होसे 2

1इहैनिता तुम मनसे अपन भाइयन लग “मोर मनसे”1 अउ अपन बेहनन लग जेखर हे दया पाय हर2 कहा।

बिस्वास-घात गोमेर-बिस्वास-घात इस्राएल

2अपन दाय लग झगडा करा, बिबाद-काखे ऊ मोर डउकी नेहको, अउ न मै ओखर डउका हव, ऊ अपन मुंह लग अपन गलत काम के अउ अपन छातिन के बीच लग बेकार काम के अलगे करै। 3नहिता मै ओखर बन्डी के उतार के ओखर जनम कर रोज के जसना नंगा कर दइहों, अउ उके रेतहा भुंइ के जसना अउ सुक्खा भुंइ जसना बनाहुं, अउ उके पियास लग मार दइहों। 4ओखर लरकन हे मै कुछु दया नेहको करिहों, काखे ऊ गलत काम करे हर के टोरवा हबै। 5उनखर दाय गलत काम करे हबै, जेखर लादा हे पडे हबै, ऊ लाज के योग काम करे हबै, ऊ कथै, मोर परेमी जउन मोके रोटी-पानी, ऊन, सन, तेल अउ अंगूर कर रस देथै, मै उनखरै पाछू चलिहों। 6इहैनिता देखा, मै ओखर रास्ता के कांटन लग घेरहुं, अउ असना बाडा ठाड करिहों, कि ऊ रास्ता नेहको पाय सकही। 7ऊ अपन परेमिन के पाछू चले लग उनही नेहको पाही, अउ उनही खोजै लग नेहको पाही, तब ऊ कइहिन, मै अपन पहिले डउका के लिघ्घो फेरै लउट जहुं, काखे मोर पहिले दसा हइ टेम के दसा लग निक्खा रथै। 8ऊ हइ नेहको जानथै कि दाना नबा अंगूर कर रस अउ तेल, मै उके देत रथों, अउ ओखर निता ऊ चांदी सोन, जेही उन बाल देउता कर मूरती बनाथै। 9हइ कारन मै दाना के टेम हे अपन दाना के, अउ अपन रितु के टेम , अउ अपन ऊन अउ सन कर कपडा जेखर लग ऊ अपन देह ढांपे हबै, मै छंडाय लेहुं। 10अब मै ओखर परेमी के आगू ओखर देह के उघरिहों, अउ मोर हाथ लग कउनो उके छंडाय नेहको सकहीं। 11मै ओखर तेउहार, नबा जोन-इहा अउ सुस्ताय कर रोज सगलू सही टेमन के उमंग के तेउहार के आखरी कर देहुं। 12मै ओखर रूख अउ अंजीर कर रूख के, जेखर बारे ऊ कथै, कि हइ मोर बेसिया के पाय हबै जेही मोर परेमिन मोके दय हबै, उनही असना उजाडहुं कि ऊ पतेरा जसना हुइ जइहिन, अउ जंगली-पसु उनही चर डरही। 13उन रोज जिनखर हे ऊ बाल देउता के निता धूप जलाथै, अउ नथनी अउ हार पहिरै अपन परेमी के पाछू हुइ जथै अउ मोके बिसरे रथै, उन रोज के सजा उके मै देहुं, यहोबा कर इहै बचन आय।

अपन मनसेन के निता भगवान के माया

14इहैनिता देखा, मै उके मोह करके पतेरा छो लइ जइहों, अउ उहां ओखर लग सान्ति कर बात कइहों। 15उहै मै ओखर अंगूर कर बगिया दइहों, अउ आकोर के समथर भुंइ के आसरा के दूरा कर दइहों, अउ उहां ऊ मोर लग असना बात कइहे जसना अपन जबानी के दिनन हे मतलब मिस्र देस लग बाहिर आमै के टेम कहत रथै। 16यहोबा कर हइ बचन हबै।

कि ऊ टेम तै मोके डउका कइहे, अउ फेर मोर परभु3 झइ कइहे। 17काखे भभिस्य हे मै उके बाल देउतन के नाम नेहको लेय देहुं, अउ न उनखर नाम सुरता हे रइहिन। 18ऊ टेम मै उनखर निता जंगली पसुन अउ आकास कर चिरइया अउ भुंइ हे रेंगै बाले जीव के संग टीमा तइयार करिहों, अउ धनही अउ तलबार टोरके लडाई के उनखर देस लग दुरिहां कर देहुं, अउ असना करिहों कि उन मनसे बिगर डरे सोय करहिन। 19मै हरमेसा के निता तोके अपन डउकी करै के टीमा करिहों, अउ हइ टीमा नेकपन अउ नियाव अउ माया अउ दया के संग करिहों, 20मै तुमही बिस्वास-ओग के संग काज कर बचन दइहों, अउ तै यहोबा के जान लइहे। 21“यहोबा कर हइ बचन हबै, मै मनसेन कर बिनती सुनिहों, अउ आकास लग बरसा भेजहूं। अउ भुंइ फडुहा देही। 22अउ भुंइ कर दाना नबा अंगूर के रस अउ ताजा तेल के सुनके उनके उपजाहूं, अउ उन इज्रेल के पइदा दइहिन 23मै अपन निता उहै देस हे बोइहों, अउ लोरु-हामा हे दया करिहों अउ दया नेहको पय लोअम्मी लग कइहों, तै मोर मनसे हबस, अउ ऊ कथै, हे मोर भगवान।” 4