निरगमन 5

फिरोन राजा के लिघ्घो मूसा अउ हारून

1एखर बाद मूसा अउ हारून जायके फिरोन लग कथै, इस्राएल के भगवान यहोबा ऊ कथै, मोर मनसेन के जाय दे कि ऊ पतेरा हे मोर निता तेउहार बनामै। 2फिरोन कथै, यहोबा कोन हबै? मै ओखर बचन मानके इस्राएलिन के जाय देहुं? मै यहोबा के नेहको जानथो, अउ मै इस्राएलिन के नेहको जाय देहुं। 3उन कथै, इब्रिन के भगवान हमर लग मुलाखात करे हबै, इहैनिता हमके पतेरा हे तीन रोज के गली हे जाय दे कि अपन भगवान यहोबा के निता बलिदान करी, असना झइ होय कि ऊ हमर हे महामारी रोग फइलाय या तलबार चलवाबै। 4मिस्र के राजा ओखर लग कथै, हे मूसा हे हारून तुम काखे मनसेन लग काम छंडवामै चाहथा, तुम जायके अपन-अपन काम करा। 5अउ फिरोन कथै, सुना हइ देस हे उन मनसे बोहत हुइ गय हबै, कि तुम उनही काम लग आराम दिलामै चाहथा। 6फिरोन उहै रोज उन मेहनत करामै बाले लग जउन उन मनसे के उप्पर रथै, अउ उनखर अधिकारी के हइ आदेस देथै। 7“तुम जउन अब तक ईटा बनामै के निता मनसेन के भूसा दय करथा, ऊ अब लग झइ देबे, उन खुदय जायके भूसा अकजिघा करै। 8तउमा जेतका ईटा अब तक उनही बनाय पडथै ओतकै आगू उनखर लग बनवाबै, ईटा के गिनती झइ घटाबे, काखे उन अलाल हबै, हइ कारन उन हइ कहिके चिरलाथै हम जायके अपन भगवान के निता बलिदान करब। 9उन मनसेन लग अउ कठिन सेबा कराय जाय कि उन ओहमा मेहनत करत रहै अउ झूठी बातन हे धियान झइ लगामै।” 10तब मनसेन के मेहनत करामै बाले अउ अधिकारी बाहिर जायके उनखर लग कथै, फिरोन हइमेर कथै, मै तुमके भूसा नेहको देहुं। 11तुमिन जायके जिहां कहुं भूसा मिलै उहां लग ओही बटोर के लइ आन, पय तुम्हर काम कुछु नेहको घटाय जही। 12इहैनिता उन मनसे सगलू मिस्र देस हे छिदर-बिदर हुइन कि भूसा के बदले डेठरा बटोरै। 13मेहनत करामै बाले हइ कहि-कहिके उनखर लग हरबी करत रहै कि जउन मेर तुम भूसा पायके करे करथा, उहै मेर अपन रोज के काम अबो पूर करा। 14अउ इस्राएलिन मसे जउन सरदारन के फिरोन के मेहनत करामै बाले साहब ठहराय रथै, उन मार खथै, अउ उनखर लग पूंछे गइस, “का कारन हबै, कि तुम अपन ठहराय हर ईटन के गिनती के जसना पहिले के जसना कल अउ आज पूर नेहको कराय?” 15तब इस्राएलिन के सरदार जायके फिरोन के दुहाई हइ कहिके देथै, तै अपन हरवाह लग असना बरताव काखे करथस? 16तोर हरवाहन के भूसा तो दय नेहको जथै, अउ ऊ हमर लग कहत रथै, ईटा बनाबा, ईटा बनाबा, अउ तोर हरवाहन मार खाय रथै, पय दोस तोर मनसेन के हबै। 17फिरोन कथै, तुम आलसी हबा आलसी इहै कारन कथा, कि हमके यहोबा के निता बलिदान करै के जाय दे। 18अब जायके अपन काम करा, अउ भूसा तुमके नेहको दय जही, पय ईटा के गिनती पूर करै के पडही। 19जब इस्राएलिन के सरदार हइ बात सुनथै कि उनखर ईटन के गिनती न घटै अउ रोजदिना ओतकै काम पूर करैका पडही, ता उन जान जथै, कि उनखर परेसानी के रोज आ गय हबै। 20जब उन फिरोन के लिघ्घो लग बाहिर निकड आथै, तब मूसा अउ हारून जउन उनखर लग मुलाखात करै के निता ठाड रथै, उनही मिलै। 21अउ उन मूसा अउ हारून लग कथै, “यहोबा तुम्हार ऊपर दया करके न्याय करै, काखे तुम हमके फिरोन अउ ओखर हरवाहन के नजर हे गलत ठहरायके हमके मारै के निता उनखर हाथ हे तलबार दइ दय हबस।”

भगवान लग मूसा कर सिकायत

22तब मूसा यहोबा के लिघ्घो लउटके कथै, “हे परभु तै हइ मनसेन के संग असना बुराई काखे करे हस ? अउ तै मोके इछो काखे पठोय हबस? 23जब लग मै तोर नाम लग फिरोन के लिघ्घो बात करै के निता गयों तब लग ऊ हइ मनसेन के संग बेकार बेउहार करे हबै, अउ तै अपन मनसेन के निता कुछु छुटकारा नेहको करे।”