निरगमन 33

यहोबा इस्राएल के सीनै डोंगर के छांडै के आदेस

1भगवान मूसा लग कथै, रेंग चल, “तै अउ उन मनसे जिनके तै मिस्र देस लग निकार लाय हबस, इहां लग ऊ देस छो जाय जेखर बारे हे मै अब्राहम, इसहाक अउ याकूब लग हइ किरिया खाय रथो, मै उके तोर वंस के देहुं।”1 2“मै तोर आगू-आगू अक्ठी दूत के पठोहुं, मै ऊ देस के कनानी, एमोरी, हित्ती, परिज्जी, हिब्बी अउ यबूसी मनसेन के निकाड दइहों। 3इहैनिता ऊ परदेस छो जा जउन बोहत निक्खा चीजन लग भरे हबै2, पय मै तुम्हर संग नेहको जइहों, तुम मनसे बडा जिद्दी हबा, अगर मै तुम्हर संग गयों ता मै तुमके रास्ता हे नास कर देहुं।” 4जब मनसे हइ बेकार खबर सुनिन तब उन बोहत जादा रोथै, एखर बाद मनसे सोन, चांदी नेहको पहनिन। 5उन सोन, चांदी नेहको पहनिन काखे भगवान मूसा लग कथै, “इस्राएल के मनसेन लग कहि दे, तुम जिद्दी मनसे हबा, अगर मै तुम्हर संग चुटु टेम के निता यातरा करिहों ता मै तुमके नास कर देहुं, इहैनिता अपन सगलू सोन, चांदी उतार लेया, तब मै फइसला करिहों कि तुम्हर संग काहिन करों।” 6इहैनिता इस्राएली मनसे होरेब सीनै डोंगर हे अपन सगलू सोना चांदी उतार लइन।

परभु के उपस्थिति कर तम्बू

7मूसा मिलापबाले तम्बू के जिघा लग कुछ दुरिहा लइ गइस, उहां ऊ उके लगाइस अउ ओखर नाम “मिलापबाले तम्बू” रखिस। कउ मनसे जउन भगवान लग कुछ जानै चाहथै उके जिघा के बाहिर मिलापबाले तम्बू तक जाय के होथै। 8जब-जब मूसा बाहिर तम्बू के लिघ्घो जथै, तब सगलू मनसे ठाढ हुइ जाय करथै, जब तक ऊ तम्बू के भित्तर नेहको कढ जथै, तब तक सब मनसे अपन तम्बू के दूरा हे ठाढ रथै अउ उनखर पल्ला देखत रथै। 9जब मूसा तम्बू हे भित्तर जथै तब बादर के खंम्भा तरी छो उरतथै, अउ तम्बू के दूरा हे ठाढ हुइ जथै, हइ मेर परभु मूसा लग बात चीत करे करथै। 10जब मनसे तम्बू के दूरा हे उतरत ठाढ देखथै, तब उन सब उठके अपन-अपन तम्बू दूरा लग झुक के परनाम करथै। 11जसना कउनो मनसे अपन दोस लग सामनिक-सामना बात करथै, ओसनेन यहोबा मूसा लग बात चीत करथै, जब मूसा तम्बू छो लउटथै तब उनखर निजी सेबक नून कर टोरवा जबान यहोसू, तम्बू लग नेहको निकरे करथै।

भगवान के उपस्थिति कर बचन

12मूसा यहोबा लग कथै, देख, तै मोर लग कथस, “हइ मनसेन के लइ जा” पय तै मोके नेहको गुठेय कि केही मोर संग पठोबे, तै मोर लग कथस, “मै तोके अच्छी तरह लग जानथो अउ मै तोर लग खुस हव।” 13अगर तोके मै सहीमा खुस करे हव, ता तै अपन निरनय मोके गुठे, तोके मै सहीमा जानथो, तब मै तोर लग लगेतार खुस रख सकथो, देख हइ सगलू तोर मनसे आय। 14भगवान कथै, “मै खुद तुम्हर संग चलिहों, मै तुमके अराम दइहों।” 15तब मूसा ओखर लग कथै, “अगर तै हमर संग नेहको चलिहे ता तै हइ जिघा लग हमके इहां लग उप्पर झइ लइ जा। 16हमु हइ कइसन जानी कि तै मोर लग अउ इनखर लग खुस हबस? अगर तै हमर संग नेहको जथस ता मै अउ हइ तोर परजा भुंइ के दूसर मनसे लग अगले नेहको हुइहिन।” 17तब भगवान मूसा लग कथै, “मै उहै करिहों जउन तै कइहे, मै हइ करिहों काखे मै तोर लग खुस हव, मै तोके नाम लग जानथो।” 18तब मूसा भगवान लग बिनती करथै, “कि अब मोके अपन महिमा देखा।” 19तब भगवान जबाब दइस, मै अपन पूर भलाई के तोर तक जाय देहुं, मै भगवान हव अउ मै अपन नाम के घोसना करिहों जेखर लग तै उके सुन सकस, मै उन मनसे के उप्पर किरपा अउ माया दिखाहुं जिनही मै चुनिहों। 20पय तै मोर मुंह नेहको देख सकथस, कउनो मनसे मोके नेहको देख सकथै अउ अगर देख लइहीं ता जिन्दा नेहको रह सकथै। 21यहोबा कथै, “देख, मोर लिघ्घो अक्ठी जिघा हबै, जिहां तै पटपड हे ठाढ होबे। 22जब तब मोर महिमा तोर आगू लग नेहको कट जही तब तक मै तोके पटपड के दरार हे रखिहों, जब तक मै तोर लिघ्घो लग निकर नेहको जांव, तब तक मै तोके अपन हाथ लग ढंकिहों। 23तब मै अपन हाथ हटाय लेहुं अउ तै मोर पिठार बस के देख पाबे, पय तै मोर मुंह नेहको देख पाबे।”