निरगमन 36

1“बसलेल अउ ओहोलीआब अउ सब दिमाक बाले मनसे जिनही भगवान असना दिमाक अउ समझ दय होय कि ऊ भगवान के सगलू आदेस के जसना पवितर जिघा के सेबा के निता सबैमेर के काम करै के जानै, ऊ सगलू हइ काम करै।”

मनसेन दवारा बोहत जादा दान

2मूसा बसलेल अउ ओहोलीआब अउ उन दिमाक बाले मनसेन के बुलाइस, जिनखर हिरदय हे यहोबा दिमाक अउ समझ भरे रथै अउ उन मनसेन के जिनखर हिरदय बदले हर रथै, कि ऊ लिघ्घो आयके काम करै। 3उन मूसा कर हाथ लग सगलू अपन इक्छा कर बलि स्बीकार करिन, जेखर इस्राएली पवितर जिघा के निरमान काम के निता लाय रथै, पय मनसे हर रोज सुबेन्ने मूसा के लिघ्घो अपन इक्छा लग दान लउत रहै। 4अउ जेतका दिमाकदार मनसे पवितर जिघा के काम करथै ऊ सगलू अपन-अपन काम छांडके मूसा कर लिघ्घो आइन। 5अउ उन मूसा लग कथै, “जउन काम के करै के आदेस यहोबा दय हबै, ओखर निता जेतका चीज चाही, ओखर लग जादा चीज मनसे लाउत हबै।” 6तब मूसा सगलू तम्बू हे हइ आदेस के परचार करवाइस, “का डउका, का डउकी, कउनो पवितर जिघा के निता अउ दान झइ लामै।” हइ मेर मनसे अउ दान लामै लग रुक गइन। 7काखे सगलू काम बनामै के निता जेतका चीज जरूरी रथै, ओखर लग जादा बनामै बाले के लिघ्घो आय चुके रथै।

परभु कर उपस्थिति के तम्बू बनाइन

(निरगमन 26:1-37)

8काम कराइया हे सगलू दिमाकदार काम कराइया दसठे परदन के अक्ठी रहै बाले जिघा बनाइस, हइ परदा पातर सूतरी लग बने हर नीला, बैगनी अउ लाल रंग कर कपडा के रथै, उनखर उप्पर खुसी लग करूब दूत कर चितर के कढाई करे गय रथै। 9हर परदा कर लम्बाई अट्ठाइस हाथ अउ चउडाई चार हाथ के रथै, सगलू परदा एक्कै नाप के रथै। 10बसलेल पांचठे परदन के अक-दूसर लग जोडथै, इहैमेर बचे हर पांचठे परदन के अक-दूसर लग जोडथै। 11अउ जिहां हइ परदा जोडे गइस उहां कर दुनो छोरन हे ऊ नीला-नीला फंदा लगाइस। 12ऊ दुनो छोरन हे पचास-पचास फंदा हइ मेर लगाइस कि ऊ अक दूसर के आगू रथै। 13ऊ सोन कर पचासठे हुक बनाइन अउ जुडे हर परदन के हइ हुक के दवारा जोड दइस, हइ मेर पूर रहै के जिघा अक्ठी बन गइस। 14फेर रहै के उप्पर तम्बू के निता ऊ छेडी कर चूंदी के ग्याराठे परदा बनाइस। 15अक-अक्ठी परदन के लम्बाई तीस हाथ अउ चउडाई चार हाथ के हुइस अउ ग्याराठे परदा अक्कै नाप के रथै। 16इन मसे ऊ पांचठे परदा अगले अउ छयठे परदा अगले जोड दइस। 17अउ जिहां दुनो जोडे गइस उहां के छोरन हे ऊ पचास-पचास फंदा लगाइस। 18ऊ परदन के जोडै के निता पीतर कर पचासठे छल्ला बनाइस जेखर लग पूरा तम्बू अक हुइ जाय। 19तम्बू के निता लाल रंग लग रंगे हर गेडरन के खलरी के अक्ठी ओढना बनाइन अउ फेर ओखर उप्पर लगामै के निता सेही के खलरी के अक्ठी अउ ओढना बनाइन। 20फेर पवितर जिघा के ठाढ करै के निता बमूर कर लकरी के तखथा बनाइन। 21हर तखथा कर लम्बाई दस हाथ अउ चउडाई डेढ हाथ के रथै। 22तखथा के जोडै के निता दुइठे अक जसना चुल्हवा रथै, पवितर जिघा के सगलू तखथा इहैमेर बनवाइस। 23ऊ रहै के निता तखथन के इहैमेर लग बनवाइस कि दक्खिन के पल्ला बीस तखथा लगिस। 24अउ हइ बीस तखथा के तरी चांदी के चालिसठे खुरसी मतलब अक-अक्ठी तखथा के तरी ओखर दुइठे चुल्हवा के निता ऊ दुइ खुरसी बनाइस। 25अउ निबास के दूसर पल्ला, मतलब उत्तर के पल्ला के निता ऊ बीसठे तखथा बनाइस। 26ऊ हर अक्ठी तखथा के तरी दुइठे लगै बाले चांदी कर चालिसठे आधार बनाइस। 27अउ निबास के पाछू पल्ला मतलब कि दिन बुडती के पल्ला के निता ऊ छय तखथा बनाइस। 28अउ पाछू कर भाग हे निबास बाले जिघा के कोना के निता ऊ दुइठे तखथा बनाइस। 29ऊ तरी अलगे-अलगे रथै पय उप्पर पहिलेन कडा हे मिलाय गइस, ऊ उन दुनो तखथा के जसना ओसनेन बनाइस। 30हइ मेर आठठे तखथा हुइन अउ उनखर चांदी कर सोलाठे खुरसी हुइस, मतलब अक-अक्ठी तखथा के तरी दुइ-दुइ खुरसी हुइस। 31फेर ऊ बमूर कर लकरी के छड बनाइस मतलब रहै के अक्ठी पल्ला के तखथा के निता पांचठे छड, 32दूसर पल्ला तखथन के निता पांचठे अउ पस्चिम के पल्ला रहै के भाग के तखथन के निता पांचठे। 33ओहमा बीच के कडा असना तम्बू बनाइस जउन तखथा मसे अक दूसर लग हुइके अक दूसर तक जथै। 34अउ तखथन के ऊ सोन लग बनाइस, अउ बेडन के घर के काम देय बाले कडन के सोन के बनाइस अउ बेडन के सोन लग बनाइस। 35फेर ऊ नीला, बैगनी अउ लाल रंग के कपडा के, अउ बटे हर हल्का सनीबाले कपडा के बीचबाले परदा बनाइस, ऊ कढाई के काम करे हर करूब दूत के संग बनिस। 36ऊ ओखर निता बमूर कर लकरी के चारठे खम्भा बनाइस, अउ उनके सोन लग बनाइस, उनखर हुक सोन के रथै, ऊ उनखर निता चांदी के चारठे खुरसी ढालिस। 37ऊ तम्बू के दूरा के निता नीला, बैगनी अउ लाल रंग के कपडा के अउ बटे हर पातर सन के कपडा कढाई के काम करे हर परदा बनाइस। 38तब ऊ हइ परदा के निता पांचठे खम्भा अउ उनखर निता हुक बनाइस, ऊ खम्भा के सिरन अउ परदन के छडन के सोन लग बनाइस अउ ऊ पीतर के पांचठे खुरसी बनाइस।