निरगमन 30

धूप जलामै कर बेदी

(निरगमन 37:25-28)

1घूप जलामै के निता अक्ठी बेदी बनाबे, तै उके बमूर कर लकरी के बनवाबे। 2ओखर लम्बाई अक हाथ अउ चउडाई अक हाथ के होय, ऊ चउकोर होय, अउ ओखर ऊंचाई दुइ हाथ के होय, अउ ओखर सींग उहै खन्डा लग बनाय जाय। 3अउ तै ओखर उप्पर लग ढेक्कन, ओखर चउगिरदा पल्ला के बाजुन हे, अउ ओखर सींग के सुध्द सोन लग मढिहा, ओखर चउगिरदा पल्ला सोन के कोर बनवाबे। 4ओखर निता सोन कर दुइठे कडा बनवाबे, उनके कोर के तरी दुनो पल्ला बाजुन हे लगाबे, ऊ डन्डन के जकड पट्टे बनही, जेखर लग बेदी उठाय जाय सकै। 5डन्डन के बमूर कर लकरी के बनायके उनके सोन लग मढवाबे। 6बेदी के गवाह चिट्ठी के आगू लटके हर परदा के आगू धरहे, मतलब गवाह चिट्ठी सन्दूक हे धरे हर दया आसन कर आगू जिहां मै तोर लग मिले करहुं। 7अउ हारून बेदी हे सुगन्धित धूप लजाही, रोजदिन सुबेन्ने जब ऊ दियन के सजायके धरी तब उके जलाही। 8साम के टेम जब हारून दियन के जलामै, तब धूप जलाही, हइ धूप पीढी दर पीढी परभु के आगू लगेतार बारे जाय। 9ओखर हे अपवितर धूप झइ जलाबे, न होमबली अउ न दानाबलि चढाबे, तै ओखर हे अंगूर कर रस बलि झइ उडेलबे। 10हारून साल हे अक बेर ओखर सीगन हे छमा करही, तुम्हर पीढी लग पीढी, साल हे अक बेर, छमा के पाप बलि के खून लग ओखर हे छमा करे जाय हइ बेदी यहोबा के निता परम पवितर हबै।

परभु कर उपस्थिति बाले तम्बू के निता पइसा

11तब भगवान मूसा लग कथै, 12जब तै इस्राएली के गिनती करिहों, तब सगलू मनसे गिनती के टेम अपन परान के मुकति के कीमत यहोबा के देही, जेखर लग गिनती के टेम ओखर हे कउनो महामारी के परकोप झइ होय। 13जउन मनसे के गिनती करे गय हबै, ऊ इहै देही पवितर जिघा के तउल के जसना चांदी के आधा खोटन्ना, ऊ यहोबा के आधा खोटन्ना दान के रूप हे देही। 14सगलू मनसे जेखर आयु बीस साल, अउ ओखर लग बोहत होही, यहोबा के दान चढाही। 15जब तुम अपन परान के मुकति के कीमत आधा खोटन्ना यहोबा के दान हे चढइहे, तब धनी मनसे एखर लग बोहत झइ दे अउ न गरीब मनसे ओखर लग कम देय। 16तै मुकति के कीमत तम्बू के सेबा काम हे खरचा करबे, जेखर लग ऊ यहोबा के आगू इस्राएली के निता अक्ठी निसानी बनै अउ तुम्हर परान के मुकति के छमा होय।

पीतर कर बरतन

17भगवान मूसा लग कथै, 18तै हाथ गोड धोमै के निता पीतर के अक्ठी बरतन बनवाबे, ओखर पाया के पीतर के बनवाबे उके मिलापबाले तम्बू अउ बेदी के बीच धरबे,ओखर हे पानी भरहे।1 19हारून अउ ओखर टोरवा ओखर लग अपन हाथ गोड धोही। 20जब उन मिलापबाले तम्बू हे घुसहिन अउ जब उन यहोबा के निता आगी हे हूमन जलामै के उद्देस्य लग सेबा के अभिप्राय लग बेदी के लिघ्घो आही, तब पानी लग हाथ गोड धोमै, असना झइ होय कि मर जाय। 21ता उन अपन हाथ गोड जरूर धोमै, एखर लग उन नेहको मरही हइ असना नियम होही जउन हारून अउ ओखर वंस अउ पुरखन के निता सबरोज बने रही।

अभिसेक कर तेल

22तब यहोबा मूसा लग कथै, 23तै बोहत बढिया मसाले लानबे, साढे पांच किलो तेल रूप हे गन्धरस, ओखर आधा मतलब पोने तीन किलो सुगन्धित दारचीनी, पोने तीन किलो सुगन्धित अगर, 24पवितर जिघा के तउल के जसना साढे पांच किलो तेजपात अउ साढे सात लीटर जैतून के तेल लय। 25सुगन्धित अभिसेक कर तेल बनामै के निता सगलू चीजन के मिलाबा। 26अउ ओखर लग मिलापबाले तम्बू के अउ गवाह चिट्ठी के पेटी के, 27अउ सगलू चीज सहित मेज के अउ चीज सहित दीया के, अउ धूप बाले बेदी के, 28अउ सगलू चीज सहित होमबेदी के, अउ पाय हर सहित होदी के अभिसेक करैके, 29तै उनके पवितर करबे कि ऊ परम पवितर होय उनके छिय बाले पवितर हुइ जाय। 30“हारून अउ ओखर टोरवन के उप्पर तेल डालिस हइ साबित करही कि ऊ मोर खास करके सेबा करथै, तब हइ मोर सेबा याजक के जसना पवितर कर सकथै। 31इस्राएलिन के मनसेन लग कहबे कि अभिसेक के तेल मोर निता हरमेसा बोहत जादा बिसेस होही। 32हइ साधारन मनसे के देह हे झइ उंडेले जही, ओखर हे कउनो सुगन्ध तेल झइ बनाबे जउन मेर तै हइ बिसेस तेल बनाय हबस, हइ तेल पवितर हबै अउ हइ तुम्हर निता बोहत जादा बिसेस होय चाही। 33अगर कउ हइ पवितर तेल के जसना सुगन्ध बनाय अउ उके कउनो बिदेसी के दइ दे ता ऊ मनसे के अपन मनसेन लग अलगे करे जाय।”

हूमन

34तब भगवान मूसा लग कथै, “हइ महके बाले मसाला के लेया, रसगंधा, कस्तूरी गंधिका बिरोजा अउ सुध्द लोबान धियान रखा कि तुम्हर लिघ्घो मसाला के बरोबर मातरा होय। 35मसाला के महके बाले धूप बनामै के निता आपस हे मिलाबा, इके उहै मेर करा जसना सुगन्ध बनामै बाले मनसे करथै, हइ धूप हे नून मिलाबा, हइ इके सुध्द अउ पवितर बनाही। 36ओहमा कुछ पीसके बारीक करबे, फेर ओहमा लग कुछ मिलाप बाले हे गवाह चिट्ठी के लिघ्घो रखबे जिहां मै तोर लग मिले करिहों, ऊ तुम्हर निता परम पवितर होही। 37जउन हूमन तै बनइहे, मिलामै के टेम हे ओखर जसना तुम अपन निता अउ कुछु झइ बनवइहे, भगवान कर चीज समझ के उके पवितर2 मनिहा। 38जउन कउ मनसे सूंघै के निता एखर जसना धूप बनाही, ऊ अपन मनसेन मसे नास करे जही।”