Bhumiya
आमोस 2
मोआब
यहोबा हइ कथै, “मोआब के तीन पय चार अपराध के कारन, मै ओखर सजा नेहको छंडिहों, काखे ऊ एदोम के राजा के हाडा के जलाके राख कर दइस। इहैनिता मै मोआब देस हे आगी पठोहुं, अउ ओखर लग करिय्योत सहर के किला नास हुइ जइहिन, अउ मोआब हुल्लड अउ ललकार, अउ नरसिंगे के आरो होत-होत ऊ सिपाही मर जइहीं। मै उनखर बीच मसे नियाव करै बालेन के नास करिहों, अउ संगै-संग ओखर सगलू सासक के घात करिहों,” यहोबा कर इहै बचन हबै।
यहूदा
यहोबा हइ कथै, “यहूदा के तीन अउ चार अपराधन के कारन, मै ओखर सजा नेहको छंडिहों, काखे उन यहोबा के नियम के बेकार जानिस, अउ मोर नियम के नेहको मानिस, अउ अपन ठगरा देउता के कारन जिनखर पाछू उनखर पुरखा चलत रथै, उन भटक गय हबै। इहैनिता मै यहूदा परदेस हे आगी पठोहुं, अउ ओखर लग यरुसलेम के किला नास हुइ जइहिन।”1
इस्राएल हे भगवान कर नियाव
यहोबा हइ कथै, “इस्राएल के तीन अउ चार अपराधन के कारन, मै ओखर सजा नेहको छंडिहों, काखे उन बेकसूर के पइसा कर निता अउ गरीब के अक्ठी जोडी बूट कर निता बेच डाले हबै। उन गरीबन के मूंड के कुचरथै, ऊ दीन मनसेन के गली लग हटाय देथै, अउ बाफ-टोरवा दुनो अक्ठी जबान डउकी कर लिघ्घो जथै, जेखर लग मोर पवितर नाम के अपवितर ठहराय। ऊ हर अक्ठी बेदी कर लिघ्घो गिरबी कपडा हे सोथै, अउ सजा के पइसा लग खरीदे हुइस अंगूर के रस अपन देउता के घर हे पी लेथै। मै उनखर आगू लग एमो-रियन राज के नास करे रथो, जेखर लम्बाई देव-दारन रुख के जसना, अउ जिनखर बल बांझ रूखन के जसना रथै, तउभरमा मै ओखर उप्पर लग ओखर फडुहा अउ तरी ओखर जर नास करिस । मै तुमके मिस्र देस लग निकार लायों, अउ पतेरा मसे चालीस साल तक लय फिरत रहों, कि तुम एमो-रियन के देस के हकदार हुइ जा। मै तुम्हर टोरवन हे नबी होय के निता अउ तुम्हर कुछ जवानन मसे नाजीर2 होमै कर निता ठहरायों, हे इस्राए-लियन, का हइ सही नेहको हबै?” यहोबा कर हइ बचन हबै।3 पय तुम नाजीरन के अंगूर कर रस पिलाइस, अउ नबियन के भगवान कर संदेस देय लग रोकिस। “देखा, मै तुम के असना देबइहो, जसना फसल के बोझा लग भरे हर गाडी तरी के दबथै। इहैनिता तेज दउरै बाले के भग जाय के जिघा नेहको मिलही, अउ सक्ति-साली के सक्ति कुछ काम नेहको देही, अउ न पराकरमी अपन परान के बचाय सकी। तीर चलामै बाले ठाड नेहको रहि सकही, अउ हरबी तेज दउरै बाले नेहको बचही, घोड-सवार अपन परान नेहको बचाय सकथै। अउ बहादुर सिपाही हे जउन जादा धीर होय, ऊ उस रोज लंगडे हुइके भाग जही,” यहोबा कर इहै बचन हबै।
Source notes (3)
- Cross-reference होसे 8:14
- Footnote नाजीर भगवान कर निता समरपित मनसे जउन खास उपास रखथै, अउ मूंड कर चूंदी नेहको मुडवाथै, अउ दारू नेहको पीथै अउ लोथ नेहको छीथै जउन आतमिक दिमाक अउ ग्यान पाथै
- Cross-reference गिनती 6:1-8; बेवस्थाबिबरन 18:18
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.