होसे 14

होसे कर दवारा इस्राएल लग बिनती

1हे इस्राएल, अपन भगवान यहोबा के लिघ्घो लउट आ, काखे तै अपन बिद्रोह के कारन ठोकर खाय हबै। 2बात सीखके अउ यहोबा के पल्ला लउट के, ओखर लग कथै, “सगलू अधरम दुरिहां कर, अनुगरह लग हमके स्बीकार कर, तब हम धन्यबाद कर भेंट चढइबे। 3अस्सूर हमर मुकति नेहको करही, हम घोडवा हे नेहको बइठब, अउ न हम फेर अपन बनाय हर चीजन लग कहिबे, तुम हमर भगवान हबस, काखे अनाथन हे तहिन दया करथस।”

यहोबा इस्राएल के निता नबा जीवन देयके टीमा

4यहोबा हइ कथै, मै उनखर भटक जाय के आदत के दुरिहां करिहों, मै सेतमेत उनखर लग माया करिहों, काखे मोर गुस्सा उनखर लग उतर गय हबै। 5मै इस्राएल के निता ओस के जसना हुइहों, ऊ सोसन फूल के जसना फुलहीं-फडहीं, अउ लबानोन रूख के जसना जर फइलाही। 6ओखर जर लग पउधा फुटुक के निकडही, ओखर चमक जैतून मेर, अउ ओखर खुसबू लबानोन रूख के जसना होही। 7जउन ओखर छाय हे बइठही, उन दाना के जसना बढहिन, अंगूर कर रस के जसना फुलहीं-फडहीं, अउ ओखर परसिध्द लबा-नोन के जिघा हे अंगूर कर रस के जसना होही। 8एप्रैम कही, “मूरती लग अब मोर अउ काहिन काम?” मै ओखर सुनके ओखर हे नजर बनाय रखिहों, मै हरियर सनोवर रूख कर जसना हव, मोर लग तै फडुहा पाथस।

निचोड

9जउन मनसे हुसियार हबै, ऊ इन बातन के समझै, जउन मनसे समझदार हबै, ऊ इन बातन के जानै, कि परभु कर रास्ता सिध्धा हबै, अउ नियाइपन ओहमा चलथै, पय अपराधी मनसे लडखडाय के गिरथै।