निरगमन 2

मूसा कर जनम

1लेवी के घराना के अक्ठी मनसे उहां रथै, ऊ लेवी के वंस के अक्ठी डउकी लग काज करिस। 2ऊ डउकी लादा हे हुइस अउ ऊ अक्ठी टोरवा के पइदा करिस, ओखर दाय देखिस कि लरका बोहत सुन्दर हबै अउ ऊ उके तीन महिना तक लुकोय रखिस।1 3पय जब ऊ लरका के अउ लुकोय नेहको सकिस तब ओखर निता कटई चारा के अक्ठी टोपरी बनाइस, ऊ टोपरी हे डामर अउ रार के पोत दइस अउ ओखर भित्तर टोरवा के मढाय दइस, एखर बाद ऊ टोपरी नील नदिया के टाठा हे कांसन के बीच मढाय दइस। 4लरका के बेहन हइ देखै के निता दुरिहा ठाढ रथै कि ओखर संग का होही। 5उहै टेम फिरोन के टोरिया नहामै के निता नील नदिया छो गइस, ओखर सखी नदिया के टाठा हे टहलै लागथै, फिरोन के टोरिया कांसन के बीच अक्ठी टोपरी देखथै, ऊ टोपरी लामै के निता अपन दासी के पठोथै। 6जब फिरोन के टोरिया टोपरी के खोलथै ता अक्ठी लरका के देखिस, ऊ लरका रोउत रहै, उके लरका के उप्पर दया आइस, ऊ कथै, “हइ इब्री डउकी के कउनो लरका होही।” 7तब लरका के बेहन अब तक लुके रथै, तब ऊ ठाढ हुइस अउ फिरोन के टोरिया लग कथै, “का तै चाहथस कि मै लरका के देखरेख करै हे तोर मदत के निता अक्ठी इब्री डउकी खोज के लांउ?” 8फिरोन के टोरिया कथै, “जा।” टोरिया गइस अउ लरका के दाय के बुलाय के लइ आनिस। 9फिरोन के टोरिया कथै, “हइ लरका के लइ जा अउ मोर निता इके पाल पोस, हइ लरका के अपन दूध पिला मै तोके मजदूरी दइहों।” तब ऊ डउकी लरका के लइ जायके दूध पियामै लगिस। 10जब लरका कुछ बडा होथै ता ऊ डउकी उके फिरोन के टोरिया के लिघ्घो लइ जथै, फिरोन के टोरिया अपन टोरवा के रूप हे अपनाय लेथै, फिरोन के टोरिया ओखर नाम मूसा रखिस, “काखे ऊ उके पानी लग निकाडे रथों।”

मूसा मिद्दान देस भागथै

11जब मूसा बडा हुइस अउ जबान हुइ गइस, ऊ देखथै कि ओखर इब्री मनसे बोहत जादा काम करै के निता मजबूर करे जथै, अक रोज मूसा अक्ठी मिस्री मनसे दवारा अक्ठी इब्री मनसे के मारत हबै।2 12मूसा इछो-उछो देखथै कि कउ नेहको हबै, तब ऊ मिस्री के मारके कुदरा हे लुकोय देथै। 13जब मूसा दूसर रोज बाहिर गइस, ऊ दुइठे इब्री के आपन हे लडत देखथै, ऊ अपराधी लग कथै, “तै अपन भाई के काखे मारथस?” 14ऊ मनसे कथै, “कोन तोके हमर उप्पर मुखिया अउ नियाव करे बाले ठहराय हबै? का तै मोके मार डाले चाहथस जसना तै मिस्री मनसे के मार डाले रहस?” मूसा हइ सोचके डेराय जथै, “जरूर हइ बात खुल गय हबै।”3 15जब फिरोन हइ बात सुनथै ता मूसा के मारै के योजना बनाथै। तब मूसा फिरोन के लिघ्घो लग भागिस, अउ मिद्दान देस हे जायके रहै लागथै, अउ ऊ उहां अक्ठी कुंवा के लिघ्घो जायके बइठ गइस।4 16मिद्दान के याजक के सातठे टोरिया रथै, अउ ऊ उहां आयके पानी भरै लागथै, कि डोंडा हे भरके अपन बाफ के गेडरा अउ छेडिन के पिलाथै। 17तब बरेदिया आयके उनही हटामै लगथै, ता मूसा ठाड हुइके उनखर मदत करथै, अउ बोहत लग गेडरा अउ छेडिन के पानी पिलाथै। 18जब ऊ अपन बाफ रूएल के लिघ्घो आथै, ता ऊ ओखर लग पूंछिस, “का कारन हबै कि आज तुम एतका हरबी लउट आय हबा?” 19उन कथै, अक मिस्री डउका हमके बरेदिया के हाथ लग छंडाइस, अउ हमर निता बोहत पानी भरके गेडरा अउ छेडिन के पिलाइस। 20ता ऊ अपन टोरियन लग कथै, “ऊ डउका कछो लग हबै? तुम ओही काखे छांड आय हबा? ओही बुलाय लइ आबा कि ऊ भोजन करै।” 21अउ मूसा ऊ डउका के संग रहै के तइयार होथै, रूएल ओखर लग अपन टोरिया सिप्पोरा के काज कर दइस। 22सिप्पोरा कर अक्ठी टोरवा पइदा होथै, ता मूसा हइ कहिके, मै दूसर देस हे परदेसी हव, ओखर नाम गेरसोम रखथै। 23बोहत रोज बीतै लग मिस्र के राजा मर गइस। इस्राएली कठिन सेवा के कारन लम्मा-लम्मा सांस लइके आहे भरै लगथै, अउ पुकार उठथै, अउ उनखर दुहाई अउ कठिन सेवा के कारन होथै ऊ भगवान तक पहुंचिस। 24भगवान उनखर पीरा सुनके अपन टीमा के, जउन ऊ अब्राहम, इसहाक अउ याकूब के संग बांधे रथै, सुरता करथै।5 25अउ भगवान इस्राएलिन के देखके उनखर हे धियान देथै।