आमोस 1

1तको कर निबासी आमोस जउन गेडरा छेडी के चरामै बाले मसे रथै, ओखर हइ बचन हबै, जउन उके यहूदा के राजा उजिय्याह के, अउ योआस के टोरवा इस्राएल के राजा यारोबाम कर रोज हे, भुंइडोल लग दुइ साल पहिले, इस्राएल के बारे हे दरसन देखके कथै, 2“यहोबा सिय्योन लग दहडही, अउ यरुसलेम लग गरजही, तब बरेदिन के चारागाह बिलाप करहिन, अउ करमेल डोंगर कर इटिल्ली झुराय जही।”

इस्राएल के परोसी राज हे भगवान कर नियाव

अराम

3यहोबा कथै, “दमिस्क के तीन का चार पाप के कारन मै ओखर सजा नेहको छंडिहों, काखे उन गिलाद कर लोह के दांवनेबाले ओजार लग कचर डाले हबै। 4इहैनिता मै हजाएल राजा कर राजभवन हे आगी पठोहुं, अउ उनखर लग राजा बेन्हदद के किला के आगी लगइहों। 5मै दमिस्क सहर के दूरा कर फेरका के टोर देहुं, अउ आवेन नाम के घाटी के रहैबाले के अउ बेतएदेन के घर हे रहै बाले राजदंडधारी के नास करिहों, अउ अराम के मनसे गुलाम हुइके कीर इलाका छो जइहिन, यहोबा कर इहै बचन हबै।”

पलिस्ती

6तब भगवान कथै, “गाजा सहर के तीन का चार अपराधन के कारन मै ओखर सजा नेहको छंडिहों, काखे उन सगलू मनसेन के गुलाम बनाय के लइ गइन, कि उनही एदोम के कब्जा हे कर दे। 7इहैनिता मै गाजा सहर के भीठी1 हे आगी लगइहों अउ उनखर लग ओखर भवन नास हुइ जइहिन। 8मै असदोद के रहैबाले के अउ अस्कलोन के राज-दंडधारी के नस्ट करिहों, मै अपन हाथ एक्रोन के बिरुध्द चलइहों, अउ बाकी पलिस्ती मनसे नस्ट हुइही,” भगवान यहोबा कर इहै बचन हबै।

सोर

9यहोबा हइ कथै, “सोर के तीन पय चार अपराधन के कारन मै ओखर सजा नेहको छंडिहों, काखे उन सगलू मनसेन के बन्दी बनायके एदोम के कब्जा हे कर दइस अउ भाई के टीमा के सुरता नेहको करिस। 10इहैनिता मै सोर सहर के भीठी हे आगी लगइहों, अउ ओखर लग ओखर किला नास हुइ जइहिन।”2

एदोम

11यहोबा कथै, “एदोम के तीन का चार अप-राधन के कारन मै ओखर सजा नेहको छंडिहों, काखे ऊ अपन भाई के तलबार लइके भगोय दइस अउ कुछु दया नेहको करथै, पय गुस्सा लग ओही लगेतार फाडत रहिस, अउ अपन गुस्सा के हरमेसा के निता बनाय रखिस। 12इहैनिता मै तेमान सहर हे आगी लगइहों, अउ ओखर लग बोस्रा के किला नास हुइ जइहिन।”

अम्मोन

13यहोबा कथै, “अम्मोन के तीन का चार अप-राधन के कारन मै ओखर सजा नेहको छंडिहों, काखे उन अपन इलाका के बढामै के निता गिलाद इलाका के डउकिन के लादा चीर डारथै। 14इहैनिता मै रब्बा सहर के भीठी हे आगी लगइहों, अउ ओखर लग ओखर किला नास हुइ जइहिन। ऊ युध्द के रोज हे ललकार होही, ऊ आंधी बडेरा कर रोज होही। 15अउ उनखर राजा अपन सासक सहित बन्दी हे जइहिन, यहोबा कर इहै बचन हबै।”