निरगमन 20

दस आदेस

(बेवस्थाबिबरन 5:1-21)

1भगवान हइ सगलू बचन कथै, 2मै परभु तोर भगवान हबो, जउन तोके मिस्र देस लग गुलामी के घर लग बाहिर निकाड लायों। 3तै मोके छांडके अउ कउनो भगवान के झइ मानबे। 4तै अपन निता कउनो मूरती झइ बनाबे अउ न कउनो जीव या चीज के कटपुतला बनाबे, जउन उप्पर बादर हे या तरी भुंइ हे या भुंइ के तरी छो पानी हे हबै। 5तै झुकके उनही दन्डवत झइ करबे, अउ न ओखर सेवा करबे, काखे मै तुम्हर भगवान जलन रखै बाले भगवान हबो, जउन मोर लग घिरना करथै, उनखर अधरम के सजा मै तीसर अउ चउथी पीढी तक उनखर नाती पोता के दय करथों।1 6पय मोर लग माया करै बाले अउ मोर आदेस के मानै बाले मनसेन हे मै हजार पुरखा तक करुना करथों। 7तै अपन परभु भगवान के नाम बेकार झइ लेबे, उके परभु निरदोस नेहको करही।2 8सुस्ताय कर रोज के पवितर मानै के निता सुरता रखबे।3 9तै छय रोज तक मेहनत करबे, अपन सगलू काम करबे। 10पय सतमा रोज तोर परभु भगवान के सुस्ताय कर रोज हबै, इहैनिता तै, तोर टोरवा-टोरिया, हरवाह-हरवाहिन, तोर पसु अउ तोर सहर हे रहै बाले मनसे ऊ रोज कउनो काम न करै।4 11काखे परभु छय रोज हे आकास, भुंइ, समुन्दर अउ उन सगलू के बनाय हबै, जउन उनखर हे हबै, अउ सतमा रोज आराम करिस, पय परभु आराम कर रोज के आसिरवाद दइस, अउ उके पवितर घोसित करिस।5 12“तै अपन बाफ अउ अपन दाय के इज्जत करबे, जेखर लग जउन देस तोर भगवान यहोबा तोके देथै, ओहमा तै बोहत रोज तक रहै पइहे।”6 13“तै खून झइ करबे।” 14“तै बेभिचार झइ करबे।” 15“तै चोरी झइ करबे।” 16तै अपन परोसी के बिरुध्द झूठी गवाही झइ देबे। 17“तै अपन परोसी के घर के लालच झइ करबे, तै अपन परोसी के डउकी ओखर हरवाह हरवाहिन, बइला गदहा अउ ओखर कउनो चीज के लालच झइ करबे।”

मनसेन कर डर

(बेवस्थाबिबरन 5:22-33)

18सगलू मनसे बादर कर गरजन बिजली के चमकना, नरसिंगे के आरो अउ डोंगर लग कुहिरा निकरत देखिन, तब उन डरके कांपै लगिन उन दुरिहां ठाड हुइ गइन। 19उन मूसा लग कथै, तै हमर लग बात कर, हम तोर बात सुनबे, पय भगवान के हमर लग बात झइ करै दे, असना झइ होय कि हम मर जइ।7 20मूसा मनसेन लग कथै, “झइ डरा, काखे भगवान तुमके परखै आय हबै, कि ओखर डर तुम्हर आंखी के लिघ्घो बने रहै अउ तुम पाप झइ करा।” 21मूसा घने बादर के लिघ्घो गइस, जिहां भगवान रथै, पय मनसे दुरिहां ठाड रहै।

बेदिन लग सम्बन्धित नियम

22परभु मूसा लग कथै, तै इस्राएली मनसेन लग हइ गुठेबे, “तुम खुदय देखे हबा, कि मै स्वरग लग तुम्हर लग बात करे हव। 23तुम चांदी के देउता न बनइहा, कि तुम मोर संगो उनखर भजन करा, अउ न अपन निता देउतन के बनइहा। 24तै माटी के अक्ठी बेदी बनाबे अउ ओखर हे मोके अपन आगी बलि अउ सहभागिता बलि अपन गेडरा अउ बोकडा के बलि चढाबे, सगलू जिघा हे जिहां मै अपन नाम सुरता के निता परतिस्ठित करथों, उहां मै आयके तोके आसीस देहूं। 25अगर तुम मोर निता पथरन कर वेदी बनाबा, ता उके तरासे हर पथरन लग झइ बनाबे काखे जब तुम पथरन हे छेनी चलाथा, ता उनही मोर निस्तार के निता असुध्द बनाय देथा। 26मोर निता असना कउनो बेदी झइ बनाबे जेखर हे चढै के निता रसइनी होय, अगर तुम असना करिहा, ता रसइनी हे चढत टेम तुम नंगडे हुइ जइहा।”