निरगमन 29

हारून अउ ओखर टोरवन के याजक पद के निता अभिसेक

(लयबेवस्था 8:1-36)

1हारून अउ ओखर टोरवन के पवितर करै के निता हइ करबे, जेखर लग ऊ मोर निता याजक के काम करै, तै अक्ठी निरदोस रकरा अउ दुइठे निरदोस गेडरा लइहे। 2अउ अखमीरी रोटी, अउ तेल लग सने हर मइदा के अखमीरी फुलके, अउ तेल लग चुपडे हर अखमीरी पपडियां लेबे, हइ सगलू गोंहू के मइदा के बनवाबे। 3इनही अक्ठी छन्नी हे धरके उस छन्नी के ऊ रकरा अउ उन दुनो गेडरा समेत लिघ्घो लइ आबे। 4तै हारून अउ ओखर टोरवा के मिलापबाले तम्बू के दवार हे लाबे, उनके पानी लग असनांद करवाबे। 5तब उन बन्डी के लइके हारून के अंगरखा अउ एपोद के बागा पहिराबे, अउ एपोद अउ कवच बांधहे, अउ एपोद के काढे हर पट्टा बांधहे। 6ओखर मूंड हे पगडी बांधहे, अउ पगडी के उप्पर हे पवितर मुकुट के धरबे। 7तब अभिसेक के सुध्द तेल लइके ओखर मूंड हे डालके ओखर अभिसेक करहे। 8तब ओखर टोरवन के लाबे, अउ उनही खुरथा पहिराबे। 9तै हारून अउ ओखर टोरवन के कमर बांधहे, अउ ओखर मूंड हे टोपी रखहे, जेखर लग याजक कर पद हे सबरोज उनखर बांटा रहै, इहैमेर हारून अउ ओखर टोरवन के अभिसेक करबे। 10तब रकरा के मिलापबाले तम्बू के आगू अउ ओखर टोरवा हारून रकरा के मूंड हे अपन-अपन हाथ धरै। 11ऊ रकरा के भगवान कर आगू मिलापबाले तम्बू के दूरा हे बलि करबे। 12अउ रकरा के खून मसे चुटु हस खून लइके अपन अंगठी लग बेदी के सीगन हे लगाबे, अउ बचेहर सगलू खून के बेदी के पाय हे उडेल देहे। 13ऊ चरबी के जेखर लग अंतडियां मुंदरे रथै, अउ करेजा के झिल्ली के, अउ चरबी समेत दुनो गुरदन के लइके बेदी हे उनके जरइहे। 14पय रकरा के गोस ओखर खलरी अउ गोबर के छावनी लग बाहिर आगी हे जराय देहे, काखे हइ पाप बलि हबै। 15अक्ठी गेडरा लेहे, हारून अउ ओखर टोरवा गेडरा के मूंड हे अपन हाथ धरहे। 16तै गेडरा के बलि करहे अउ ओखर खून लइके बेदी के चउगिरदा पल्ला उके झिडक दइहे। 17तै गेडरा के खन्डा-खन्डा कटिहे, अउ ओखर अंतडिया अउ गोड धोइहे, अउ उनके गेडरा के खन्डा अउ ओखर मूंड के संग धरिहे। 18अउ ऊ पूर गेडरा के बेदी हे जरइहे, ऊ भगवान के निता होमबलि हबै, हइ यहोबा के निता खुसी सुगन्ध हबै, अउ यहोबा के निता आगी हे चढाय हर बलि हबै।1 19तै दूसर गेडरा लेहे, हारून अउ ओखर टोरवा गेडरा के मूंड हे अपन हाथ धरै। 20तै गेडरा के बलि करहे, अउ ओखर चुटु हस खून लइहे, अउ उके हारून अउ ओखर टोरवन के दहिना कान के सिरा हे अउ उनखर दहिना हाथ अउ दहिना गोड के अंगठन हे लगाबे, बचेहर खून के बेदी के चउगिरदा पल्ला झिडक देहे। 21बेदी के खून अउ अभिसेक के तेल हइ दुनो मसे कुछ लइके हारून अउ ओखर बन्डी हे, अउ ओखर टोरवन अउ उनखर बन्डी हे झिडक देहे, तब ऊ अपन बन्डी समेत अउ ओखर टोरवा अपन-अपन बन्डी समेत पवितर समरपित हुइ जइहीं। 22तै गेडरा के चरबी अउ पूंछी के, अउ जउन चरबी लग आंती मूंदे रथै, उके अउ करेजा हे झिल्ली के अउ चरबी समेत दुनो गुरदा के अउ दहिना जांघ लइहे। 23यहोबा कर आगू धरे अखमीरी रोटी के टोपरी मसे अक्ठी टोपरी तेल लग सने हर मइदा के अक्ठी फुलका अउ अक्ठी रोटी लेहे। 24तै इनही सबके हारून अउ ओखर टोरवन के हाथन हे धरहे, डोलाय जाय के दान ठहरायके भगवान कर आगू डोलाय जाय। 25एखर बाद उके उनखर हाथन लग लइके होमबलि के बेदी हे जराय देहे, जेखर लग ऊ भगवान कर आगू सुखद सुगन्ध के रूप हे यहोबा कर आगू जलइहे, ऊ भगवान के निता हवन होही। 26हारून के अभिसेक बलि के गेडरा के छाती के डोलाय जाय के दान के निता भगवान कर आगू डोलइहे, अउ ऊ तोर भाग ठहरी। 27अउ हारून अउ ओखर टोरवन के अभिसेक बलि के गेडरा होही, ओखर मसे डोलाय जाय के दान बलि छाती जउन डोलाय जही, अउ उठाय जाय के दान बाले पट्टा जउन उठाय जही, हइ दुनो के पवितर ठहरइहे। 28हइ गोस इस्राएली के पल्ला लग हारून अउ ओखर टोरवन के निता भाग ठहरी, हइ याजक के ऊ भाग हबै, जउन इस्राएली दवारा अपन मेलबलि मसे दान करे जही, हइ यहोबा के अरपित उनखर दान हबै। 29हारून के जउन पवितर कपडा होही, ऊ ओखर बाद ओखर टोरवा नाती के मिलत रहै, जेखर लग उहै के पहिरे हर ओखर अभिसेक अउ संस्कार करे जाय। 30जउन टोरवा हारून के जिघा हे याजक होही, जब ऊ मिलापबाले तम्बू हे आयके पवितर जिघा हे सेबा के काम करही, तब ऊ कपडा के सात रोज तक पहरी। 31फेर याजक के अभिसेक बलि के गेडरा लइहे, अउ ओखर गोस के पवितर जिघा हे चुरइहे। 32हारून अउ ओखर टोरवा गेडरा के गोस अउ टोपरी के रोटी मिलापबाले तम्बू के दूरा हे खाइन। 33जउन चीज लग छमा करके हारून अउ ओखर टोरवन के पवितर अउ याजक के पद अभिसेक करे गय रथै, उके उहै खइ, जउन मनसे पुरोहित कुर के नेहको हबै, ऊ उके झइ खाय, काखे ऊ चीज पवितर हबै। 34अगर पुरोहित के अभिसेक बलि के कुछ गोस अउ रोटी सुबेन्ने तक बच जाय, ता तै बचे हर भाग के आगी हे जराय दइहे, ऊ झइ खाय जाय, काखे ऊ पवितर हबै। 35जउन आदेस मै तोके दय हबै, ओखर जसना तै हारून अउ ओखर टोरवन के संग बेउहार करिहे, तै सात रोज उनखर पुरोहित पद के अभिसेक करत रहबे। 36मतलब पाप बलि के अक्ठी रकरा पाप छमा के निता रोजदिन चढाबे, जब तै बेदी के निता छमा करिहे, तब ओखर निता पापबलि चढाही, उके पवितर करै के निता ओखर अभिसेक करबे। 37सात रोज तक बेदी के निता छमा बलि करके उके पवितर करिहे, इहैमेर बेदी परम पवितर हुइ जही, जउन बेदी के छूही, ऊ पवितर हुइ जही।

रोज दिना कर दान

(गिनती 28:1-8)

38जउन तोके बेदी हे चढामै के होही ऊ हइ हबै, रोजदिन अक-अक साल के दुइठे गेडरा कर छउना चढाबे। 39पहिले गेडरा के लरका सुबेन्ने अउ दूसर गेडरा के छउना साम के टेम चढाबे। 40पहिले गेडरा के संग दुइ लीटर पेर के निकारे हर तेल लग सने हर अक किलो मइदा, अउ टोपरी के दसमा हिस्सा के निता दुइ लीटर अंगूर कर रस चढाबे। 41दूसर गेडरा साम के टेम चढाबे, ओखर संग सुबेन्ने के जसना दानाबलि अउ पेयबलि चढाबे, जेखर लग ऊ यहोबा कर निता सुखद सुगन्ध अउ भगवान के निता हूमन ठहरै। 42हइ आगीबलि पीढी लग पीढी तक मोर यहोबा कर आगू मिलापबाले तम्बू के दूरा हे लगेतार चढाय जही, जिहां मै तोर लग दान करहुं, जिहां लग तोर लग बात करहुं। 43उहां मै इस्राएली लग दान करहुं, अउ ऊ जिघा मोर महिमा लग पवितर होही। 44मै मिलापबाले अउ तम्बू अउ बेदी के पवितर करहुं, अपन निता याजक कर काम करै के निता हारून अउ ओखर टोरवन के मै पवितर करहुं। 45मै इस्राएली के बीच निबास करहुं, अउ उनखर भगवान हुइहों। 46उन जान लेही, कि मै यहोबा उनखर भगवान हव, जिनखर मिस्र देस लग उनके बाहिर निकारे हबो, कि मै उनखर बीच निबास करहुं, मै यहोबा उनखर भगवान हव।