होसे 3

होसे अउ बिस्वास-घात डउकी

1फेर यहोबा मोर लग कथै, “अब जायके अक्ठी असना डउकी लग माया कर, जउन बेभि-चारिनी होय हे अपन पिरिया के माया होय, काखे उहै मेर अगर इस्राएल पराय देउतन के पल्ला फिरै अउ झुराय हर अंगूर के चढामै के परसंद करथै, तउमा यहोबा उनखर लग माया करथै।” 2तब मै अक्ठी डउकी के चांदी के पन्दरा खन्डा अउ डेढ सव किलो जबा दइके खरीद लइस। 3मै ओखर लग कथो, “तै बोहत रोज तक मोर निता बइठे रहबे, अउ न गलत काम करबे, अउ न कउनो डउका के डउकी हुइ जइहे, अउ मै तोर निता ओसनेन रइहों।” 4काखे इस्राएली बोहत रोज तक बिगर राजा, बिगर हाकिम, बिगर बलिदान, बिगर पवितर पथरा, बिना एपोद, बिना घर कर देउता के बइठे रइहीं। 5ओखर बाद ऊ अपन भगवान यहोबा अउ अपन राजा दाऊद के फेरै खोजै लगहिन, अउ आखरी के रोज हे यहोबा के लिघ्घो, अउ ओखर निक्खा चीज के निता कांपत हर अइहिन।