जिन्दा भगवान के किरिया झइ खइहा,4 16काखे इस्राएल भटकै बाले बछिया के जसना हबै, का अब परभु उनके गेडरा के छउना के जसना लम्बा-चउडा पटउरा हे चराही? 17इस्राएल मूरतिन के बहकाव हे हबै, उनही अपन गली हे जांय देया। 18उन जब अंगूर कर रस पी चुकथै, तब बेसिया हे लग जथै, उन अपन खास मनसे अपमान होय लग बोहत माया करथै। 19आंधी उनखर अपन पंखन हे बांध के उडाय लइ जही, अउ उनखर बलि के कारन उनखर बेज्जती हुइ जही