निरगमन 35

सुस्ताय रोज के मानैके

1मूसा सगलू इस्राएली मनसे के मंडली हे अकजुट करिस अउ उनखर लग कथै, “यहोबा इन कामन के करै के आदेस तुमके दय हबै, ऊ हइ हबै। 2छय रोज तक काम धंधा करा, पय सतमा रोज यहोबा के पवितर दिन मानिहा, जउन मनसे ऊ रोज काम करही, उके मिरतू के सजा दय जही। 3पय सुस्ताय कर रोज तुम अपन घर हे आगी, चुल्हुवा तक नेहको जलइहा।”

पवितर तम्बू के निता बलि

(निरगमन 25:1-9)

4फेर मूसा इस्राएलिन के सगलू मंडली लग कथै, “जउन बात के आदेस भगवान दय हबै ऊ हइ हबै।” 5तुम्हर लिघ्घो लग ओखर निता बलि लइ जाय मतलब जेतका अपन इक्छा लग देय चाहै ऊ भगवान के बलि करके हइ चीज लइ आमै, मतलब सोन, चांदी, पीतर, 6नीला, बैगनी अउ लोहित रंग के कपडा पातर सूत लग बने हर कपडा, छेडी कर चूंदी, 7गेडरा कर लाल रंग खलरी, सुइसो के खलरी, बमूर कर लकरी, 8उजियार देय के निता जैतून कर तेल, अभिसेक कर तेल अउ घांम के निता महकैबाले मसाले, 9फेर एपोद अउ कवच के निता सुलेमानी मडि अउ जडै के निता मडि।

निवास जिघा कर कइनमेर चीज

(निरगमन 39:32-43)

10“तुम मसे जेतका हिरदय हे बुध्दि हे कुसल कर उजियार हबै ऊ सगलू आयके जउन-जउन चीज के आदेस भगवान दय हबै ऊ सगलू बनाइस।” 11पवितर तम्बू, एखर बाहिर तम्बू अउ एखर आड, छल्ला, तखथा, पटिया, खम्भा अउ आधार, 12अउ एखर बल्लियां अउ प्रायचित कर ढेक्कन अउ सन्दूक रखै जाय के जिघा के ढाकै के निता परदा, 13मेज अउ एखर डंडा टेबुल हे रहै बाले सगलू चीज अउ मेज हे रखै जाय बाले खास रोटी। 14उजियार के निता निस्तार हे आमै बाले परभिटिया अउ ऊ सगलू चीज जउन मोमबत्ती के संग होथै, मतलब दिया अउ उजियार के निता तेल, 15धूप जलामै के निता बेदी अउ एखर बल्ली अभिसेक कर तेल अउ सुगन्धित धूप, मिलापबाले तम्बू के परवेस दूरा के ढांकै बाले परदा, 16चढामै बाले बलि के निता बेदी अउ एखर कांसन के जाली, डंडा अउ बेदी हे निस्तार हे आमै बाले सगलू चीज, कांस के परांत अउ एखर आधार, 17अंगना के चउगिरदा पार परदा अउ उनखर खम्भा अउ आधार अउ आंगन के परवेस दूरा के ढकै बाले परदा, 18अंगना अउ तम्बू के सहारा के निता निस्तार हे आमै बाले खूंटी अउ खूंटी लग बांधै बाले डोरा, 19अउ खासकर के बने हर कपडा जिनके याजक पवितर जिघा हे पेहरहिन, हइ बिसेस कपडा याजक हारून अउ ओखर टोरवन के पहिरै के निता हबै, ऊ हइ कपडा के तब पेहरहिन जब उन याजक के रूप हे सेबा कर काम करहिन।

मनसेन दवारा दान लानिन

20तब इस्राएल के सगलू मनसे मूसा के लिघ्घो लग कढ गइन। 21सगलू मनसे जउन-जउन दान मिलापबाले तम्बू के बनामै, तम्बू के सगलू चीजन अउ बिसेस कपडा बनामै के काम हे लाय गइस। 22सगलू डउकी अउ डउका जउन चढामै चाहथै, हर मेर के अपन सोन के गहना लाइन, उन चिमटी कान के बाली, मुदरी, अउ कइमेर गहना लइके आइन, उन अपन सगलू सोन के गहना भगवान के चढाइन, हइ भगवान के बिसेस दान रथै 23हर मनसे जेखर लिघ्घो सन के निक्खा रेसम, नीला, बैगनी अउ लाल कपडा रथै ऊ इनके भगवान के लिघ्घो लाइन, ऊ मनसे जेखर लिघ्घो छेडी कर चूंदी, लाल रंग लग रंगी गेडरा कर खलरी, सेही कर खलरी रथै उके ऊ भगवान के लिघ्घो लइ आनिन। 24जउन मनसे चांदी अउ पीतर के दान चढा सकथै, उन यहोबा कर निता दान के रूप हे लाइन, जउन कउनो के लिघ्घो सेबा हे आमैबाले बमूर कर लकरी रथै, ऊ ओही लाइन। 25हर अक डउकिन के हरदय हे खुसी के उजियार रथै, उन अपन हाथन लग सूत के काटिन, ऊ नीला, बैगनी अउ लाल रंग के पातर सूत काटके लइ आनिन। 26जेतका डउकिन के मन हे असना खुसी के उजियार रथै उन छेडी कर चूंदी के काटिन। 27सियान मनसे एपोद अउ कवच के निता सुलैमानी मडि अउ जडै के निता मनि, 28मनसे मसाले अउ तेल लाइन, हइ चीज सुगन्धित धूप अभिसेक कर तेल अउ चिमनी कर तेल के निता निस्तार हे आइस। 29इस्राएल के उन सगलू मनसे जेखर मन हे आदेस मिलिस भगवान के निता दान दइन, हइ दान मुफ्त भाव लग दय गइस, मनसे इनके दइन काखे उन देय के चाहथै, हइ दान उन सगलू चीजन के बनामै के निता निस्तार हे आइस जिनके भगवान मूसा अउ मनसे के बनामै के आदेस दय रथै।

मिलापबाले तम्बू के निता कारीगर

(निरगमन 31:1-11)

30तब मूसा इस्राएल के मनसेन लग कथै, “देखा, भगवान बसलेल के चुने हबै जउन ऊरी कर टोरवा अउ हूर के नाती हबै, यहूदा परवार समूह के हबै। 31भगवान बसलेल के सक्ति लग भर दइस मतलब बसलेल के हर मेर के काम करै के खास परिपून अउ ग्यान दइस। 32ऊ सोन, चांदी अउ पीतर के चीजन के बिना गढ के उनके बनाय सकथै। 33जडै के निता मडि काट सकै, लकरी हे खुदाई कर सकै, अउ दूसर सिल्प के कामो कर सकै। 34फेर भगवान ओखर मन हे अउ दान के कुर बाले अहीसामाक कर टोरवा ओहोलीआब के मन हे सिक्छा देय के सक्ति दय हबै। 35भगवान इन दुनो मनसे के सगलू मेर के काम करै के बिसेस परिपूनता दय रखे हबै, ऊ लकरी कर काम अउ कारीगर के काम करै के परिपूनता रखथै, ऊ नीला, बैगनी अउ लाल कपडा अउ सन के निक्खा रेसम हे चितर के काढके उनके सी सकथै अउ ऊ ऊन लग चीजन के बनाय सकथै।”