निरगमन 3

भगवान कर दवारा मूसा के बुलउवा

1मूसा अपन ससुर इतरो नाम मिद्दान के याजक के गेडरा-छेडी के चराथै, ऊ उनके निरजल परदेस के दिन बुडती दिसा हे लइ गइस, मूसा होरेब नाम के अक्ठी डोंगर छो गइस। 2मूसा ऊ डोंगर हे भगवान के दूत के अक्ठी जलत पुडरा हे देखिस, हइमेर घटथै, मूसा अक्ठी पुडरा के जलत देखिस, जउन भसम नेहको होत रहै। 3इहैनिता मूसा कथै, “कि मै पुडरा के लिघ्घो जइहों अउ देखहुं कि बिगर राख होय कउनो पुडरा कसना जल सकथै।” 4जब भगवान देखथै कि मूसा पुडरा के देखै के निता आथै, इहैनिता भगवान पुडरा के बीच लग पुकारथै, “मूसा-मूसा” अउ मूसा कथै, “हव मै इछो हव।” 5भगवान कथै, “इछो झइ आ, अउ अपन गोड लग बूट के उतार दे, काखे जउन जिघा हे तै ठाढ हबस ऊ पवितर जिघा हबै।” 6फेर भगवान कथै, “मै तोर बाफ कर भगवान, अउ अब्राहम, इसहाक, अउ याकूब कर भगवान हव।” तब मूसा अपन मुंह के ढांक लेथै, काखे ऊ भगवान के देखै लग डरथै। 7तब भगवान कथै, “मै उन दुख पीरा के देखे हव, जउन मिस्र देस हे हमर मनसे सहे हबै अउ मै उनखर रोमै के सुने हव जब मिस्री मनसे उनके चोट पहुंचाथै, मै उनखर पीरा के बारे हे जानथों। 8इहैनिता अब जइहों अउ मिस्रियन लग अपन मनसेन के बचइहों, मै उनके ऊ देस लग निकारके उनके निक्खा देस हे लइ जइहों जिहां उन समस्या लग छुटकारा पाय सकहिन, जेहमा दूध अउ सहद1 के धार बहथै, मतलब कनानी, हित्ती, एमोरी, परिज्जी, हिब्बी अउ यबूसी मनसे रथै। 9मै इस्राएल के मनसे के दुख अउ अतियाचार कर पुकार सुने हव, मै देखे हव कि मिस्री कउन मेर उनखर जीवन के कठिन कर दय हबै। 10इहैनिता अब मै तोके फिरोन राजा के लिघ्घो पठोथो जा, मोर मनसे मतलब इस्राएल के मनसे के मिस्र देस लग बाहिर निकार के लाबा।” 11पय मूसा भगवान लग कथै, “मै कउनो खास मनसे नेहको हव, जउन फिरोन राजा के लिघ्घो जांव अउ इस्राएल मनसे के मिस्र देस लग बाहिर निकारके लइ आनो?” 12भगवान कथै, “मै तोर संग रइहों, मै तोके पठोथों हइ बात के हइ चिन्ह होही, जब तै इस्राएली मनसे के मिस्र देस लग निकार लाय के बाद, तुम अइहा अउ हइ डोंगर हे मोर आराधना करिहा।” 13मूसा भगवान लग कथै, “जब मै इस्राएली मनसे के लिघ्घो जायके उनखर लग कइहों, तुम्हर पुरखन के भगवान मोके तुम्हर लिघ्घो पठोय हबै, ता अगर उन मोर लग पुंछहिन, ओखर काहिन नाम हबै? तब उनही मै काहिन गुठेहुं?” 14तब भगवान मूसा लग कथै, उनखर लग कहबे, “मै जउन हव सो हव,” जब तुम इस्राएल मनसे के लिघ्घो जा, “उनखर लग कहबे, मै हव जउन मोके तुम्हर लिघ्घो पठोय हबै।”2 15भगवान मूसा लग इहो कथै, इस्राएली मनसे लग हइ कहबे, “तुम्हर पुरखन के भगवान, अब्राहम के भगवान, इसहाक के भगवान, याकूब कर भगवान मोर नाम हरमेसा भगवान रही, इहै रूप हे मनसे पीढी-पीढी मोके जनहिन, मनसे लग कहबे, भगवान मोके तुम्हर लिघ्घो पठोय हबै।” 16भगवान इहो कथै, जा अउ इस्राएल सियानन के अकजुट कर अउ उनखर लग कहबे, तुम्हर पुरखन के भगवान मोर आगू परगट हुइस, अब्राहम, इसहाक, याकूब कर भगवान मोर लग बात करिस, भगवान कथै, मै तुम्हर बारे हे सोचे हव, अउ ऊ अतियाचार के बारे हे जउन तुम्हर संग मिस्र देस हे घटे हबै। 17अउ मै ठान लय हव कि तुमही मिस्र के दुख मसे निकार के कनानी, हित्ती, एमोरी परिज्जी हिब्बी अउ यबूसी मनसेन के देस हे लइ जहुं, जउन असना देस हबै कि जेहमा दूध अउ सहद के धार बहथै। 18तब सियान तोर बात मनहिन अउ तब तै अउ सियान मिस्र देस के राजा के लिघ्घो जइहा, तुम उनखर लग कइहा, “इब्रानी मनसे के भगवान यहोबा हबै, हमर भगवान हमर लिघ्घो आय रथै, ऊ हमर लग तीन दिन तक निरजल परदेस हे यातरा करै के निता कहे हबै, उहां हम अपन भगवान यहोबा के निता जरूर बलि चढउबे।” 19मै जानथों कि जब तक मिस्र देस के राजा मोर बडा सक्ति लग मजबूर नेहको होही, तब तक तुमके नेहको जाय देही। 20मै अपन हाथ बढइहों अउ मिस्र देस के मिस्री के उप्पर अपन सब चकित के काम करहुं, जब असना होही ता ऊ तुमके जाय देही। 21अउ मै मिस्री मनसे के इस्राएली मनसे के परति दयालु बनाहुं, इहैनिता जब तुम निकरिहा तब जूछे हाथ नेहको निकडिहा।3 22“हर अक्ठी डउकी अपन मिस्री परोसी लग अउ अपन घर हे रहै बालेन लग मंगहिन अउ उन मनसे उके भेंट दइहिन, तुम्हर मनसे भेंट हे चांदी, सोन अउ निक्खा कपडा पइहिन, जब तुम मिस्र के छंडिहा तुम उन भेंटन के अपन लरकन के दइहा, हइ मेर तुम मिस्री मनसे के धन लइ अनिहा।”