निरगमन 38

बलि चढामै के बेदी बनाइन

(निरगमन 27:1-8)

1फेर ऊ बमूर कर लकरी के होमबलि के बेदी बनाइस, ओखर लम्बाई पांच हाथ अउ चउडाई पांच हाथ के रथै, इहैमेर लग ऊ चउकोर बनिस, अउ उंचाई तीन हाथ के रथै। 2ऊ ओखर चउगिरदा कोन्टन हे ओखर चारठे सींग बनाइस, उन ओखर संग बिगर जोड के बनिस, अउ ऊ ओही पीतर लग मढिस। 3अउ ऊ बेदी के सगलू बरतन के बनाइस, राख उठामै के बरतन, मतलब ओखर हंडिया, फावडियन, कटोरा, कांटा, आगी बाले बरतन अउ करछुली के बनाइस, ओखर सगलू चीज ऊ पीतर के बनाइस। 4अउ बेदी के निता ओखर चउगिरदा पल्ला के कंगनी के तले ऊ पीतर के जाली के अक्ठी झंझरी बनाइस, ऊ तरी लग बेदी कर मध्य तक ऊंच रथै। 5ऊ पीतर के झंझरी के चउगिरदा कोन्टा के निता चारठे कडा ढालिस, जउन डंडा के खाय के काम दे। 6फेर ऊ डन्डन के बमूर कर लकरी के बनाइस अउ पीतर लग मढिस। 7ता ऊ डन्डन के बेदी के टाठा के कडन हे बेदी के निता डाल दइस, बेदी के ऊ तखथा लग खोखला बनाइस।

पीतर के गुंड्डी बनाइस

(निरगमन 30:18)

8ऊ गुंड्डी अउ ओखर खूरा दुनो पीतर के बनाइस, हइ मिलापबाले तम्बू के दूरा हे सेबा करैबाले डउकिन के पीतर के अइना लग नहामै के बरतन बनाइस।

परभु कर उपस्थिति बाले तम्बू कर अंगना

(निरगमन 27:9-19)

9फेर ऊ अंगना बनाइस, अउ दक्खिन के पल्ला के निता अंगना के बटे हर सुध्द सन के कपडा के रथै, अउ सगलू मिलायके सव हाथ लम्बा रथै। 10उनखर निता बीस खम्भा, अउ इनखर पीतर इनखर पीतर के बीसठे खुरसी बनिस, अउ खम्भा के गुंडी अउ जोडै के छडी चांदी के बनिस। 11अउ उत्तर के पल्ला के निता सव हाथ लम्बा परदा रथै, अउ उनखर निता बीस खम्भा, अउ इनखर पीतर के बीस खुरसी बनिस, अउ खम्भन के छल्ला अउ जोडे पट्टी के बनिस। 12अउ पस्चिम के पल्ला के निता सगलू परदा मिलके पचास हाथ के रथै, उनखर निता दस खम्भा अउ दस उनखर खुरसी रथै, अउ खम्भा के छल्ला अउ जोडे के पट्टी चांदी के रथै। 13अउ पूरब के पल्ला ऊ पचास हाथ के रथै। 14अंगना के दूरा के अक पल्ला के निता पन्दरा हाथ के परदा बनिस, अउ उनखर निता तीनठे खम्भा अउ तीनठे खुरसी रथै। 15अउ अंगना के दूरा के दूसर पल्ला ओसनेन बने रथै, अउ अंगना के केवाड के इछो अउ उछो पन्दरा-पन्दरा हाथ के परदा बने रथै उनखर निता तीन-तीनठे खम्भा, अउ तीन-तीनठे इनखर खुरसी रथै। 16अंगना के चउगिदा पल्ला सगलू परदा पातर बने हर सूती के कपडा के रथै। 17अउ खम्भा के खुरसी पीतर के छल्ला अउ पट्टी चांदी के बनिस, अउ उनखर मूंड चांदी लग मढे गइस अउ अंगना के सगलू खम्भा चांदी के पट्टी लग जोडे गय रथै। 18अंगना के दूरा के परदा हे बेल बूट कर काम करे हर रथै, अउ ऊ नीला, बैगनी अउ लाल रंग के कपडा कर, अउ सूत के बने हर सूती के कपडा के बने रथै, अउ ओखर लम्बाई बीस हाथ के रथै, अउ ओखर ऊंचाई अंगना के कनात के चउडाई के मेर पांच हाथ के बनिस। 19अउ उनखर निता चारठे खम्भा, अउ खम्भन के चारठे खुरसी पीतर के बनिस, उनखर छल्ला चांदी के बनिस, अउ उनखर मूंड चांदी लग मढे गइस, अउ उनखर पट्टी चांदी के बनिस। 20अउ रहैबाले अउ अंगना के चउगिरदा पल्ला के सगलू खुट्टा पीतर के बने रथै

परभु कर उपस्थिति बाले तम्बू हे ऊज बाले धातु

21गवाह कर चिट्ठी के रहैबाले के मेर जउन लेविन के सेबा के काम के निता बनिस, अउ जेखर गिनती हारून पुजारी के टोरवा ईतामार के दवारा मूसा के कहै लग होय रथै, ओखर बिस्तार हइ हबै। 22जउन-जउन चीज के बनामै के आदेस यहोबा मूसा के दय रथै ओखर यहूदा के कुर बाले बसलेल जउन हूर कर नाती अउ ऊरी कर टोरवा रथै, बना दइस। 23अउ ओखर संग दान के कुर बाले, अहीसामाक कर टोरवा, ओहोलीआब रथै, जउन नक्कासी करै अउ कढाई बाले अउ नीला, बैगनी अउ लाल रंग के अउ सुध्द कपडा हे कढाई करे बाले निपुन कारीगर रथै। 24पवितर जिघा के सगलू काम हे जउन भेंट कर सोना लगिस ऊ पवितर जिघा के सेकेल के हिसाब लग उनतिस किक्कार अउ सात सव तीस सेकेल1 रथै। 25अउ मंडली के गिने हर मनसेन के भेट के चांदी पवितर जिघा के सेकेल के हिसाब लग सव किक्कार अउ सत्तरा सव पचहत्तर सेकेल2 रथै। 26मतलब जेतका बीस साल के अउ उनखर जादा उमर के गिने गय रथै, उन छय लाख तीन हजार साढे पांच सव डउका रथै, अउ अक अक्ठी जन के पल्ला लग पवितर जिघा के सेकेल के मेर आधा सेकेल, जउन छय गराम होथै, मिलिस। 27अउ ऊ सव किक्कार3 चांदी पवितर जिघा अउ बीचबाले परदा दुनोन के खुरसिन के बनामै हे लग गइस, सव किलोगराम लग सव खुरसिन बनिस, अक-अक खुरसी अक किक्कार के बनिस। 28अउ सत्तरा सव पचहत्तर सेकेल4 जउन बच गय उनखर लग खम्भन के हुक बनाय गइस, अउ खम्भन के चोंटी हे मढे गइस, अउ उनखर पट्टी बनाय गइस। 29अउ भेंट कर पीतर सत्तर किक्कार अउ दुइ हजार चार सव सेकेल रथै। 30एखर लग मिलापबाले तम्बू के दूरा के खुरसिन, अउ पीतर के बेदी, पीतर के झंझरा, अउ बेदी कर सगलू सामान, 31अउ अंगना के चउगिरदा पल्ला के खुरसिन, अउ ओखर दूरा के खुरसिन, अउ रहैबाले अउ अंगना के चउगिरदा पल्ला के खुट्टा बनाय गइस।