निरगमन 8

मेचकन कर हमला

1तब परभु मूसा लग कथै, “फिरोन के लिघ्घो जा, ओखर लग गुठे परभु कथै, मोर मनसेन के जाय दे कि उन मोर आराधना करै। 2पय अगर तै उनही नेहको जाय दइहे ता देख, मै तोर सगलू देस हे मेचका दवारा नुकसान पहुंचाहुं। 3नील नदिया हे मेचकन के झुन्ड के झुन्ड भर जही, उन तोर भवन अउ तोर जेठना हे अउ तोर हरवाहन के घरन हे, अउ तोर बिरादरी के घर हे, तोर चुल्हवा अउ पिसान गुथै के परात हे चढ जइहिन। 4तोर देह हे, तोर मनसे अउ तोर हरवाहन के देह हे मेचका चढ अइहिन।” 5परभु मूसा लग कथै, “हारून के गुठे दे, कि हाथ हे डन्डा लइके नदिया नहर अउ झील हे अपन हाथ बढायके मेचकन लग सगलू मिस्र देस हे हमला करै।” 6“तब हारून मिस्र देस के पानी हे अपन हाथ बढाइस, अउ मेचका निकडके आइन अउ सगलू मिस्र देस हे छाय गइन। 7पय जादूगर अपन तन्तर-मन्तर के दवारा ओसनेन करिन, उन मेचका के मिस्र देस लग मेचकन के निकाड दइन। 8तब फिरोन मूसा अउ हारून के बुलायके उनखर लग कथै, परभु लग बिनती करा, कि ऊ मोर लग अउ मोर मनसेन लग मेचकन के दुरिहां करै, अउ मै इस्राएल के मनसेन के जाय दइहों, कि उन परभु के निता बलि चढामै। 9तब मूसा फिरोन लग कथै, मोके आदेस दे कि तोर निता तोर हरवाहन अउ तोर मनसेन के निता, कब बिनती करों, जेखर लग मेचका तोर लिघ्घो लग अउ तोर भवन लग नस्ट हुइ जाय, अउ उन बलुक नील नदिया हे पाय जही?” 10अउ ऊ कथै, “कल,” मूसा कथै, जसना तै कथस, ओसनेन होही, जेखर लग तोके सुरता हुइ जाय कि हमर परभु भगवान के जसना अउ कउनो भगवान नेहको हबै। 11अउ मेचका तोर लिघ्घो लग तोर घर लग, तोर हरवाहन अउ तोर मनसेन के लिघ्घो लग कढ जहीं, उन बलुक नील नदिया हे रइहिन। 12तब मूसा अउ हारून फिरोन के लिघ्घो लग बाहिर चले गइन, मूसा फिरोन लग जसना टीमा करे रथै, ओखर जसना उन परभु लग मेचका के बारे हे बिनती करिस। 13परभु मूसा के गुठे के जसना करिस, अउ मेचका घर, अंगना अउ खेतवन हे अउ गांव हे मर गइन। 14अउ मिस्र के रहैबाले मनसे उनही अकजिघा करके उनके कुढहाय दइन, अउ सगलू देस दुरगंध लग भर गइस। 15जब फिरोन देखथै कि समस्या टर गय हबै, ता ऊ अपन हिरदय कठोर कर लइस, ऊ मूसा अउ हारून के बात नेहको सुनिस, जसना परभु कथै।

मच्छडन कर झुन्ड

16परभु मूसा लग कथै, हारून लग गुठे अपन डन्डा उठाबै अउ भुंइ हे मार, जेखर लग मिस्र देस के भुंइ के कुदरा मच्छड बन जाय। 17अउ ऊ ओसनेन करिस, हारून अपन हाथ फइलाइस अउ डन्डा लइके भुंइ के कुदरा हे मारिस, ता मच्छर मनसे अउ पसु दुनो हे हमला कर दइन, सगलू मिस्र देस हे भुंइ के कुदरा मच्छड बन गइस। 18तब जादुगरन अपन तन्तर-मन्तर के दवारा मच्छडन के लामै के परयास करिन, पय उन सफल नेहको हुइस, मनसे अउ पसु दुनो के देह हे मच्छर छाय रहिन। 19तब जादूगर फिरोन लग कथै, “हइ तो भगवान के हाथ के काम हबै।” पय फिरोन के हिरदय कठोर होत गइस, अउ ऊ मूसा अउ हारून के बात नेहको मानथै जसना परभु कथै।1

बडका माछी कर झुंड

20परभु मूसा लग कथै, “तै सुबेन्ने उठके नील नदिया के पल्ला जाबे अउ फिरोन के ओरगबे, ऊ उहां जथै, तै ओखर लग कइहे परभु कथै, मोर मनसेन के जाय दे कि उन मोर आराधना करही। 21अगर तै मोर मनसेन के नेहको जाय दइहे ता मै तोर उप्पर, तोर हरवाहन, तोर मनसे अउ तुम्हर घरन हे बडका माछिन के दल पठोहुं, मिस्र हे रहै बाले के घर अउ जउन भुंइ हे उन ठाड हबै, उन बडका माछी लग भर जही। 22पय ऊ रोज मै गोसेन परदेस छो, जिहां मोर मनसे निबास करथै, उनही अलगे रखहुं, जेखर लग उनखर हे बडका माछिन के झुन्ड नेहको होहीं, जेखर लग तै जान लेबे कि सगलू भुंइ हे महिन परभु हव। 23इहैमेर मै अपन मनसे अउ तोर मनसे के बीच अन्तर करिहों, कल हइ निसानी परगट होही।” 24अउ परभु ओसनेन करिस, अउ बडका माछिन के बडा झुन्ड फिरोन के भवन अउ हरवाहन के घरन हे अउ सगलू मिस्र देस बडका माछिन के झुंड के झुंड भर गइन अउ बडका माछी के मारे ऊ देस नास हुइस। 25तब फिरोन मूसा अउ हारून के बुलायके कथै, “तुम जायके अपन भगवान के निता इहै देस हे बलिदान करा।” 26मूसा कथै, “असना करै के सही नेहको हबै, काखे हम अपन परभु भगवान के निता मिस्र देस के रहइया घ्रनित चीज समझथै, अगर हम मिस्र के रहइया घ्रनित चीज समझे जाय बाले बलि उनखर आगू चढाउब, ता का उन हमके पथरा लग नेहको मरहिन? 27हम घन पतेरा हे तीन रोज के यातरा हे जायके अपन परभु भगवान के निता जसना ऊ हमर लग गुठे हबै, ओसनेन बलिदान करब।” 28फिरोन कथै, “मै तुमके जाय देहुं कि तुम अपन परभु भगवान के पतेरा हे बलिदान करा, पय बोहत दुरिहां झइ जइहा, तुम मोर निता बिनती करा।” 29मूसा कथै, देखा मै तुम्हर लिघ्घो लग बाहिर जथों, मै परभु लग बिनती करिहों, कि ऊ कल तोर लिघ्घो लग तोर हरवाह अउ तोर मनसे के लिघ्घो लग बडका माछिन के झुन्ड दुरिहां करै, पय तै मोके फेरै धोखा झइ देहे, अउ किरपा इस्राएलिन के परभु के निता बलि चढामै दे। 30मूसा फिरोन के लिघ्घो लग बाहिर जायके परभु लग बिनती करिस। 31अउ परभु मूसा के गुठे हर के जसना करिस, ऊ फिरोन अउ ओखर सगलू हरवाह अउ ओखर मनसे लग बडका माछी के दुरिहां कर दइस, अक्कोठे माछी नेहको रहिन। 32पय फिरोन हइ बेर अपन हिरदय कठोर करिस, अउ इस्राएलिन के नेहको जाय दइस।