निरगमन 1

मिस्र देस हे इस्राएलिन हे अतियाचार

1इस्राएल मतलब याकूब अपन टोरवन के संग मिस्र देस के यातरा करे रथै अउ हर अक्ठी टोरवा के संग ओखर अपन परवार रथै, इस्राएल कर टोरवन कर नाम हइ मेर हबै। 2रूबेन, सिमोन, लेवी, यहूदा, 3इस्साकार, जबूलून, बिन्यामीन, 4दान, नप्ताली, गाद, अउ आसेर।1 5अउ यूसुफ मिस्र हे पहिलेन आय चुके रथै। याकूब के खास वंस हे जउन पइदा हुइस उन सगलू सत्तर मनसे रथै। 6यूसुफ अउ ओखर सगलू भाई अउ ऊ पुरखा के सगलू मनसे मर गइन। 7पय इस्राएल के लरका बढै लगिन, अउ उन मनसेन बोहत बलवान बनत गइन अउ गिनती हे एतका बढ गइन कि सगलू देस हे भर गइन।2 8मिस्र देस हे अक्ठी नबा राजा गद्दी हे बइठिस जउन यूसुफ के नेहको जानथै।3 9ऊ राजा अपन परजा लग कथै, देखा इस्राएली मनसे गिनती हे बोहत बढ गय हबै, उन हमर लग जादा सक्तिसाली हुइ गय हबै, जउन हमर निता खतरा हबै। 10“चला, हम उनखर संग बडी हुसियारी लग बेउहार करी, कहुं असना झइ होय कि उनखर गिनती बोहत जादा बढ जाय, अउ अगर युध्द के टेम आय पडी ता उन हमर बैरिन लग मिलके हमर खिलाप लडै लगिन अउ हइ देस लग भग निकरै।” 11इहैनिता उन काम करामै बाले के ठहराइस कि उनखर हे भारी बोझ डालके उनही दुख दय करहिन, हइ मेर इस्राएली मनसे फिरोन के निता पितोम अउ रामसेस नाम के भंडारबाले सहर के बनाइस। 12इहैनिता मिस्री मनसे इस्राएली मनसेन लग जेतका जादा अतियाचार करिन, ओतकै उन बोहत बढत अउ फइलत गइन, मिस्र देस के रहै बाले इस्राएलिन लग डर गइन 13इहैनिता मिस्र देस के मनसे इस्राएली मनसे के अउ जादा कठिन काम करै हे मजबूर करिन। 14अउ उनखर जीवन के गारा, ईटा, अउ खेतीबारी के अलगे-अलगे काम के कठिन सेवा लग दुखी कर डारिन, जउन कउ काम हे उन उनखर लग सेवा करवाथै उनखर लग उन कठोरता के बेउहार करथै। 15सिप्रा अउ पूआ नाम के दुइ इब्री डउकी4 के मिस्र देस के राजा आदेस दइस, 16राजा कथै, “जब तुम इब्रानी डउकिन के लरका पइदा होय के टेम भुंइ हे बइठे देखिहा ता मदत करत रइहा, अगर टोरिया पइदा होही ता उके जिन्दा रहै दइहा, अगर टोरवा पइदा होही ता तुम उनही मार दइहा।” 17पय ऊ इब्री डउकी भगवान लग डरथै, इहैनिता मिस्र के राजा के आदेस के जसना नेहको करिन, उन टोरवन के जिन्दा छांड देथै। 18तब मिस्र देस के राजा उके बुलायके पूछिस, “तै जउन टोरवन के जिन्दा छांड देथस, ता असना काखे करथस?” 19इब्री डउकी फिरोन के जबाब दइस, “इब्री डउकी मिस्र देस के डउकिन के जसना नेहको हबै, ऊ असना मोटी ताजी हबै कि इब्रिन डउकी के पहुंचे लग आगू उनखर लरका पइदा हुइ जथै।” 20इहैनिता भगवान इब्रिन डउकी के संग भलाई करिस, अउ उनखर लग बढके बोहत जादा बलवान हुइ गइन। 21इहैनिता इब्रिन डउकी भगवान लग डरथै, भगवान उनखर परवार के बसाइस। 22ता फिरोन अपन सगलू मनसेन के आदेस दइस, इब्रिन के जेतका टोरवा पइदा होय रहै उन सगलू के तुम नील नदिया हे डाल दइहा अउ सगलू टोरियन के जिन्दा रहैं देया।5