निरगमन 22

धन डेरा नुकसान करैके नियम

1“अगर कउनो मनसे कउनो गोरू या गेडरा के चोरायके मार डालथै या बेचथै, ता उके अक्ठी बइला कर बदला पांचठे बइला अउ अक्ठी गेडरा कर बदला चारठे गेडरा देय के होही। 2अगर चोरटा चोरी करत टेम पकडे जाय, अउ ओखर हे असना मार पडै कि ऊ मर जाय, ता ओखर खून कर अरोप झइ लगै।” 3अगर चोरटा चोरी करत रात हे पकडे जाए अउ उके असना मारे जही कि ओखर मिरतू हुइ जाय, ता ओखर हत्या के दोस नेहको लगही। 4पय अगर मारै के टेम बेरा निकड चुकथै, ता ओखर हत्या के दोस लगही। 5जब कउ मनसे दूसर मनसे के खेतवा अउ अंगूर कर बगिया के अपन पसुन लग चराही या ऊ अपन पसुन के खुला छांडही, कि ऊ दूसर के खेतवा के चर जाय, तब ऊ अपन खेतवा अउ अंगूर बगिया के निक्खा उपज लग ओखर घाटा के पूरती करही। 6अगर कउ आगी जलामै, अउ ऊ कांटा हे लग जाय अउ फूलन के ढेर या फसल अउ खेतवा जर जाय, तब आगी लगामै बाले मनसे नुकसान के भरपाइ करही। 7“जब कउनो मनसे अपन परोसी के पइसा अउ दूसर चीज रखै के निता देथै, पय ओखर घर लग चोरी हुइ जथै, तब अगर चोर पकडे जाए, ता दुगना वापिस करही।” 8अगर चोरटा नेहको पकडे जाए ता घर के मालिक भगवान के लिघ्घो आही, जेखर लग सुरता हुइ सकै कि ऊ अपन परोसी के चीज चोरी करे हबै या नेहको। 9चाहे बइला, चाहे गदहा, चाहे गेडरा या छेडी, चाहे कपडा, चाहे कउनो मेर के असना भुलाय हर चीज के बारे हे पाप काखे न लगाय जाए, जेही दुइ जन अपन-अपन कहत होय, ता दुनों के मामला भगवान के लिघ्घो आबै, अउ जेही भगवान दोसी ठहराबै ऊ दूसर के दुइगुना भर दे। 10“जब कउ मनसे अपन परोसी के गदहा बइला अउ गेडरा छेडी या दूसर पसु रखै के निता देथै, अउ ऊ पसु बिगर कउनो के नजर हे पडे मार जाय, या अदमरहा हुइ जाय या हांक लइ जाय।” 11तब दुनो के बीच परभु के किरिया लय जही, जेखर लग सुरता हुइ सकै कि मनसे अपन परोसी के डेरा के चोरी करे हबै, या नेहको, पसु के मालिक किरिया के स्बीकार करही, अउ दूसर मनसे के नुकसान नेहको भरैका पडही। 12अगर ओखर लिघ्घो ले निस्चय गहन रखे हर पसु चोरी हुइ जही ता उके मालिन के नुसकान भरै के पडही। 13अगर गहन रखे हर पसु जंगली पसु के दवारा फाड डाले गय हबै, ता ऊ फाडे हर पसु के परमाड के रूप हे लाही, तब उके नुकसान नेहको चुकामैके पडही। 14अगर कउ मनसे अपन परोसी लग अक्ठी पसु उधार हे लाथै, अउ ओखर मालिक के अनुपस्थिति हे पसु घायल हुइ जाय, या मर जाय, ता ऊ जरूर सगलू नुकसान भरही। 15पय अगर ओखर संग पसु के मालिक हाजिर रथै, ता ऊ नुकसान नेहको भरही, अगर पसु किराया हे लय गय रथै, ता ओखर नुकसान किराय हे हुइ गइस।1

नैतिक अउ धारमिक नियाव

16“जब कउ डउका कउनो कुमारी टोरिया के, जेखर ओली नेहको होय हबै, बहलायके ओखर संग कुकरम करथै, तब जरूर ओखर कीमत दइके ओखर लग काज कर ले। 17पय अगर टोरिया के बाफ ओही अपन टोरिया देय लग मना करथै, ता ऊ मनसे के पइसा देयका पडही, ऊ उके दइजा के पूर धन दे।”2 18“जादू टोना करै बाले डउकी के जिंदा झइ छांडबे।” 19“पसु कर संग गलत काम करै बाले मनसे के जरूर मिरतू सजा दय जही।” 20जउन कउ भगवान के छांडके अउ देउता के निता बलि चढामै बाले मनसे नास करे जही। 21“तै कउनो परदेसी के संग अन्याय झइ करबे, अउ न ओखर हे अंधेर करबे, काखे तुम मिस्र देस के रहइया रथा।” 22तै कउनो बिधवा अउ अनाथ के दुख झइ देबे। 23अगर तै उके पीरा पहुंचाबे, अउ उन मोर दुहाई दइहिन, ता मै जरूर उनखर दुहाई सुनहुं। 24मोर गुस्सा भडकही, अउ मै तुमके तलबार लग मारहूं, तब तुम्हर डउकी बिधवा अउ तुम्हर टोरवा अनाथ हुइ जइहिन। 25अगर तै मोर मनसेन मसे कउनो गरीब मनसे के जउन तोर संग रथै, पइसा उधार देही, ता ओखर निता सूद खोर जसना नेहको बनबे, तै ओखर हे बेयाज नेहको लगाबे। 26अगर तै अपन परोसी के बन्डी कबहुन गहन हे रखे, ता बेरा के बुडै लग उके लउटा देबे। 27काखे ऊ ओखर चादर हबै, ओखर देह के अक्ठिन कपडा हबै, ऊ का ओढके सोही? पय जब ऊ मोर दुहाई देही, तब मै ओखर सुनहुं, काखे मै अनुगरह देय बाले भगवान हबो। 28“तै भगवान के अनादर झइ करबे, अउ न अपन मनसे के कउनो अगुवा के साराप देबे।”3 29तै मोके अपन खेतवा के उपज अउ रस कुन्डन के रस मसे भेंट अरपित करै हे देरी झइ करबे, “तै मोके अपन टोरवा मसे पहिलउठा टोरवा देबे।” 30असना अपन बइला अउ गेडरन के पहिलउठा के संग करबे, ऊ सात रोज तक अपन दाय के संग रही, पय आठमा रोज तै ओही मोके देबे। 31तै मोर निता पवितर बनबे, अउ तै पटउरा हे जंगली पसु दवारा फाडे गय पसु के गोस झइ खाबे, पय उके कुकरा के आगू फटक देहे।