निरगमन 7

1तब यहोबा मूसा लग कथै, “देख, मै तोके फिरोन के निता भगवान मेर ठहराथो, अउ तोर भाई हारून तोर नबी होही। 2जउन आदेस मै तोके दइहो, उके तै कहबे, तोर भाई हारून फिरोन लग कही कि ऊ मिस्र देस लग इस्राएलियन के अपन देस जाय दे। 3पय मै फिरोन के हिरदय के कठोर कर दइहो, अउ मै मिस्र देस हे कइनमेर के चिन्ह अउ चकित बाले काम देखाहूं।1 4तउमा फिरोन तुम्हर बात नेहको सुनही, तब मै मिस्र देस हे अपन हाथ उठाहुं, मै नियाव अउ बडा काम करके अपन सिपाही, अपन मनसे अउ इस्राएल के पुरखन के मिस्र देस लग बाहिर निकाड लइहों। 5अउ जब मै मिस्र के रहइया हे अपन हाथ उठायके उनखर बीच लग इस्राएलियन के बाहिर निकाड लइ जइहो, तब मिस्र के रहइया के समझ हे आही कि मै यहोबा हबो।” 6तब मूसा अउ हारून भगवान के आदेस के जसना करिन। उन परभु के आदेस के जसना करिन। 7जब उन फिरोन लग बातचीत करिन, तब मूसा अस्सी साल के अउ हारून तिरासी साल के रथै।

हारुन के डन्डा

8तब यहोबा मूसा अउ हारून लग कथै, 9जब फिरोन तुम्हर लग कही, “अपन बात के साबूत हे चकित बाले काम देखा,” तब तै हारून लग कहबे, “अपन डन्डा उठा अउ उके फिरोन के आगू फटक दे, कि ऊ डन्डा सपुवा बन जाय।” 10तब मूसा अउ हारून फिरोन के लिघ्घो गइन। जसना परभु उनही आदेस दय रथै, ओसनेन उन करिन। हारून फिरोन अउ ओखर हरवाहन के आगू डन्डा फेंकिस, ऊ सपुवा बन गइस। 11तब फिरोन पंडित अउ टोनहन के बुलाथै, मिस्र देस के जादूगर अपन तन्तर-मन्तर बिदिया लग ओसनेन करिन। 12उन अपन-अपन डन्डा भुंइ हे फटकथै ता ऊ सपुवा बन गइन, पय हारून के डन्डा उनखर डन्डन के खाय लेथै। 13फिरोन के हिरदय अउ बोहत कठोर हुइ जथै, ऊ मूसा अउ हारून के बात नेहको सुनथै, जसना कि यहोबा कहे रथै।

मिस्र हे दस बडा समस्या के पडै के वरनन

14तब यहोबा मूसा लग कथै, फिरोन के हिरदय कठोर हुइ गय हबै, ऊ मोर मनसेन के नेहको जाय दइ। 15इहैनिता जब फिरोन सुबेन्ने नदिया के पल्ला आही, तब तै ओखर लिघ्घो जाबे, तै नील नदिया के टाठा हे उके ओरगबे, जउन डन्डा सपुवा बन गय रथै, उके अपन हाथ हे लेबे। 16तै ओखर लग कहबे, इब्रिन के भगवान परभु मोके तोर लिघ्घो पठोय हबै, ऊ कहे हबै, “मोर मनसेन के जाय दे, कि उन पतेरा हे मोर सेबा करै,” देख अब तक तै मोर बात नेहको सुने हबस। 17परभु कथै, तै हइ बात लग जानिहे, कि मै परभु हव, मै अपन हाथ के डन्डा लग नील नदिया के पानी हे मारहुं अउ पानी खून बन जही।2 18नील नदिया के मछडी मर जही, ओखर पानी गन्धाय लगही मिस्र के रहैबाले नील नदिया के पानी नेहको पीय पइहिन। 19फेर यहोबा मूसा लग कथै, “हारून लग गुठेबे, अपन डन्डा लइले अउ अपन हाथ के मिस्र देस के सगलू पानी, नदिया नाला, तलवा अउ पानी कुन्ड हे उठा कि पानी खून बन जाय, तब सगलू मिस्र देस हे लकरी अउ पथरा के बरतन हे पानी खून बन जही।” 20जसना परभु मूसा अउ हारून के आदेस देथै, उन ओसनेन करिन, हारून फिरोन अउ ओखर हरवाहन के देखत-देखत अपन डन्डा उठाइस अउ नील नदिया हे मारिस, अउ नील नदिया के सगलू पानी खून बन गइस। 21अउ नील नदिया के मछडी मर गइन, अउ ऊ पानी गन्धाय लगिस, पय मिस्र के रहैबाले नील नदिया के पानी नेहको पीय सकथै, सगलू मिस्र देस हे खूनै खून हुइ गइस। 22तब मिस्र देस के जादूगर अपन तन्तर-मन्तर लग ओसनेन करिन, फिरोन के हिरदय कठोर बन गइस, ऊ मूसा अउ हारून के बात नेहको सुनथै, जसना परभु गुठे रथै। 23फिरोन अपन घर छो लउट गइस, ऊ हइ बात के धियान नेहको देथै। 24मिस्र देस के रहैबाले पानी पीय के निता नील नदिया के अलग बगल खोदरा खोदाइ करिन, काखे उन नील नदिया के पानी नेहको पीय सकथै। 25जउन रोज परभु नील नदिया के मारथै, तब लग सात रोज गुजरे हुइ चुके रथै।