निरगमन 34

पथरा कर नबा पटिया

(बेवस्थाबिबरन 10:1-5)

1फेर यहोबा मूसा लग कथै, “तै पहिला पटिया के जसना पथरा के दुइठे पटिया खोद, मै उनखर उप्पर उहै सब्द लिखिहों जउन पहिला पथरा हे लिखे रथै, जिनके तै खंडा-खंडा कर दय रथस। 2तै कल सकरहा तइयार रहबे अउ अंधियरहेन सीनै डोंगर हे चढके ओखर इटिल्ली हे मोर आगू ठाढ होबे। 3कउनो मनसे तोर संग उप्पर झइ चढै, सगलू डोंगर हे मनसे दिखाई झइ दे, छेडी-गेडरा, गोरू-बइला ऊ डोंगर के लिघ्घो झइ चराय जाय।” 4मूसा पहिला पटिया के जसना पथरा के दुइठे पटिया खोदिस, ऊ सुबेन्नेन उठिस, जसना यहोबा उके आदेस दय रथै, उहै के जसना ऊ अपन हाथ हे पथरा के दुइठे पटिया लइके सीनै डोंगर हे चढ गइस। 5तब भगवान बादर लग उतरके ओखर संग उहां ठाढ हुइके भगवान नाम के घोसना करिस। 6यहोबा ओखर आगू लग निकडिस अउ ऊ घोसना करत कढ गइस, “यहोबा, यहोबा, ऊ दयालु अउ अनुगरह करै बाले, देरी लग गुस्सा करै बाले, बोहत जादा करुना करै बाले, सत्य के भगवान हबै। 7ऊ हजारन पीढी हे करुना करै बाले, बेकार काम, अपराध अउ पाप के छमा करै बाले हबै, पय ऊ दोसी के कउनो मेर निरदोस सिध्द नेहको करही, ऊ पुरखन के बेकार काम के सजा तीसर अउ चउथा पीढी तक उनखर लरकन अउ आमैबाले लरकन के देय बाले हबै।” 8तब मूसा हरबी भुंइ हे निहुरके आराधना करिस। 9अउ मूसा कथै, “हे यहोबा, अगर तोर अनुगरह के नजर मोर उप्पर होय ता यहोबा हमर बीच हे हुइके चल, हइ मनसे ढीठ तो हबै, तउभरमा हमर बेकार काम अउ पाप के छमा कर अउ हमके अपन निज भाग मान के स्बीकार कर।”

टीमा के दोहराइस

(निरगमन 23:14-19; बेवस्थाबिबरन 7:1-5; 16:1-17)

10तब भगवान कथै, मै तुम्हर सगलू मनसेन के संग हइ टीमा बांधथो, मै असना चकित के काम करिहों जसना ई भुंइ हे कउनो दूसर देस के निता पहिले कबहुन नेहको करों, तुम्हर संग सबलू मनसे देखहिन कि मै भगवान बोहत बडा हव, मनसे चकित के काम के देखहिन जउन मै तुम्हर निता करिहों। 11जउन आदेस मै आज तुमके देथों उके तुम माना, देखा, मै तुम्हर आगू लग एमोरी, कनानी, हित्ती, परिज्जी, हिव्वी अउ यबूसी, मनसेन के निकालहूं। 12इहैनिता साचेत रहा कि जउन देस हे तै जाय बाले हबस ओखर निबासी लग टीमा झइ बांधबे, कहुं असना झइ होय कि ऊ तोर निता फंदा बन जाय। 13पय तै उनखर बेदी के टोर डालबे, उनखर पवितर खम्भा के गिराय देबे, उनखर असेरा कर मूरती के खम्भा के काट डारबे। 14काखे कउनो दूसर मूरती के आराधना झइ करिहा, मै जलन रखै बाले भगवान हव, हइ मोर नाम हबै, मै जर उठै बाले भगवान हव।1 15असना झइ होय कि तै ऊ देस के मनसेन लग टीमा बांध, असना झइ होय कि जब ऊ अपन भगवान कर आराधना करै अउ उन बेसिया के जसना बेउहार करै, अपन देबी के बलि चढामै अउ कउ तोके बुलामै तब तै उनखर बलि के गोस खास। 16तै अपन टोरवन के काज करै के निता उनखर टोरियन के झइ स्बीकारबे, असना झइ होय कि उनखर टोरिया अपन देबी देउता के आराधना करै अउ बेसिया के जसना बेउहार करै अउ असना बेउहार तुम्हर टोरवन लग करवामै कि उन उनखर देबी के आराधना करै। 17तै अपन निता देबी देउता के मूरती झइ बनाबे। 18“तै अखमीरी रोटी के तेउहार मनाबे, मोर दय हर आदेस के जसना सात रोज तक अखमीरी रोटी खा, इके ऊ महिना हे करा जिही मै चुने हव, आबीब के महिना, काखे हइ उहै महिना हबै जब तै मिस्र देस लग बाहिर आय रथा।”2 19कउनो डउकी के पहिला लरका हरमेसा मोर हबै, पहिला जानबर जउन तुम्हर पसु, छेडी या गेडरा लग पइदा होथै, मोर हबै।3 20तै गदहा के पहिला छउना के बलि दइके छांडय लेबे, अगर तै उके नेहको छंडाबे ता ओखर नटेरी के टोर देबे, तै अपन टोरवा के पहिला लरका के जरूर छंडाबे, कउनो मनसे जूंछे हाथ मोके अपन मुंह नेहको देखइहा।4 21तै छह रोज तक मेहनत करबे, पय सतमा रोज सुस्ताबे, तै नांगर जोतत अउ फसल काटत टेम सुस्ताय कर रोज मानबे।5 22तै गोहूं के नबा फसल के टेम हफ्ता के तेउहार अउ साल के आखरी हे बटोरन के तेउहार बनाबे।6 23साल हे तीन बेर तोर सब इस्राएल के डउका यहोबा भगवान के अपन मुंह दिखामै। 24काखे मै दूसर देस के तोर आगू लग निकारके तोर इलाका के बढाहुं अउ जब तै अपन भगवान के अपन मुंह दिखामै के निता साल हे तीन बेर आय करबे, तब कउनो तोर जमीन के लालच नेहको करहिन। 25“तै मोर पसुबलि के खून खमीरी रोटी के संग झइ चढाबे, तै फसह के तेउहार पसुबलि सुबेन्ने तक झइ छांडबे। 26तै अपन जमीन के पहिले फडुहा मसे सब लग निक्खा अपन यहोबा भगवान के घर हे लाबे, तै छेडी कर छउना के ओखर दाय के दूध हे झइ पकाबे।”7 27तब भगवान मूसा लग कथै, “हइ बचन लिख ले, काखे इन बचन के जसना मै तोर अउ इस्राएल के संग टीमा बांधे हव।” 28मूसा उहां यहोबा के संग चालीस दिन अउ चालीस रात रहिस, न ऊ रोटी खाइस अउ न पानी पीस, मूसा बेवस्था के बात, मतलब दस आदेस पटिया हे लिख लइस।

मूसा सीनै डोंगर लग तरी उतरथै

29तब मूसा सीनै डोंगर लग तरी उतरिस, ऊ भगवान के दुनों पथरा के गवाह के पटिया के संग लाइस, जेखर उप्पर भगवान के नियम लिखे रथै, मूसा के मुंह हे चमक रथै, काखे ऊ भगवान लग बात करे रथै, पय मूसा हइ नेहको जानथै कि ओखर मुंह हे उजियार हबै। 30हारून अउ इस्राएल के सगलू मनसे देखिन कि मूसा के मुंह चमकथै, इहैनिता ऊ ओखर लिघ्घो जाय लग डरथै। 31तब मूसा उनके बुलाइस अउ हारून मंडली के सगलू सियान ओखर लिघ्घो आइन अउ मूसा उनखर लग बात करिस। 32ओखर बाद इस्राएल के सगलू मनसे मूसा के लिघ्घो आइन, अउ मूसा उनके ऊ आदेस दइस जउन भगवान सीनै डोंगर हे उके दय रथै। 33जब मूसा बात करै के खतम नेहको करिस तब तक ऊ अपन मुंह के अक्ठी कपडा लग ढांके रथै। 34जब कबहुन मूसा भगवान के आगू बात करै जथै ता कपडा के हटाय लेथै, तब मूसा बाहिर आथै अउ इस्राएल के मनसेन के ऊ गुठेथै, जउन भगवान के आदेस होथै। 35इस्राएल के मनसे मूसा के मुंह के देखथै, कि ऊ परकास हबै, जब तक मूसा भित्तर यहोबा कर संग बात करै के नेहको जथै, तब तक अपन मुंह हे कपडा डाले रथै।8