निरगमन 25

पवितर तम्बू कर निता दान

(निरगमन 35:4-9)

1परभु मूसा लग कथै, 2इस्राएल मनसेन लग गुठे कि उन मोर निता भेंट लामै, सगलू मनसे लग जउन इक्छा लग देय चाही, मोर निता भेंट स्बीकार करबे। 3जउन भेंट तै उनखर लग लेहे, उन हइ हबै, सोन, चांदी अउ पीतर, 4नीला, बैगनी, अउ ललका रंग के बन्डी, पातर सूत लग बुने हर बन्डी, छेडी कर चूंदी, 5ललका रंग के रंगे हर गेडरा कर खलरी, सेही कर खलरी, बमूर कर लकरी, 6दिया कर तेल, अभिसेक के तेल के निता अउ सुगंध धूप के निता मसाले, 7कपडा कर चोला अउ चपरास के निता सुलेमानी पथरा, अउ जडै के निता मडि। 8अउ उन मोर निता अक्ठी पवितर तम्बू बनाही, जेखर लग मै उनखर बीच निबास करहुं। 9जउन कुछ मै तोके देखाहूं, मतलब अपन रहै बाले के जिघा के दिखाहूं, ओखरै जसना तै उके बनइहे।

टीमा के सन्दूक

(निरगमन 37:1-9)

10बमूर कर लकरी के अक्ठी सुन्दर सन्दूक बनाय जाय, ओखर लम्बाई ढाई हाथ, अउ चउडाई अउ उंचाई डेढ-डेढ हाथ के होय। 11तै उके सुध्द सोन लग मढबे, तै उके बाहिर भित्तर मढबे, तै सन्दूक के चउगिरदा पल्ला सोन के कोर बनाबे। 12तै ओखर निता सोन के चारठे कडा ढालबे, अउ ओखर चउगिरदा पायों हे लगाबे, ओखर अक्ठी पल्ला दुइठे कडा अउ दूसर पल्ला दुइठे कडा। 13तै बमूर कर लकरी के डन्डा बनाबे, अउ उके सोन लग मढबे। 14तै डन्डन के सन्दूक के दुनो पल्ला के कडन हे डालबे, जेखर लग उनखर सहारे सन्दूक के उठाय जाय सकै। 15डन्डा सन्दूक के कडन हे लगे रही, अउ ओखर लग अलगे नेहको करे जइहिन। 16जउन गवाह के चिट्ठी मै तोके देहुं, उके सन्दूक हे धरबे। 17फेर सुध्द सोन के अक्ठी प्रायस्चित के ढकनहा बनवाबे, ओखर लम्बाई ढाई हाथ, अउ चउडाई डेढ हाथ के होही।1 18अउ सोन ढालके दुइठे करूब बनवायके प्रायस्चित के ढकनहा के दुनों छोर हे लगवाबे। 19अक्ठी करूब अक छोर हे अउ दूसर करूब दूसर‌ छोर हे प्रायस्चित के, अउ ओखर दुनो छोर हे करूबन के धातु के अक्ठी खन्डा बनायके ओखर दुनो छोर हे लगवाबे। 20करूब अपन पोखडी के हइमेर उप्पर फइलाइन, कि उनखर प्रायस्चित मुंदरे रहै, अउ उनखर मुंह आमू-सामू होय, करूबन के मुंह प्रायस्चित के ढंकै के पल्ला रहैं। 21तै प्रायस्चित के सन्दूक के उप्पर लगवइहे, अउ जउन गवाह चिट्ठी मै तोके देहुं, उके सन्दूक के भित्तर धरबे। 22मै उहां तोर लग मिले करहुं, जउन आदेस मै तोके इस्राएली के निता देहुं, उनखर बारे हे, मै तोर लग प्रायस्चित के उप्पर लग गवाह के चिट्ठी के सन्दूक हे स्थापित दुनो करूबन के बीच लग बातचीत करे करहुं।

पवितर रोटी कर टेबुल

(निरगमन 37:10-16)

23तै बमूर कर लकरी के अक्ठी टेबुल बनाबे, ओखर लम्बाई दुइ हाथ, अउ चउडाई अक हाथ, अउ उंचाई डेढ हाथ के होही। 24तै उके सुध्द सोन लग मढबे, अउ ओखर चउगिरदा पल्ला सोन के अक्ठी कोर बनाबे। 25तै ओखर चउगिरदा पल्ला चार आंगुर चउडा चउखट बनाबे अउ हइ चउखट के चारो पल्ला सोन के मेड बनाबे। 26तै ओखर निता सोन के चारठे कडा बनाबे, अउ ओखर चारों पायों के टाठा हे कडन के लगाय देहे। 27चारो कडे चउखट के लिघ्घो होय चाही, जेखर लग उन मेज के उठामै के निता डन्डा के जकड-पट्टे के काम देय। 28तै बमूर कर लकरी के डन्डा बनवाबे, अउ उके सोन लग मढबे, टेबुल ओखरै के सहारे उठाय जही। 29तै धूप के निता परात, धूपदान अउ करछुली अउ उडेलै के खोरिया, सगलू सुध्द सोन के बनवाबे। 30तै टेबुल हे मोर आगू दान के रोटी लगेतार धरबे।2

सोन कर दीया

31तै सुध्द सोन के अक्ठी दीवट बनवाबे, ओखर पाया अउ डन्डी सोन ढालके बनाय जाय, ओखर पुस्पकोस गांठ अउ फूल धातु के अक्ठिन खन्डा लग बनाबे। 32ओखर छयठे डगइल निकरे होही, तीनठे डगइल दीवट के अक्ठी पल्ला लग अउ तीनठे डगइल दूसर पल्ला निकरे होही। 33अक्ठिन डगइल हे बादाम के फूल के जसना तीन-तीनठे पुस्पकोस अक-अक्ठी गांठ अउ अक-अक्ठी फूल होही, दीवट के निकरे हर छयठे डगइल के इहै आकार के होही। 34दीवट के डन्डा हे बादाम के फूल के जसना चारठे पुस्पकोस अपन-अपन गांठ अउ फूल सहित होय। 35दीवट के डन्डा हे छयठे डगइल मसे अक-अक्ठी जोडी डगइल के तरी अक-अक्ठी गांठ होही, गांठे अउ डन्डी धातु के अक्ठिन खन्डा लग बनाय जही। 36गांठे अउ डगइल धातु के अक्ठी खन्डा लग बनाय जही, सुध्द सोन ढालके पूर दीवट अक्ठिन खन्डा लग बनाबे। 37तै ओखर निता सातठे दिया बनाबे, उके इहैमेर बरत हर धरबे, कि ओखर उजियार आगू के जिघा हे पडै। 38ओखर चिमटा अउ तसतरी सगलू सुध्द सोन के होय। 39दिया अउ ओखर सगलू बरतन लगभग चउतिस किलो गराम सुध्द सोन लग बनाय जइहिन। 40अउ सचेत रहिके हइ सगलू चीजन के ऊ नमूना के जसना बनवाबे, जउन मै तोके डोंगर छो दिखाय हव।3