निरगमन 24

टीमा हे मोहर

1परभु मूसा लग कथै, तै हारून नादाब अबीहू अउ इस्राएल के सत्तरठे सियान भगवान के लिघ्घो निहुर के भजन करै। 2सिबाय मूसा तै मोर लिघ्घो आबे, पय सियान मनसे लिघ्घो नेहको अइहिन, अउ इस्राएली मनसे तोर संग उप्पर नेहको चढहिन। 3मूसा मनसेन के लिघ्घो जायके यहोबा के सगलू बात अउ सगलू नियाव सुनाय दइस, तब सगलू मनसे अक आरो हे बोल उठिन, “जेतका बात यहोबा कहे हबै, उन सगलू बातन के हम मानब।” 4तब मूसा परभू के सगलू बचन लिख दइस ऊ बडे सुबन्ने उठके डोंगर के तरी अक्ठी बेदी बनाइस अउ इस्राएल के बाराठे कुर के जसना बाराठे खम्भा ठाड करिस। 5मूसा इस्राएल के सग्यान टोरवा के पठोथै उन भगवान के निता होमबलि अउ बइला के मेलबलि चढाबै। 6मूसा आधा खून लइके कटोरा हे रखिस अउ आधा बेदी हे छिडक देथै। 7तब टीमा के किताब इस्राएल मनसे के लइके उके सुनाइस, उके सुनके उन कथै, “जउन कुछ यहोबा कहे हबै, ऊ सगलू के हम करब, अउ ओखर आदेस मानब।” 8तब मूसा खून लइके मनसे हे छिडक देथै, उनखर लग कथै, हइ देखा ऊ टीमा के खून हबै, जेही भगवान इन सगलू टीमा तुम्हार संग बाधे हबै। 9तब मूसा, हारून, नादाब, अबीहू अउ इस्राएलियन के सत्तर सियान उप्पर गइन 10उन इस्राएल के भगवान के दरसन देखिन अउ ओखर गोड तरी नील मडि के बने हर चबुतरा जसना कुछु रथै, जउन बादर के जसना सुध्द रथै। 11अउ भगवान इस्राएल के परधानन हे हाथ नेहको उठाइस, तब उन भगवान के दरसन करिन अउ खाइन पीन।

मूसा सीनै डोंगर छो

12तब परभु मूसा लग कथै, “मोर लिघ्घो डोंगर हे चढके आबा, अउ उहां मोके ओरगा, मै पथरा के पटिया देहूं, जेहमा मनसे के सिक्छा निता नियाव अउ आदेस लिखे हबै।”1 13तब मूसा उठिस अउ अपन यहोसू नाम के हरवाह के संग भगवान के डोंगर हे चढ गइस। 14अउ सियानन लग ऊ हइ कहे गये रथै, जब हम तुम्हर लिघ्घो नेहको आउब, तब तक मोके ओरगिहा, अउ सुना हारून अउ हूर तुम्हर संग हबै, अगर कउनो के मामला होय ता ऊ ओखरै लिघ्घो जांय। 15तब मूसा डोंगरा हे चढ गइस, अउ बादर डोंगर के छाय लइस। 16परभु के महिमा सीनै डोंगर हे निबास करै लगिन, बादर छय रोज तक छाय रथै, अउ सतमा रोज परभु बादर के बीच लग मूसा के पुकारिस। 17डोंगर के टिल्ली हे परभु के महिमा के दरसन इस्राएली के नजर हे तेज आगी के जसना दिखाई देथै। 18तब मूसा बादर के बीच हे जायके डोंगर हे चढ गइस, अउ मूसा डोंगर हे चालीस रोज अउ चालीस रात रहिस।2