निरगमन 26

परभु कर उपस्थिति कर तम्बू

(निरगमन 36:8-38)

1फेर तै दसठे पवितर परदा के रहैबाले जिघा बनाबे, हइ परदा पातर सूत लग बुने हर नीला, बैगनी अउ ललका रंग के कपडा के होय के चाही, तै ओखर हे कुसलता लग करूबन के चितरन के कढाई करबे। 2हर परदा के लम्बाई अट्ठाइस हाथ अउ चउडाई चार हाथ के होय, सगलू परदा अक्ठिन नाप के होय। 3पांचठे परदा अक दूसर लग जुडे हर होय, इहैमेर बाकि पांचठे परदा अक दूसर लग जोडे जइहिन। 4अउ जिहां हइ दुनो परदा जोडे जाए उहां के दुनो छोरन हे नीला-नीला फन्दा लगवाबे। 5पहिले जुडे परदा हे पचास फन्दा डालबे, अउ दूसर जुडे परदा के छोर हे पचास फन्दा डालबे, फन्दे आमू-सामू होय चाही। 6अउ तै सोन के पचासठे हुक बनवाबे, अउ जुडे परदा के हुक के दवारा अक दूसर के जोड दइहे, जेखर लग पूर रहैबाले जिघा मिलके अक हुइ जाय। 7तै रहैबाले जिघा के ऊपर, तम्बू के निता छेडी के चूंदी के परदा बनवाबे, तै कुल ग्याराठे परदा बनवाबे। 8सगलू परदा के लम्बाई तीस हाथ अउ चउडाई चार हाथ के होय, अउ ग्याराठे परदा अक्ठिन नाप के होय। 9तै पांचठे परदा के अक दूसर लग जोडबे, इहैमेर बचे हर छय परदा के तम्बू के आगू मोडके दोहराय के लटकाय देबे। 10अउ तै पहिले जुडे हर परदा के छोर हे पचासठे फन्दा डालबे, ओसनेन दूसर जुडेहर परदा के छोर हे पचास फन्दा डालबे। 11अउ पीतर के पचास हुक बनवाबे, उहै फन्दा हे डालके तम्बू के जोड देहे, जेखर लग ऊ अक्ठिन बन जाय। 12अउ तम्बू के परदा के लटके हर भाग मतलब आधा परदा, जउन बचे जथै, ऊ रहैबाले जिघा के पाछु पल्ला लटकत रही। 13तम्बू के परदा कर लम्बाई मसे बचे हर भाग रहैबाले के जिघा के दुनो पल्ला अगल बगल उके मूंदै के निता अक हाथ उछो लटकत रही। 14तम्बू के निता ललका रंग के रंगे हर गेडरा के खलरी के अक्ठी ओढना अउ ओखर उप्पर सेही कर खलरी के अक्ठी ओढना बनवाबे। 15फेर रहैबाले जिघा के निता बमूर कर लकरी के तखथा बनवाबे। 16अक्ठी-अक्ठी तखथा के लम्बाई दस हाथ अउ चउडाई डेढ हाथ के होय। 17अक-अक्ठी तखथा हे अक दूसर लग जुडे हर दुइ दुइठे चुल्हवा होय, अउ रहैबाले के सगलू तखथा के इहैमेर बनवाबे। 18रहैबाले जिघा के निता तखथा हइमेर बनाबे, रहैबाले जिघा के दक्खिन भाग के निता बीसठे तखथा होय। 19अउ बीसठे तखथन के तरी चांदी के चालिसठे खुरसी बनवाबे, मतलब अक-अक्ठी तखथा के तरी ओखर चुल्हवा के निता दुइ-दुइठे खुरसी। 20तम्बू के जिघा के दूसर पल्ला, उत्तर पल्ला बीसठे तखथा। 21उनखर निता चांदी के चालीस खुरसी बनवाबे, मतलब अक-अक्ठी तखथा के तरी दुइ-दुइ खुरसी होय। 22तै दिनबुडती दिसा हे रहैबाले जिघा के पाछु भाग के निता छयठे तखथा बनवाबे। 23अउ रहैबाले के जिघा के कोन्टा के निता पाछु भाग हे दुइठे तखथा बनवाबे। 24अउ हइ तरी लग दुइ-दुइ भाग होही, अउ दुनो भाग उप्पर के टिल्ली तक अक-अक्ठी कडा हे मिलाय जाय, दुनो तखथा के इहै रूप होय, हइ दुनो कोन्टन के निता होय। 25अउ आठ तखथा होय अउ उनखर चांदी के सोलाठे खुरसी होय, मतलब अक-अक्ठी तखथा के तरी दुइ-दुइठे खुरसी होय। 26तै बमूर कर लकरी के हेटका बनवाबे, मतलब तम्बू के अक्ठी तखथा के निता पांचठे। 27दूसर पल्ला के तखथा के निता पांचठे, अउ दिनबुडती पल्ला तम्बू के पाछु भाग के निता पांचठे। 28तखथा के बीचो-बीच, बीच बाले छड तम्बू जिघा के अक छोर लग दूसर छोर तक जही। 29फेर तखथा के सोन लग मढवाबे, अउ उनखर कडा के, जउन छड के जकड पट्टा होही, सोन के बनवाबे, तै छड के सोन लग मढवाबे। 30अउ तम्बू जिघा के ओखर योजना के जसना ठाड करबे, जउन तोके डोंगर छो दिखाय गय हबै। 31तै नीला, बैगनी, अउ ललका रंग के कपडा लग, पातर सूत लग बुने हर कपडा लग अक्ठी परदा बनवाबे, ऊ कढाई के काम करे हर करूबन के संग बने। 32अउ उके बमूर कर लकरी के, अउ सोन लग मढे हर चारठे खम्भा हे लटकाबे, इनखर हुक सोन के होय, अउ हइ चांदी के चारठे खुरसी हे ठाड रहै। 33अउ बीचबाले परदा के अंकडियन के तरी लटकाय के ओखर आड हे गवाह चिट्ठी के सन्दूक भित्तर लइ जाबे, इहैमेर ऊ बीचबाले परदा तुम्हर निता पवितर जिघा के महापवितर जिघा लग अलगे करही।1 34तै महापवितर जिघा हे गवाह चिट्ठी के सन्दूक के उप्पर प्रायस्चित के ढकै के धरबे। 35अउ ऊ परदा के बाहिर तम्बू के उत्तर के पल्ला मेज धरबे, अउ ओखर दक्खिन के पल्ला टेबुल के आगू दीवट के धरबे। 36तै तम्बू के दूरा के निता नीला, बैगनी अउ ललका रंग के कपडा लग पातर सूत लग बुने हर कपडा लग जेखर हे बेल बूट काढे गय होय, अक्ठी परदा बनवाबे। 37तै परदा के निता बमूर कर लकरी के, अउ सोन लग मढे हर, पांचठे खम्भा बनवाबे, उनखर छल्ला सोन के होही, तै उनखर निता पीतर के पांचठे खुरसी बनवाबे।