Bhumiya
निरगमन 4
भगवान मूसा के अदभुत चमत्कारी सक्ति देथै
तब मूसा भगवान के जबाब दइस, “उन इस्राएली मनसे मोर उप्पर यकीन नेहको करहिन, जब मै उनखर लग कइहों कि तै मोके पठोय हबस, उन कइहिन परभु तोर लग बात नेहको करिस।” पय भगवान मूसा लग कथै, “तोर हाथ हे हइ काहिन हबै?” मूसा जबाब देथै, “डंडा हबै।” तब भगवान कथै, “अपन डंडा के भुंइ हे फटक दे” इहैनिता मूसा अपन डंडा के भुंइ हे फटकिस अउ डंडा सपुवा बन गइस, मूसा डेराय के दुरिहा भग गइस। तब भगवान मूसा लग कथै, “अपन हाथ के बढा अउ ओखर पूंछी के पकड, तब मूसा आगू बढिस अउ सपुवा के पूंछी के पकड लइस, जब मूसा असना करिस ता, सपुवा फेर डंडा बन गइस।” तब भगवान कथै, “अपन डंडा के हइ मेर निस्तार कर अउ मनसे बिस्वास करहिन कि तै भगवान मतलब अपन पुरखन के भगवान, अब्राहम के भगवान, इसहाक के भगवान अउ याकूब के भगवान के देखे हबै।” फेर भगवान ओखर लग कथै, “अपन हाथ छाती हे धर” मूसा कपडा के भित्तर छाती हे अपन हाथ के रखिस, जब छाती लग हाथ के बाहिर निकारथै ता ओखर हाथ कोढ के मेर बरफ के जसना चरका हुइ गइस। तब भगवान कथै, “अब तै अपन हाथ फेर छाती हे धर” मूसा फेर अपन हाथ छाती हे धरिस, जब ऊ हाथ के बाहिर निकारथै तब ओखर हाथ जसना पहिले रथै, ओसनेन हुइ जथै। तब भगवान कथै, “अगर उन तोर बात के बिस्वास नेहको करै अउ पहिले चिन्ह के नेहको मानै, ता दूसर चिन्ह के उप्पर बिस्वास करहिन। अगर उन दुनो चिन्ह हे बिस्वास झइ करै, अउ तोर बात के नेहको सुनै, ता तै नील नदिया के पानी लइहे अउ उके सुखाय हर भुंइ हे डालबे, जउन पानी तै नील नदिया लग लइहे, ऊ सुखाय हर भुंइ हे खून बन जही।” मूसा भगवान लग कथै, “हे परभु मै बोलै हे सही नेहको हव, न पहिले रथों, अउ जब लग तै अपन हरवाह लग बात करे लगे, तब लग बोलै हे कठिन होथै अउ मोर जीभ तोतराथों।” तब भगवान ओखर लग कथै, “मनसे के मुंह के कोन बनाइस? अउ मनसे के बउरा, बहिरा, देखैबाले, या अंधरा, मोके छांड कोन बनाय सकथै? इहैनिता जा, जब तै बोलबे, मै तोर संग रइहों, मै तोके बोलै के निता सब्द देहुं।” पय मूसा कथै, “हे मोर भगवान, मै दूसर मनसे के पठोय के निता बिनती करथों मोके झइ पठो।” तब भगवान मूसा के उप्पर गुस्साइस अउ कथै, “ का तोर भाई लेवी हारून नेहको आय? मै तोर भाई हारून के निस्तार करिहों, काखे ऊ निक्खा मेर लग बोल लेथै, हारून पहिले लग तोर लिघ्घो आउत हबै, ऊ तोके देखके बोहत खुस होही। ऊ तोर संग फिरोन के लिघ्घो जही, मै तोके गुठेहुं कि तोके का कहे के हबै, तब तै हारून के गुठेबे कि का कहे के हबै, हारून ओखर लग कहै के निता सही सब्द चुनही। ऊ तोर पल्ला लग मनसेन लग बात करही, ऊ तोर निता मुंह अउ तै ओखर निता भगवान के जसना ठहरही। अउ तै हइ डंडा के अपन हाथ हे लइ जा अउ एखर दवारा चिन्ह चकित के काम दिखाबे।”
मूसा मिस्र देस छो लउटथै
तब मूसा अपन ससुर इतरो के लिघ्घो लउटिस, मूसा ओखर लग कथै, “मै तोर लग बिनती करथों कि मोके मिस्र देस हे अपन मनसेन के लिघ्घो जाय दे, मै हइ देखै चाहथों कि का उन जिन्दा हबै या नेहको?” इतरो कथै, “तै सान्ति के संग जा।” भगवान मिद्दान देस हे मूसा लग कथै, “मिस्र देस छो लउट जा, काखे जउन मनसे तोर परान लेय चाहथै, उन सबके सब मर गय हबै।” इहैनिता मूसा अपन डउकी अउ अपन लरकन के लेथै अउ उनही गदहा हे बइठाइस, तब मूसा मिस्र देस छो लउटथै, मूसा ऊ डंडा के अपन संग लइ गइस जेहमा भगवान के सक्ति रथै। भगवान मूसा लग कथै, “जब तै मिस्र देस हे लउटबे, तब भगवान ओखर लग कथै, जब तै फिरोन लग बात करबे ता उन सगलू चकित के दिखाबे, सुरता रखबे जिनही दिखामै के सक्ति मै तोके दय हव, पय फिरोन के हिरदय के मै बोहत जादा कठोर बनाय देहुं, ऊ मनसेन के नेहको जाय देही। अउ तै फिरोन लग कहबे, भगवान हइ कथै, इस्राएल मोर जेठ टोरवा हबै, अउ मै तोर लग कथों, मोर टोरवा के जाय दे कि ऊ मोर सेबा करै, अगर तै उके नेहको जाय दइहे, ता देख, मै तोर जेठ टोरवा के मार देहुं।”1 तब असना होही की रास्ता हे पय सराय हे यहोबा मूसा लग मुलाखात करके उके मार डालै चाहिस। तब सिप्पोरा अक्ठिन उजेड चिकना पथरा लइ के अपन टोरवा के खलरी के काट डालिस, अउ मूसा के गोड हे हइ कहके फटक दइस, जरूर तै मोर निता खून बहामै बाले मोर डउका हबै। तब यहोबा उके छांड दइस ऊ टेम सुध्दीकरन के कारन ऊ बोलिस, तै खून बहामै बाले डउका हबस। तब यहोबा हारून लग कथै, “मूसा लग मुलाखात करै के पतेरा हे जाय।” ऊ गइस अउ भगवान के डोंगर हे उके मिलिस अउ उके चूमिस। तब मूसा हारून के हइ गुठेथै कि अउ यहोबा काहिन बात कहिके उके पठोय हबै अउ सगलू चिन्ह दिखामै के आदेस उके दइस हबै। तब मूसा अउ हारून जायके इस्राएल के सगलू सियान मनसेन के अक जिघा करिस। अउ जेखर बात यहोबा मूसा लग कहे रथै ऊ सब झन के हारून उहै सुनाइस, अउ मनसेन के आगू ऊ चिन्ह चकित कर काम दिखाबै। अउ मनसे उनखर यकीन करै, अउ हइ सुनके यहोबा इस्राएलिन के सुधि लइस अउ उनखर दुखन के देखे हबो, ऊ मूंड झुकाय के परनाम करिस।
Source notes (1)
- Cross-reference निरगमन 12:29
Bhumiya. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.