निरगमन 23

नियाव अउ निस्पक्छ

1तै झूठ बात झइ फइलाबे, अन्याय गवाही देय के निता दुस्ट के संग झइ देबे।1 2तै बेकार काम करै के निता भीड के अनुसरन झइ करबे, तै न्याय के बिगाडै के उद्देस्य लग भीड के अनुसरन झइ करबे, अउ मामला हे झूठ गवाही झइ देबे। 3तै गरीब मनसे के फइसला हे ओखर पक्छपात नेहको करबे। 4जब तोके तोर बैरी के बइला अउ गदहा भुलाय हर मिलै तब तै ऊ पसु के ओखर लिघ्घो लाबे। 5जब तै ऊ मनसे के गदहा के बोझ लग दबररे हर देखबे, जउन तोर लग घिरना करथै, तब उके ओसनेन झइ छांडबे पय बोझ उठामै हे ओखर मदत करबे। 6“तोर मनसेन मसे जउन गरीब होय, ओखर मामला हे नियाव झइ बिगाडबे।” 7तै झूठ आरोप लग दुरिहां रहबे, अउ निरदोस अउ भक्त के झइ मारबे, काखे मै दुस्ट के निरदोस नेहको घोसित करहुं। 8तै घूंस झइ लेबे, काखे घूस देयबाले मनसे के अंधरा बनाथै, ऊ भक्तन के नियाव पक्छ के उलट देथै। 9तै परदेसी मनसे के झइ लुटबे, तुमके परदेसी के जीबन के अनुभव हबै, काखे तै खुदय मिस्र देस हे परदेसी रथस।

सतमा साल अउ सतमा रोज

10तै छय साल तक अपन खेतवा हे बोबाई करबे, अउ ओखर उपज अकजिघा करबे। 11पय सतमा साल उके परती रहै दइहे, उके ओसनेन छांड देहे, जेखर लग तोर गरीब मनसे खाय, जउन बचे रही, उके बन पसु खाही, तै ओसनेन अपन अंगूर कर बगिया अउ जैतून कुंज के बारे हे करबे।2 12तै छय रोज तक अपन काम हे मेहनत करबे, पय सतमा रोज मेहनत करबे, जेखर लग तोर बइला अउ गदहा के अराम, तोर हरवाहिन के टोरवा अउ परदेसी के अराम मिलै।3 13जउन बात मै तोर लग कहे हव, उके मानबे, तै दूसर देउतन के नाम झइ लइहे, हइ नाम तोर मुंह लग झइ निकडै अउ झइ सुनाई दे।

तीन खास तेउहार

(निरगमन 34:18-26; बेवस्थाबिबरन 16:1-17)

14“तै साल हे तीन बेर मोर निता यातरा के तेउहार बनाबे। 15तै अखमीरी रोटी के तेउहार बनाबे, जसना आदेस मै तोके दय हबो, ओखर जसना तै निरधारित टेम अबीब महिना हे सात रोज तक अखमीरी रोटी खाबे, काखे तै ऊ महिना हे मिस्र देस लग बाहिर निकडे रथस, कउनो मनसे मोर दरसन के निता छूछे हाथ झइ आबै।” 16जब तोर बोय हर खेतवा के पहली उपज तइयार होय, तब कटनी के तेउहार मानबे, साल के आखरी हे जब तै मेहनत के फडुहा बटोर के ढेर लगाबे, तब बटोरन के तेउहार मनाबे।4 17तोर परवार के सगलू डउका हर साल हे तीन बेर परभु भगवान के आगू उपस्थित हुइहिन। 18तै बनइला पसु के खून खमीरी रोटी के संग झइ चढाबे, तै तेउहार के चरबी सुबेन्ने तक झइ छांडबे। 19तै अपन भुंइ के पहिले फडुहा मसे निक्खा फडुहा मोर, अपन परभु भगवान के भवन हे लानबे, तै छेडी के लरका के ओखर दाय के दूध हे झइ पकाबे।5

टीमा अउ निरदेस

20सुन जउन जिघा मै तोर निता तइयार करे हवं, उहां तोके पहुंचामै के उदेस्य लग अउ गली हे तोर मदत के खातिर मै तोर आगू-आगू अक्ठी दूत के पठोथों। 21ओखर हे धियान दे, ओखर आरो के सुन, ओखर लग बिरोध झइ करबे, ऊ तोर अपराधन के छमा नेहको करही, काखे मोर नाम ओखर हे हबै। 22पय अगर तै धियान लग ओखर आरो सुनहे, जउन कुछ मै कइहों, उके करहे, ता मै तोर बैरिन के अपन दुस्मन अउ तोर बैरिन के अपन बैरी मानहुं। 23“जब मोर दूत तोर आगू जायके तोके एमोरी, हित्ती, परिज्जी, कनानी, हिब्बी अउ यबूसी मनसे के देस हे पहुंचाही, अउ मै उनही बिनास कर डालहुं। 24तब तै उनखर देउतन के बन्दना झइ करबे, उनखर सेबा झइ करबे, अउ न उनखर कामन के जसना काम करबे, उनही बिनास कर डालहे, उनखर लाठ के टोर फोर देबे। 25तै सिबाय अपन परभु भगवान के सेबा करबे, मै तोर दाना पानी हे आसीस देहुं, तोर बीच लग नांगा के दुरिहां करहुं। 26तोर देस हे न तो कउनो डउकी के गरभ गिरही, अउ न कउनो डउकी बांझ होही मै तोर आयु के रोज पूर करहुं। 27जेतका मनसेन के बीच तै जइहे, उन सगलू के मन हे मै अपन डर पहिले लग असना समवा देहुं, कि उनही बैजुंग कर देहुं, अउ मै तोके सगलू बैरी के पीठ दिखाहुं।6 28मै तोर आगू बर्रे के पठोहुं, अउ उन हिब्बी, कनानी अउ हित्ती मनसेन के तोर लिघ्घो लग निकाड देहुं। 29मै उनही एक साल हे तोर आगू लग नेहको निकाडहुं, तोर देस उजाड हुइ जही अउ वनपसु बढ जही, कि तुम उनही सम्भार नेहको पइहा। 30जब तक तै बढके सगलू देस हे अधिकार नेहको कर लेहे, तब तक मै उनके चुटु-चुटु करके तोर आगू लग निकारत रइहों। 31मै तोर राज के इलाका लाल समुन्दर लग भुमध्य7 समुन्दर तक, रतेहली परदेस लग फरात नदिया तक जरूर करहुं, मै देस के रहैबालेन के तोर हाथ हे सउप देहुं, अउ तै उनही अपन आगू लग निकाड देबे। 32तै न तो उनखर लग टीमा बांधबे, अउ न उनखर देउतन लग। 33उन तोर देस हे न रहै पामै, असना झइ होय कि उन मोर बिरुध्द तोर लग पाप करामै, अगर तै उनखर देउतन के सेबा करहे, ता हइ जरूर तोर निता मिरतू के फंदा बन जही।”