निरगमन 37

टीमा कर संदूक बनाय जायके

(निरगमन 25:10-22)

1फेर बसलेल बमूर कर लकरी के पवितर सन्दूक बनाइस, ओखर लम्बाई ढाई हाथ, चउडाई डेढ हाथ अउ ऊंचाई डेढ हाथ के रथै। 2ऊ संदूक के भित्तर-बाहिर भागे के सुध्द सोन लग बनाय दइस, तब ऊ सोन के पट्टी संदूक के चारो पल्ला लगाइस। 3ऊ उनखर चारठे खूरा के निता सोन के चारठे कडा ढालिन, ओखर अक्ठी पल्ला दुइठे कडा अउ दूसर पल्ला दुइठे कडा। 4ऊ बमूर कर लकरी के डंडा बनाइस अउ उनही सोन लग बनाइस। 5अउ ऊ सन्दूक के दुनो पल्ला के कडन हे डालिस कि उनखर बल लग संदूक उठाय जाय। 6तब ऊ सुध्द सोन लग ढक्कन के बनाइस, हइ ढाई हाथ लम्बा अउ डेढ हाथ चउडा रथै। 7तब बसलेल सोन के पीटके दुइठे करूब कर डेखना बनाइस, ऊ ढक्कन के दुनो छोरन हे करूब लगाइस। 8ऊ अक्ठी करूब कर डेखना अक पल्ला अउ दूसर के दूसर पल्ला लगाइस, करूब कर डेखना के ढक्कन लग अक्ठी बनामै के निता जोड दइस। 9करूबन के पंख उप्पर लग फइले हर बनिन अउ उन पंखन लग पच्छताप के ढकना ढंपे हर बनिस अउ उनखर मुंह अगल-बगल अउ पच्छताप कर ढकै के पल्ला करे हर बनिस।

पवितर टेबुल के बनाइन

(निरगमन 25:23-30)

10तब बसलेल बमूर कर लकरी के टेबुल बनाइस, ओखर लम्बाई दुइ हाथ, चउडाई अक हाथ अउ ऊंचाई डेढ हाथ के रथै। 11ऊ टेबुल के सुध्द सोन लग बनाइस, ऊ सोन के सजावट टेबुल के चारो पल्ला करिस। 12तब ऊ टेबुल के चारो पल्ला चार आंगुर चउडा अक्ठी पटरी बनाइस, अउ हइ पटरी कर निता चारो चउगिरदा सोना कर अक्ठी झालर बनाइस। 13तब ऊ टेबुल के निता चारठे सोन के कडा लगाइस, ऊ तरी के चारो कोनन हे सोना के चारठे कडा लगाइस, हइ उहै-उहै रथै जिहां चारठे गोड रथै। 14उन कडा पटरी के लिघ्घो रथै, कडन हे ऊ बल्ली रथै जउन टेबुल के लइ जाय के निता काम आथै। 15ऊ टेबुल के उठामै के निता बमूर कर लकरी के डंडा बनाइस अउ उनही सोन लग मढिस। 16तब ऊ उन चीजन के बनाइस जउन टेबुल हे काम आथै, ऊ तस्तरी, चम्मच, परात अउ पानी जउन भेंटन के निता निस्तार हे आमै बाले गघरी बनाइस, हइ सगलू चीज सुध्द सोन लग बनाय गय रथै।

सोन कर दिया बनाय जथै

(निरगमन 25:31-40)

17ऊ सुध्द सोन कर अक्ठी दीया बनाइस, ऊ दीया के पाइस अउ डन्डी सोन ढालके बनाइस, ओखर फूल कर डन्डी गांठी अउ फूल धातु कर अक्ठी खन्डा लग बनाइस। 18ओखर छय साखा रथै, दीया कर अक पल्ला तीनठे साखा अउ दूसर पल्ला तीनठे साखा निकरे हर रथै। 19हर अक्ठी साखा हे सोन के तीनठे फूल रथै, हइ फूल बादाम के फूल के जसना बने रथै, ओहमा फूल अउ पंखुडिया1 रथै। 20दीया कर डन्डी हे सोन कर चारठे फूल रथै, उनो फूल अउ पंखुडिया सहित बादाम कर फूल के जसना बने रथै 21अउ दीवट के निकरे हर छयठे डगइल मसे दुइ-दुइठे डगइल के तरी अक-अक्ठी गांठ दीवट के संग अक्ठिन खन्डा के बने रथै। 22गांठ अउ डगइल सगलू परभिटिया के संग अक्ठिन खन्डा के बनिस, सगलू परभिटिया गढे हर सुध्द सोन के अउ अक्ठिन खन्डा के बनिस। 23अउ ऊ परभिटिया के सातठे चिमनी अउ गुलतरास अउ चिमटा सुध्द सोन के बनाइन। 24ऊ सगलू समान सहित परभिटिया के लगभग चउतीस किलोगराम के सुध्द सोन के बनाइन।

हूमन जलामै के बेदी

25फेर ऊ बमूर कर लकरी के हूमन जलामै के बेदी बनाइस, जेखर लम्बाई अक हाथ अउ चउडाई अक हाथ के रथै, अउ चउकोर बनिस अउ ओखर ऊंचाई दुइ हाथ के रथै, अउ ओखर सींग ओखर संग बिगर जोड के बने रथै। 26उप्पर बाले हिस्सा अउ चारो पल्ला के बगल अउ सींगन सहित ऊ उस बेदी के सुध्द सोन लग मढिस अउ ओखर चउगिरदा पल्ला सोन के अक्ठी कोर बनाइस। 27अउ ऊ कोर के तरी ओखर दुनो बाट हे ऊ सोन के दुइ कडा बनामै जउन ओखर उठामै के डन्डा के जिघा के काम दे। 28अउ डन्डन के ऊ बमूर कर लकरी के बनाइस अउ सोन लग मढिस।

हूमन अउ अभिसेक कर तेल के बनाइन

(निरगमन 30:22-38)

29ऊ अभिसेक के पवितर तेल अउ महकैबाले तेल के हूमन सुगन्धित मेर के जसना बनाइस।