निरगमन 32

सोन कर रकरा

(बेवस्थाबिबरन 9:6-29)

1जब मनसे देखथै कि मूसा डोंगर लग उतरै हे देरी करथै तब उन हारून कर लिघ्घो अकजुट हुइन, उन कथै, “देख, मूसा हमके मिस्र देस लग बाहिर निकाडिस, पय हम हइ नेहको जानथन कि ओखर संग का घटे हबै, इहैनिता कउनो देवता हमर आगू चलै अउ हमके आगू लइ जाय बाले बनै।”1 2हारून उनखर लग कथै, “जउन सोन कर बाली तुम्हर डउकी, टोरवा अउ टोरिया के कानन हे हबै, उनके उतारके मोर लिघ्घो लाबा।” 3तब सबझन उन कान के बाली अकजुट करिन अउ उनके हारून के लिघ्घो आनिन। 4हारून मनसेन लग सोन लइस अउ अक्ठी रकरा के मूरती बनामै के निता ओखर निस्तार करिस, हारून मूरती बनामै के निता मूरती के आकार दे बाले अक्ठी हथियार के निस्तार करिस, तब इके ऊ सोन लग बनाइस। तब मनसे कथै, “इस्राएल के मनसे हइ तुम्हर ऊ देवता हबै जउन तुमके मिस्र देस लग बाहिर लइ आनिस।”2 5हारून ई चीजन के देखिस, इहैनिता ऊ रकरा कर लिघ्घो अक्ठी बेदी बनाइस, तब हारून घोसना करिस, “कल यहोबा के निता बिसेस तेउहार होही।” 6अगले रोज सकरहा हरबी उठ गइन, उन पसुन के मारिन अउ होमबलि अउ मेलबलि चढाइन, मनसे खाइन पीइन अउ खेलै लगिन।3 7तब यहोबा मूसा लग कथै, “जा, तरी कढ जा, तोर मनसे जिनही तै मिस्र देस लग निकार लाय हबस, उन बोहत बिगड गय हबै।” 8जउन रास्ता हे चलै के निता मै उनके आदेस दय रथो, उन एतका हरबी बहक गय हबै, उन अपन निता रकरा के मूरती बनाय हबै, उन ओखर आराधना करिन, ओही बलि चढाइन अउ कथै “ओ इस्राएली मनसे हइ हबै तुम्हर भगवान, जउन तोके मिस्र देस लग निकार के लाय हबै।” 9फेर यहोबा मूसा लग कथै, “मै इन मनसेन के देखे हव, मै जानथों कि इन बडा कठोर मनसे हबै।4 10अब मोके झइ रोक, मोर गुस्सा उनखर उप्पर भडक उठे हबै, जेखर लग मै उनके नास करिहों, पय तोर लग बडा देस बनइहों।” 11मूसा अपन भगवान यहोबा कर गुस्सा सान्त करत ओखर लग बिनती करिस, “हे यहोबा, तोर गुस्सा अपन परजा हे काखे भडके हबै, जेखर लग तै बडा सक्ति अउ बलवान के दवारा मिस्र देस लग निकार लाय हवस?” 12मिस्र देस के रहैबाले काखे हइ बात कहै, कि तै उनके बेकार उदेस्य लग डोंगर हे उनखर बलि चढामै के निता भुंइ लग उनके मिटा डालै के निता मिस्र देस लग निकार लाय रथै? पय अपन गुस्सा के सान्त कर अउ अपन मनसे के हानि करै के छांड दे। 13अपन दास अब्राहम, इसहाक अउ इस्राएल के सुरता कर, जिनखर लग तै खुद अपन किरिया खाय रथस अउ उनखर लग कहे रथस, “मै तुम्हर वंस के बादर के तराइयां के जसना अनगिनत करिहों, मै हइ सगलू देस जेखर टीमा मै करे रथो, तोर वंस के दइहों, उन उनखर उप्पर हरमेसा बारिसदार हुइहिन।” 14तब भगवान अपन मनसेन के जउन हानि करै बाले रथै, ओही सोचिस अउ पछताइस।5 15तब मूसा डोंगर लग तरी उतरिस, मूसा के लिघ्घो आदेस बाले दुइठे सलेट कर पथरा रथै, हइ आदेस पथरा के आगू अउ पाछू दुनो पल्ला लिखे हर रथै। 16भगवान खुद उन पथरन के बनाय रथै अउ भगवान खुदै उन आदेसन के उन पथरन हे लिखे रथै। 17जब ऊ डोंगर लग उतरथै तब यहोसू मनसेन के हल्ला-गुल्ला के आरो सुनथै, यहोसू मूसा लग कथै, “तरी तम्बू हे झगडा के जसना सुनाई देथै।” 18मूसा जबाब देथै, “हइ सेना के जीत के निता आरो नेहको आय, हइ हार लग चिल्लामै बाले सिपाही के आरो नेहको आय, मै जउन आरो सुनथो ऊ गाना के आय।” 19मूसा तम्बू कर लिघ्घो आइस, ता ऊ सोना के रकरा अउ मनसेन के नाचत देखथै, मूसा बोहत गुस्सा हुइ गय अउ ऊ अपन हाथ लग पथरा के तरी दचक के टोर डालिस। 20जउन रकरा उन बनाय रथै, ओही लइके आगी हे झपोय दइस, ओही पीसके चूर-चूर कर दइस अउ ओही पानी हे फटक दइस, अउ इस्राएलिन मनसेन के उके पियाय दइस। 21तब मूसा हारून लग कथै, “इन तोर संग काहिन करे रथै, जउन तै उनही असना बडा भयंकर पाप हे फंसाय?” 22हारून जबाब देथै, “हे गुरू, तै गुस्सा झइ हो, तै खुद इनके जानथस कि इन बुराई करै हे हरमेसा तइयार रथै।” 23उन मोर लग कथै, “हमर निता असना देवता बना, जउन हमर आगू-आगू चलै, काखे हम नेहको जानथन मूसा के, जउन हमके मिस्र देस लग निकार के लाय हबै, ओखर संग काहिन घटै हबै?”6 24तब मै इनखर लग कहे रथो, “जिनखर लिघ्घो सोन हबै, उन उके उतारके देया।” तब उन मोके दइन, मै उके आगी हे डालो तब हइ रकरा बनके बाहिर निकडिस। 25जब मूसा देखिस कि मनसे संम्भरे नेहको जथै, काखे हारून उनके अपन बैरी के बीच हंसी मजाक के काबिल बनै के निता आजाद छांड दय रथै। 26तब मूसा तम्बू कर दूरा हे ठाड हुइस, ऊ कथै, “कउनो मनसे जउन यहोबा के पल्ला हे हबै ऊ मोर लिघ्घो आबै,” तब सगलू लेवी कुर के मनसे ओखर लिघ्घो अकजुट हुइ गइन। 27मूसा उनखर लग कथै, “इस्राएल के भगवान हइ कथै, तुम्हर मसे हर मनसे अपन कनिहां हे तलबार बांध लेया। तब तम्बू हे घूम-घूमके अक दूरा लग दूसर दूरा हे जायके मनसे के मारै चाहै ऊ ओखर भाई होय या दोस या परोसी।” 28लेवी मूसा कर बात के जसना करिन, ऊ रोज इस्राएली मनसे तीन हजार मारे गय रथै। 29तब मूसा कथै, “यहोबा आज तुमके असना मनसे के रूप हे चुने हबै जउन अपन टोरवा अउ भाई के आसीस दइहिन।” 30दूसर रोज मूसा मनसेन लग कथै, “तुम बोहत बडा पाप करे हबा, पय अब मै भगवान के लिघ्घो उप्पर जायके अउ असना कुछ कर सको, जेखर लग ऊ तुम्हर पाप छमा कर दे।” 31इहैनिता मूसा लउटके भगवान कर लिघ्घो गइस अउ कथै, “किरपा करके सुन, हइ मनसे बोहत बडा पाप करे हबै अउ सोन के अक्ठी देवता बनाय हबै। 32अब तै उनखर पाप छमा कर, अगर तै नेहको करहे ता मै बिनती करथो, तै अपन ऊ जीवन कर किताब मसे मोर नाम काट दे,7 जेही तै लिखे हबस।” 33यहोबा मूसा लग कथै, “जउन मनसे मोर बिरुध्द पाप करे हबै, उनखर नाम मै अपन जीवन कर किताब लग काट दइहों। 34अब तै जायके उन मनसे के ऊ जिघा हे लइ चल जेखर चरचा मै तोर लग करे रथो, देख, मोर दूत तोर आगू-आगू चलही, पय जउन रोज मै सजा देय लगहुं ऊ रोज उनखर हइ भयंकर पाप के सजा देहुं।” 35यहोबा मनसे के बीच महामारी के पठोथै, काखे उन हारून के सोन कर रकरा बनवाइन अउ ओखर सेवा करिन।