होसे 12

1एप्रैम हवा के अपन खाना बनाथै, अउ सगलू दिन पूरब हवा के पाछु करत रथै, ऊ लगेतार झूठ अउ असान्ति के बढाथै, ऊ अस्सूर के संग टीमा बांधथै, अउ मिस्र देस हे तेल पठोथै। 2यहूदा के संग भगवान के मुकदमा हबै, अउ ऊ याकूब के ओखर चाल-चलन के जसना सजा देही, ओखर कामन के जसना ऊ ओही बदला देही, 3अपन दाय कर कोख हे ऊ अपन भाई एसाव के लात मारिस, अउ बडा हुइके ऊ भगवान कर संग लडिस,1 4ऊ दूत लग लडाई करे, अउ जीत गइस, ऊ रोमै लगिस, अउ ओखर लग गिडगिडाय के बिनती करथै, बेतेल हे ऊ उके मिलथै, अउ उहै भगवान हमर लग बात करिस।2 5यहोबा, सिपाहिन के भगवान, जेखर सुरता यहोबा कर नाम लग होथै, 6इहैनिता तै अपन भगवान के पल्ला फिर, किरपा अउ नियाव के काम करत रह, अउ अपन भगवान के ओरगत रह।

नियाव के आगू कर सब्द

7ऊ बनिया हबै, अउ ओखर हाथ हे छल के तखरी हबै, अतिया-चार उके पसंद हबै। 8एप्रैम कथै, “मै धन्नड हुइ गय हव, मै ओखर धन डेरा पाय गयों, मोर कउनो काम हे असना अधरम नेहको पाय गइस, जेखर लग पाप लगै।”3 9मै मिस्र देस लग आय तब लग तोर भगवान हव, मै तोके तम्बून हे असना बसाहुं जसना नियत तेउहार के रोज हे होय करथै।4 10मै अक्किल बालेन के दवारा बात करेव, अउ बेर-बेर दरसन देयत रथै, अउ अक्किल बाले के दवारा किस्सा कहत आय हव। 11अगर गिलाद के मनसे अधरम करथै, ता ओखर बिनास निस्चित हबै, अगर उन गिलगाल जिघा हे बइला कर बलि चढाथै, ता उनखर बेदिन कर ढेर लग जइहिन, जसना जोतररे हर खेतवा के लिघ्घो पथरा कर ढेर। 12याकूब अराम देस छो भाग गय रथै, उहां याकूब अक्ठी डउकी के निता सेबा करथै, अउ डउकी के निता ऊ चरवाही करथै।5 13अक्ठी अक्किल बाले के दवारा भगवान इस्राएल के मिस्र देस लग निकाड लाय हबै, अउ अक्किल बाले मूसा के दवारा उनखर रक्छा हुइस।6 14एप्रैम मनसे बोहत गुस्सा देबाय हबै, इहैनिता ओखर करे हर खून उहै के उप्पर बने रही, अउ ऊ अपन भगवान के नाम हे जउन बुराई करे हबै, ऊ ओखरै हे लउटाय जही।