निरगमन 21

हरवाहन लग सही बेउहार

(बेवस्थाबिबरन 15:12-18)

1फेर जउन नियम तोके इस्राएली मनसेन के समझामै के हबै, ऊ हइ हबै, 2जब तै इब्रानी मनसे के हरवाह खरीदहे, तब ऊ छय साल तक हरवाही करही, ऊ सतमा साल बिगैर मूल चुकाय आजाद हुइके जाय सकहीं। 3अगर ऊ अकेल्ले आय हबै, ता अकेल्लेन कढ जाय, अउ अगर डउकी के संग आय होही, ता ओखर संग ओखर डउकी कढ जाय। 4अगर ओखर मालिक उके डउकी दय होही, अउ डउकी ओखर लग टोरवा अउ टोरिया पइदा करे हबै, ता डउकी अउ ओखर लरका मालिक के होही, अउ ऊ अकेल्ले आजाद हुइके जही। 5पय अगर हरवाह मजबूती लग कही, मै अपन मालिक अपन डउकी अउ अपन लरकन लग माया करथों, मै आजाद हुइके नेहको जहुं। 6ता ओखर मालिक उके भगवान के लिघ्घो लाही, ओखर मालिक उके दूरा अउ चउखट के लिघ्घो लायके सूजा लग ओखर कान छेदही, एखर बाद ऊ अपन मालिक के सबरोज हरवाही करही।1 7जब कउ मनसे अपन टोरिया के हरवाहिन के रूप हे बेचही, तब ऊ डउका हरवाह के जसना आजाद हुइके नेहको जाय सकही। 8अगर ऊ अपन मालिक के, जउन उके अपन निता खरीदे हबै, मगन झइ रख सकै, ता मालिक ओखर कीमत लइके उके आजाद कर दे, उके परदेसी के हाथ हे बेचै के हक नेहको होही, हइ ओखर संग धोखा होही। 9पय अगर मालिक अपन टोरवा के निता उके खरीदे हबै, ता ऊ ओखर संग टोरिया के जसना बेउहार करही। 10अगर ऊ दूसर डउकी रखथै, ता हइ हरवाहिन के खाना, बन्डी अउ संगति सुख लग दूर नेहको करी। 11अगर मालिक ओखर निता हइ तीन बातन के बेवस्था नेहको करथै, ता ऊ बिगर कीमत चुकाय कढ जही।

झगडा काम लग सम्बन्धित नियाव

12जउन कउ मनसे असना मारै कि ऊ मर जाय, ता उके जरूर मिरतू के सजा दय जही। 13अगर ऊ घात लगायके मारे नेहको हबै, पय दुरघटना असना हुइ गय रथै, ता मै तुम्हर निता अक्ठी जिघा निहचित करहुं, जिहां ऊ भाग सकही। 14अगर कउ अपन परोसी के छल लग हतिया के चढाई लग घात करै, ता तै उके मार डालै के निता मोर बेदी लग उके घसीट के लइ जाबे। 15जउन कउ दाय या बाफ के मारथै पीटथै, उके जरूर मिरतू कर सजा दय जही। 16जउन कउ कउनो मनसे के चुराथै, अउ उके बेच दइ अउ चोर मनसे ओखर अधिकार हे पाय जही, ता उके निस्चित मिरतू कर सजा दय जही। 17अपन दाय बाफ के सराप देय बाले मनसे के निस्चित मिरतू कर सजा दय जही। 18जब मनसे झगडा करथै अउ अक्ठी मनसे अपन परोसी हे पथरा मारथै, या मुटका मारथै अउ ओखर मिरतू न होय, पय ऊ डेसना हे पडे रहै, 19अगर ऊ फेरै उठके अपन डंडा के सहारे बाहिर रेगै बागै लगी, ता मारै बाले मनसे सजा लग आजाद माने जही, उके केबल जउन नुकसान होय हबै, उके भर दे अउ उके बढिया निक्खा कर दे। 20अगर कउ अपन हरवाह या हरवाहिन के डंडा लग असना मारै, ऊ ओखर मारै लग मर जाय, तब ओही जरूर सजा दय जही। 21पय अगर गुलाम अक-दुइ रोज हे नेहको मरथै, ता मालिक के सजा नेहको दय जही, ओखर धन डेरा कर नुकसान ओखर निता बोहत सजा हबै। 22जब मनसे मार-पीट करै, अउ डउकी लादा हे हबै, उके असना चोट लगै कि ओखर गरभ गिर जाय, पय अउ कुछु नुसकाम झइ होय, तब डउकी के डउका के मांग के जसना मारै बाले मनसे के ओतकै सजा दय जही जेतका पंच निहचित करहिन, ओतकै उके दय होही, 23अगर मार-पीट हे कउनो के मिरतू हुइ जाय ता तोके परान के बदला परान दय होही, 24कउनो मेर के नुसकान होथै, ता आंखी के बदला आंखी, अउ दांत के बदला दांत, हाथ के बदला हाथ गोड के बदला गोड।2 25अउ जरे कर बदला जरै के अउ खत्ता के बदला खत्ता के, अउ मार के बदला मार के सजा होय, 26जब कउ अपन हरवाह या हरवाहिन के आंखी हे असना मारै कि फुट जाय ता ओखर आंखी के बदला उके आजाद करके जाय देय, 27अउ अगर ऊ अपन हरवाह या हरवाहिन के मार के ओखर दांत टोर डारै ता ऊ ओखर दांत के बदला उके आजाद करके जाय देय।

मालिक कर जबाबदारी

28अगर बइला कउ डउका या डउकी के असना सींग मारे कि ऊ मर जाय, तब ऊ बइला जरूर पथरा लग मार डाले जाय, अउ ओखर गोस नेहको खाय जाय, पय बइला कर मालिक निरदोस ठहरै। 29पय अगर बइला के आगू सींग लग मारै के आदत पडे हबै, अउ ओखर मालिक के चेतावनी देय लग ऊ उके नेहको बांधके रखथै, अउ डउकी अउ डउका के बइला मार डारथै, ता पथरा लग मारके ऊ बइला के मार डारे जही, अउ ओखर मालिक के मिरतू दन्ड दय जही। 30अगर उके छंडामै बाले ठहरही, ता परान छंडाय के जउन कुछु ओखर निता ठहराय जाय उके ओतकै देय के पडही। 31चाहे बइला कउ टोरवा चाहे टोरिया के मारे होय तउमा इहै नियम जसना ओखर मालिक के संग बेउहार करे जाय। 32अगर बइला कउ हरवाह या हरवाहिन के सींग मारे होय, ता बइला कर मालिक उके हरवाह के मालिक चांदी कर तीसठे खोटन्ना दे, अउ उके बइला हे पथरा लग मारे जाय। 33कउनो मनसे कउनो गढहा या कुंवा खोदै अउ उके नेहको ढांपथै अउ अगर कउनो मनसे के बइला अउ गदहा आमै अउ ओहमा गिर जाय ता गढहा कर मालिक दोसी हबै। 34गढहा के मालिक जानबर के निता धन देही पय जानबर के निता धन देय के बाद उके ऊ मरे हर जानबर के लेय दय जही। 35जब कउनो मनसे के बइला परोसी के बइला के एतका मारै कि ऊ मर जाय, तब ऊ जिन्दा बइला के बेंचके ओखर कीमत आधा-आधा बांट ले, अउ लोथ के आपस हे बांट लइही। 36अगर हइ परगट होय कि ऊ बइला के पहिलेन लग सींग मारै के आदत पडै रथै, पय ओखर मालिक उके बांध के नेहको रखिस ता जरूर ऊ बइला के बदला बइला दइ दे, पय लहास उहै के होही।