निरगमन 39

याजकीय कपडा तइयार करैके

(निरगमन 28:1-14)

1फेर उन नीला, बैगनी अउ ललका रंग के काढे हर कपडा पवितर जिघा के सेबा के निता, अउ हारून के निता पवितर बनामै, जउन मेर यहोबा मूसा के आदेस दय रथै। 2अउ ऊ एपोद सोन अउ नीला, बैगनी अउ ललका रंग के कपडा के अउ सूक्छम बटे हर सनी के कपडा के बनाइस। 3अउ उन सोन पीट-पीटके ओखर पतर बनामै, फेर पतर के काट-काटके तार बनामै, अउ तार के नीला, बैगनी अउ ललका रंग के कपडा हे, अउ सूक्छम सनी के कपडा हे कढाई के बनावट लग मिलाय दइस। 4एपोद के जोडै के उन ओखर खांधा हे बन्धन बनाइन, ऊ अपन दुनो सिरा लग जोडे गइस। 5अउ उके कसै के निता जउन काढा हर कमरबन्ध ओहमा बनिस, ऊ ओखर संग बिगर जोड के, अउ उहै के बनावट के जसना, मतलब सोन अउ नीला, बैगनी अउ ललका रंग के कपडा के, अउ सूक्छम बटे हर सन कर कपडा कर बनिस, जउन मेर यहोबा मूसा कर आदेस दय रथै। 6उन सुलैमानी मडि काटके ओहमा इस्राएल कर बाराठे टोरवा कर नाम, जसना छाप खोदे जथै, ओसनेन खोदै, अउ सोन के खांचा हे जड दइस। 7अउ ऊ उनही एपोद के खांधा कर बंधन हे लगाइस, जेखर लग इस्राएलियन कर निता सुरता करामैबाले मडि ठहरिस, जउन मेर यहोबा मूसा के आदेस दय रथै।

कवचबन्ध बनैका

(निरगमन 28:15-30)

8ऊ कवच के एपोद के जसना सोन कर, अउ नीला, बैगनी अउ ललका रंग के कपडा कर, अउ सूक्छम बटे हर सन कर कपडा हे कढाई कर काम करे हर बनाइस। 9कवच चउकोर बनिस, अउ उन ओही दोहरा बनाइस अउ ऊ दोहरा हुइके अक बीता लम्बा अउ अक बीता चउडा बनिस। 10अउ उन ओहमा चार पंक्तिया हे मडि बनाइस, पहली पंक्ति हे माडिक्य, पदराग, अउ लालडी बनाय गइस। 11अउ दूसर पंक्ति हे मरकत, नील मडि अउ हीरा, 12अउ तीसर पंक्ति हे लसम सूरकान्त अउ नीलम, 13अउ चउथा पंक्ति हे फीरोजा, सुलैमानी मडि अउ यसब बनाइस, हइ सगलू अलगे-अलगे सोन कर खांचा हे बनाय गइस। 14अउ हइ मडि इस्राएल कर टोरवा के नाम कर गिनती के जसना बाराठे रथै, बाराठे कुरन मसे अक-अक कर नाम जसना छापे खोदे जथै, ओसनेन खोदे गइस। 15अउ उन कवच हे डोरिन के जसना गुथे हर सुध्द सोन कर सांकड बनायके लगाइस। 16फेर उन सोन के दुइ खाने अउ सोन कर दुइठे हुक बनायके दुनो हुक के कवच के दुनो सिरन हे लगाइस। 17तब उन सोन के दुनों गुथे हर सांकड के कवच के मूंडन हे दुनो हुक हे लगाइस। 18अउ गुथे हर दुनों सांकड के दुनो बाकी मूंडन के उन दुनो खाना हे बनायके, एपोद कर आगू दुनो खांधा के बंधन हे लगाइस। 19तब उन सोन कर अउ दुइ कडी हुक बनायके कवच के दुनो मूंडन हे ओखर कोर हे, जउन एपोद कर भित्तर भाग हे रथै लगाइस। 20अउ उन सोन कर दुइ अउ हुक बनायके एपोद कर दुनो कंधा के बंधन हे तरी लग ओखर आगू अउ जोड कर लिघ्घो एपोद के बनाय हर कमरबन्ध कर उप्पर लगाइस। 21तब उन चपरास के ओखर कडी के दवारा एपोद के कडी हे नील फीता लग असना बांधिस कि ऊ एपोद के बनाय हर पटुका के उप्पर रहै, अउ चपरास एपोद लग अलगे नेहको होय पाबै, जसना यहोबा मूसा के आदेस दय रथै।

दूसर याजकीय कपडा बनामै के

(निरगमन 28:31-43)

22फेर एपोद कर चोंगा पूरा नील रंग कर बनाय गइस। 23अउ ओखर बनावट असना हुइ कि ओखर बीच बख्तर कर छेद के जसना अक छेद बनिस, अउ छेद कर चारो पल्ला अक कोर बनिस कि ऊ फटै नेहको पाबै। 24उन ओखर तरीबाले घेरा हे नील, बैगनी अउ लाल रंग कर कपडा के अनार बनाइस। 25उन सुध्द सोन के घंटिन बनायके बागे के तरीबाले घेरा के चउगिरदा पल्ला अनारन के बीचोबीच लगाइस, 26मतलब बागे के तरीबाले घेरा के चउगिरदा पल्ला अक्ठी सोन के घंटी, अउ अक्ठी अनार, फेर अक्ठी सोन के घंटी, अउ अक्ठी अनार लगाय गय कि उनही पहिरे हर सेबा टहल करै, जसना यहोबा मूसा के आदेस दय रथै। 27फेर उन हारून, अउ ओखर टोरवन के निता बने हर सूती के कपडा के अंगरखे। 28अउ सूत सनी के कपडा के मुरेठा, सूती कपडा के सुंदर टोपिन, अउ सूत बटे हर सनी के कपडा जउन कनिहा लग जांघ तक। 29अउ सूती बटे हर सनी के कपडा के अउ नील, बैगनी अउ लाल रंग के कढाई कर काम करे हर मुरेठा इन सगलू के जउन मेर यहोबा मूसा कर आदेस दय रथै ओसनेन बनाइस। 30फेर उनही पवितर मुकुट के पटरी सुध्द सोन के बनाइस, अउ जसना छापे हे ओसनेन ओहमा हइ अक्छर खोदे गय, मतलब यहोबा कर निता पवितर। 31अउ उन ओहमा नीला फीता लगाइस, जेखर लग ऊ उप्पर मुरेठा हे रहै, जेखर मेर यहोबा मूसा के आदेस दय रथै।

मिलाप बाले तम्बू कर तइयार होमै

(निरगमन 35:10-19)

32हइ मेर मिलापबाले तम्बू के रहैबाले सगलू काम समापत हुइस, अउ जउन-जउन काम के आदेस यहोबा मूसा के दय रथै, इस्राएलियन उहै के मेर करिस। 33तब उन रहैबाले मूसा के लिघ्घो लइ आइस, मतलब हुक, तख्था, बेडे, खम्भा, खुरसिन अउ सगलू सामान सहित तम्बू। 34अउ ललका रंग लग रंगे हर गेडरन के खलरी के ओढनहा, अउ सूइसो1 के खलरी कर ओढनहा, अउ बीच कर परदा। 35डन्डा सहित गवाह चिट्ठी के सन्दूक अउ पछताप के ढकनहा। 36सगलू सामान सहित टेबुल, अउ भेट के रोटी। 37सगलू सामान सहित दीवट अउ ओखर सजावट के चिमनी, अउ उजियार देय के निता तेल। 38सोन के बेदी, अउ अभिसेक कर तेल, अउ महकनी धूप, अउ तम्बू के दूरा कर परदा। 39पीतर के झंझरा, डन्डन अउ सगलू सामान सहित पीतर के बेदी, अउ पाय सहित हउदी। 40खम्भन अउ खुरसिन सहित अंगना के परदा, अउ अंगना के दूरा कर परदा, अउ डोरा, अउ खुट्टा, अउ मिलापबाले तम्बू के रहैबाले के सेबा कर सगलू सामान। 41पवितर जिघा हे सेबा टहल करै के निता बेल बूटा काढे हर कपडा, अउ हारून पुजारी के पवितर कपडा, अउ ओखर टोरवन के कपडा जेही पहिरके उनही पुजारी कर काम करैके रथै। 42मतलब जउन-जउन आदेस यहोबा मूसा के दय रथै उनही के मेर इस्राएलियन सगलू काम करिस। 43तब मूसा सगलू काम कर जांच करके देखिस कि उन यहोबा के आदेस के मेर सगलू कुछु करे हबै अउ मूसा उनही आसिरबाद दइस।