निरगमन 6

1तब भगवान मूसा लग कथै, अब तै देखबे कि मै फिरोन लग का करिहो, जेखर लग ऊ उनही बल पूरवक निकाडही, ऊ उनही अपन देस लग मजबूर करके निकाड देही।

मूसा कर बुलाय जायके

2भगवान मूसा लग कथै, “मै यहोबा हव। 3मै सक्तिमान भगवान के नाम लग अब्राहम, इसहाक अउ याकूब के दरसन देथों, पय यहोबा के नाम लग मै उनखर बीच हे परगट नेहको होयों।1 4अउ मै उनखर संग अपन टीमा मजबूत करे हव, मतलब कनान देस जेहमा ऊ परदेसी हुइके रथै, उके उनही दइ। 5इस्राएली जिनही मिस्री मनसेन कबजा हे रखथै,उनखर समस्या सुनके मै अपन टीमा के सुरता करे हव। 6इहैनिता इस्राएल कर मनसेन लग कहा, मै यहोबा हव, अउ मै तुमके मिस्रियन के काम लग मुक्त करहुं, अउ तुमके उनखर गुलामी लग छंडाहुं, अउ अपन फइले हर भुजा अउ नियाव के कठिन काम के दवारा तुमके मुक्त करहुं। 7मै तुमके अपन मनसे बनाहुं, अउ मै तुम्हर भगवान हुइहों। जब मै तुमके मिस्र कर गुलामी लग आजाद करहुं, तब तुम जान जइहा कि महिन तुम्हर भगवान यहोबा हव। 8अउ जउन देस के देय के किरिया मै अब्राहम, इसहाक अउ याकूब लग खाय रथो, उहै हे मै तुमके पहुचोय के उके तुम्हर निता डेरा के भाग देहुं, मै भगवान यहों।” 9मूसा हइ बात इस्राएलियन के बताइस, पय उन ओखर बात नेहको सुनिन, काखे उनखर कठोर गुलामी उनखर हिम्मत टोर दइस। 10तब यहोबा मूसा लग कथै, 11“तै जायके मिस्र के राजा फिरोन लग कह, कि इस्राएलियन के अपन देस लग निकड जाय दे। 12पय मूसा यहोबा लग कथै, देख, इस्राएल मनसेन मोर बात नेहको सुनिन, फेर फिरोन मोर तोतरा बोलैबाले के कइसन सुनही?” 13तब यहोबा मूसा अउ हारून के इस्राएलिन के अउ मिस्र के राजा फिरोन के निता हइ उदेस्य लग आदेस दइस कि उन इस्राएलिन के मिस्र देस लग निकाड लइ जाय।

मूसा अउ हारून के परवार कर खानदान

14उनखर पुरखन के घराना के मुखिया डउका हइ हबै, इस्राएल के जेठ, रूबेन के टोरवा, हनोक, पल्लू, हेस्रोन अउ कारमी, इनखर लग हारून के कुर निकडे हबै। 15सिमोन के टोरवा यमूएल यामीन, ओहद, याकिन, सोहर अउ अक्ठी कनानी डउकी के टोरवा साउल, इनखर लग सिमोन के कुर निकडिस। 16लेवी कर टोरवा जिनखर उनखर खानदान चले हबै, उनखर नाम हइ हबै, मतलब गेरसोन, कहात अउ मरारी, अउ लेबी के पूर जिन्दगी एक सव सइतीस साल के हुइस।2 17गेरसोन के टोरवा जिनखर लग उनखर कुर चलिस लिबनी अउ सिमी रथै। 18कहात के टोरवा अम्राम, इसहार, हेब्रोन अउ उज्जीएल अउ कहात के पूर जिन्दगी हुइस अक सव तैंतीस साल के हुइस। 19मरारी कर टोरवा महली अउ मूसी लेविन के कुर जिनखर लग उनखर खानदान चलिस हइ हबै।3 20अम्राम अपन फूफी योकेबेद लग काज करथै, अउ ओखर हारून अउ मूसा पइदा हुइस, अउ अम्राम के पूर जिन्दगी अक सव सइतीस साल के हुइस। 21इसहार कर टोरवा कोरह, नेपेग अउ जिक्री रथै। 22उज्जीएल कर टोरवा मीसाएल, एलसापन अउ सितरी। 23हारून अम्मीनादाब कर टोरिया अउ नहसोन के बेहन एलीसेबा लग काज करिस, अउ ओखर लग नादाब, अबीहू, एलाजार अउ ईतामार पइदा हुइस।4 24कोरह कर टोरवा अस्सीर, एल्काना अउ अबीआसाप, अउ इनखरै लग कोरिहियन के कुर निकडिस। 25हारून कर टोरवा एलाजार पूतीएल के अक्ठी टोरिया लग काज करथै, अउ ओखर लग पीनहास पइदा हुइस, इनखरै लग उनखर कुर चलिस लेविन के पुरखन के घराना के मुखिया डउका इहै हबै। 26हारून अउ मूसा हबै, जिनही यहोबा हइ आदेस देथै, इस्राएलिन के समूह बनायके दल के जसना मिस्र देस लग निकाड लइ आबा। 27ई उहै मूसा अउ हारून हबै जउन मिस्र के राजा फिरोन लग कथै कि हम इस्राएलिन के मिस्र लग निकाड लइ जइबे।

मूसा अउ हारून के भगवान कर आदेस

28जउन रोज भगवान मूसा लग मिस्र देस हे बात करिस, 29ऊ मूसा के गुठेथै, “मै परभु हव। जउन कुछ मै तोके कथो, ऊ मिस्र देस के राजा फिरोन लग कहबे।” 30पय मूसा भगवान के जबाब देथै, “मै बोलै हे तोतरा हबो फिरोन मोर बात कसके सुनही?”