निरगमन 31

सिल्पकार

(निरगमन 35:30—36:1)

1फेर यहोबा मूसा लग कथै, 2सुन मै ऊरी कर टोरवा बसलेल के, जउन हूर के नाती अउ यहूदा के कुर के हबै, नाम लइके बुलाथों। 3मै बसलेल के भगवान के आतमा लग भर दय हबै, मतलब मै उके सगलू मेर चीजन के करै के ग्यान अउ पूर कारीगर के संग निपुडता दइ दय हबो। 4कि ऊ असना कारीगर कर नमूना बुध्दि लग निकारै जेखर लग ऊ सोन, चांदी अउ पीतर के बरतन हे बनाय सकै। 5बसलेल सुन्दर रतन के काट अउ जड सकथै, ऊ लकरी कर कामो कर सकथै, ऊ सबैमेर के काम कर सकथै। 6मै ओहोलीआब के चुने हबो, ओहोलीआब दान कबीले के अहीसामाक कर टोरवा हबै, अउ मै दूसर सब होसियारन के असना निपुडता दय हबै कि उन सगलू चीजन के बनाय सकथै, जेही मै तुमके बनामै के आदेस दय हबो। 7मिलापबाले तम्बू गवाह चिट्ठी के सन्दूक के मूंदै बाले छमा बाले ढेक्कन अउ तम्बू के सगलू समान, 8ऊ समान सहित टेबुल अउ सगलू समान समेत सुध्द सोना के दीवट अउ सुध्द धूपवेदी, 9आगीबलि जलामै के निता बेदी अउ बेदी हे निस्तार कर चीज, धोमै बाले बरतन अउ ओखर तरी के पाया, 10याजक हारून के निता सगलू पवितर कपडा अउ ओखर टोरवन के निता सगलू पवितर कपडा, जिनके ऊ याजक के रूप हे सेबा करत टेम पेहरहिन, 11अउ अभिसेक कर तेल अउ पवितर जिघा के निता महकै बाले धूप, हइ सगलू के उन आदेस के जसना बनामै जउन मै तोके दय हव।

सुस्ताय कर रोज

12फेर यहोबा मूसा लग कथै, 13“इस्राएल कर मनसे लग हइ कह, तुम मोर खास सुस्ताय कर रोज बाले नियम के पालन करिहा, तुमके हइ जरूरी करै के हबै, काखे हइ मोर अउ तुम्हर बीच सब पीढी कर निता चिन्हा के रूप रइहिन, एखर लग तुमके पता चलही कि मै मतलब यहोबा तुमके अपन खास मनसे के समूह बनाय हबै। 14तै सुस्ताय कर रोज के मानबे, काखे ऊ तुम्हर निता पवितर रोज हबै। उके अपवितर करै बाले मनसे के जरूर मिरतू कर सजा दय जही, जउन मनसे ऊ रोज कउनो काम करही, ऊ अपन मनसे मसे नास करे जही। 15छय रोज तक काम करे जही, पय सतमा रोज सुस्ताय कर रोज आय, परभु के निता पवितर रोज हबै, जउन मनसे सुस्ताय कर रोज हे काम करही, उके मिरतू कर सजा दय जही।1 16इहैनिता इस्राएली मनसे सुस्ताय कर रोज के मनाही, पय पीढी-पीढी हे ओही सबरोज के टीमा के बारे हे जानके माने करहिन। 17हइ मोर अउ इस्राएली मनसे के बीच ई बात के चिन्हा हबै, कि यहोबा छय रोज हे बादर अउ भुंइ के बनाइस, अउ सतमा रोज सुस्ताइस।” 18हइ मेर भगवान मूसा लग सीनै डोंगर हे बात करै के खतम करिस, तब भगवान उके आदेस लिखे हर दुइठे समथर पथरा दइस, भगवान अपन अंगठी के दवारा लिखिस अउ पथरा हे उन नियमन के दइस।