निरगमन 40

मिलापबाले तम्बू उके ठाड करै के अउ समरपित

1फेर भगवान मूसा लग कथै, 2पहिले महिना के पहिले रोज के तै मिलापबाले तम्बू के निबास के परभु के उपस्थिति कर निता ठाड कर देहे। 3अउ ओहमा गवाह चिट्ठी के सन्दूक के धरके बीचबाले परदा के पाछू हे कर देहे। 4अउ मेज के भित्तर लइ जायके जउन कुछु ओहमा सजाय के हबै उके सजाय देबे, ता दीवट के भित्तर लइ जायके ओखर दिया के बार देहा। 5अउ गवाह चिट्ठी के सन्दूक के आगू सोन के बेदी के जउन हूमन के निता हबै उके धरबे अउ निबास के दूरा के परदा के लगाय देया। 6अउ मिलापबाले तम्बू कर निबास कर दूरा के आगू होमबेदी के रखबे। 7अउ मिलापबाले तम्बू अउ बेदी कर बीच बरतन के रख के ओहमा पानी भरैका। 8अउ चउगिरदा पल्ला कर अंगना के कनात के ठाढ करैका अउ ओहमा अंगना के दूरा हे परदा के लटकाय देबे। 9अउ अभिसेक कर तेल लइके निवास के अउ जउन कुछु ओहमा होही सगलू कुछु के अभिसेक करबे, अउ सगलू सामान सहित ओही पवितर करबे, तब ऊ पवितर ठहरही। 10सगलू सामान सहित होमबेदी कर अभिसेक करके ओही पवितर करबे, तब ऊ परमपवितर ठहरही। 11पाय सहित हउदी कर अभिसेक करके उके पवितर करबे। 12तब हारून अउ ओखर टोरवा के मिलापबाले तम्बू के दूरा हे लइ जायके पानी लग नहवाबे। 13अउ हारून के पवितर कपडा पहिराबे अउ ओखर अभिसेक करके ओही पवितर करबे कि ऊ मोर निता याजक के काम करै। 14अउ ओखर टोरवा के लइ जायके खुरथा पहिराबे। 15अउ जसना तै उनखर बाफ के अभिसेक करै ओसनेन अभिसेक करबे कि ऊ मोर निता याजक कर काम करै अउ उनखर अभिसेक उनखर पीढी-पीढी कर निता उनखर हरमेसा के पुजारी कर याजक कर पद के चिन्हा ठहरही। 16हइ मेर मूसा, जउन-जउन आदेस यहोबा ओही दय रथै उहै के जसना करिस। 17अउ दूसर साल के पहिले महिना के पहिले रोज कर निवास ठाढ करे गइस। 18मूसा निवास के ठाढ करवाइस अउ ओखर खुरसी धर ओखर तख्था लगाके ओहमा डन्डा डालिस, अउ ओखर खम्भा के ठाढ करिस। 19अउ ऊ निवास कर उप्पर तम्बू के फइलाइस अउ तम्बू कर उप्पर ऊ ओढै के लगाइस, जउन मेर यहोबा मूसा के आदेस दय रथै। 20अउ ऊ गवाह चिट्ठी के लइके सन्दूक हे रखिस अउ सन्दूक हे डन्डन के लगायके ओखर उप्पर पस्चाताप के ढकै के धर दइस। 21अउ ऊ सन्दूक के निवास हे पहुंचाइस अउ बीचबाले परदा के लटकाय के गवाह चिट्ठी के सन्दूक के ओखर भित्तर करिस, जउन मेर यहोबा मूसा के आदेस दय रथै। 22अउ ऊ मिलापबाले तम्बू हे निवास के उत्तर के पल्ला बीच कर परदा लग बाहिर टेबुल के लगाइस। 23अउ ओखर उप्पर ऊ यहोबा के लिघ्घो रोटी सजायके रखिस, जउन मेर यहोबा मूसा के आदेस दय रथै। 24अउ ऊ मिलापबाले तम्बू हे मेज के आगू निवास के दक्खिन कर पल्ला चिमनी के रखिस। 25अउ ऊ चिमनी के यहोबा कर लिघ्घो जला दइस, जउन मेर यहोबा मूसा के आदेस दय रथै। 26अउ ऊ मिलापबाले तम्बू हे बीच कर परदा के आगू सोन कर बेदी के रखिस। 27अउ ऊ ओखर उप्पर महकैबाले धूप जलाइस, जउन मेर यहोबा मूसा के आदेस दय रथै। 28अउ ऊ निवास कर दूरा हे परदा के लगाइस। 29अउ मिलापबाले तम्बू के निवास के दूरा हे होमबेदी के धरके ओखर उप्पर होमबलि अउ दानाबलि के चढाइस जउन मेर यहोबा मूसा के आदेस दय रथै। 30अउ ऊ मिलापबाले तम्बू अउ बेदी कर बीच बरतन के रखके ओहमा धोमै के निता पानी डालिस। 31अउ मूसा अउ हारून अउ ओखर टोरवा ओहमा अपन-अपन हाथ गोड धोइन। 32अउ जब-जब ऊ मिलापबाले तम्बू हे या बेदी कर लिघ्घो जथै तब-तब ऊ हाथ गोड धोथै, जउन मेर यहोबा मूसा के आदेस दय रथै।1 33अउ ऊ निवास कर चारो पल्ला अउ बेदी के अगल-बगल अंगना के कनात के ठाढ कराइस अउ अंगना के दूरा कर परदा के लटकाय दइस, हइ मेर मूसा सगलू काम के पूर करिस।

मिलापबाले तम्बू हे बादर

(निरगमन 9:15-23)

34तब बादर मिलापबाले तम्बू हे छा गइस, अउ यहोबा कर महिमा लग निवास जिघा हे भर गइस।2 35अउ बादर मिलापबाले तम्बू हे ठहर गइस अउ यहोबा कर महिमा निवास जिघा हे भर गइस, हइ कारन मूसा ओहमा घुस नेहको कर सकिस। 36इस्राएलियन के सगलू यातरा हे असना होथै, कि जब-जब ऊ बादर मिलाप बाले तम्बू कर उप्पर लग उठ जथै, तब-तब उन आगू बढथै। 37अउ अगर बादर नेहको उठथै, ता जउन रोज तक ऊ नेहको उठथै ऊ रोज तक आगू नेहको जथै। 38इस्राएल कर घराना के सगलू यातरा हे दिन के यहोबा के बादर निवास हे, अउ रात के उहै बादर हे आगी उन सगलू के दिखाई दय करथै।