निरगमन 18

मूसा अपन ससुर लग मुलाकात

1जब मूसा के ससुर मिद्दान देस के याजक इतरो उन सगलू कामन के बारे हे सुनिस जउन भगवान मूसा अउ अपन खास मनसे इस्राएली के निता करे रथै, ऊ सुनिस कि परभु इस्राएलिन के मिस्र देस लग निकाड लाय हबै। 2तब मूसा के ससुर इतरो मूसा के डउकी सिप्पोरा के जेही मूसा आगुन ओखर बाफ के घर छो पठोय दय रथै। 3अउ ओखर दुइठे टोरवा के लइके उनखर मसे अक्ठी टोरवा के नाम गेरसोम धरथै, काखे मूसा कहे रथै, मै दूसर देस के रहैबाले हबो।1 4अउ दूसर के नाम एलीएजेर2 रथै, काखे ऊ कथै, मोर सियानन के भगवान मोर मदत करै बाले हबै, ऊ मोके फिरोन के तलबार लग छंडाय हबै। 5जिहां मूसा भगवान के पवितर डोंगर हे तम्बू डाले रथै, उहां रतेहली परदेस हे ओखर ससुर इतरो अपन संग मूसा के डउकी अउ उनखर टोरवा के लइके आइस। 6कउनो मूसा लग कथै, देख तोर ससुर इतरो तोर डउकी अउ दुनो के लइके तोर लिघ्घो आथै। 7मूसा अपन ससुर लग मुलाखात करै के तम्बू लग बाहिर निकडै उन झुकके अपन ससुर के सोगत करिस ओखर चुम्मा लइस उन अक दूसर के हाल चाल पूंछके तम्बू कर भित्तर आइन। 8मूसा अपन ससुर के उन कामन के किस्सा सुनाइस, जउन परभु इस्राएली मनसेन के लगेतार फिरोन अउ मिस्र के रहैबालेन के संग करे रथै, उन समस्या के जउन उनखर गली हे आय रथै, अउ कसना परभु उनही छंडाइस। 9इतरो खुसी परगट करिस कि परभु इस्राएल के संग भलाई करिस अउ मिस्र के रहैबाले के हाथ लग उनही छंडाय हबै, 10इतरो कथै, परभु धन्य हबै, जउन तुमके मिस्र के रहैबालेन के हाथ लग फिरोन के हाथ लग छंडाय हबै। 11अब मोके सुरता आइस कि परभु सगलू देउतन लग बडा हबै, काखे जब मिस्र के रहैबाले इस्राएलिन के संग घमंडी मेर बेउहार करथै, तब ऊ उनही मिस्र के रहैबालेन के अधीन लग छंडाय रथै। 12तब मूसा के ससुर इतरो भगवान के होमबलि अउ मेलबलि चढाथै, हारून अउ इस्राएल के सगलू सियान मूसा के ससुर के संग भगवान के आगू रोटी खाय आथै।

नियाव करै बाले के चुनाव

(बेवस्थाबिबरन 1:9-18)

13दूसर रोज सुबेन्नेन मूसा मनसेन कर नियाव करै के बइठे, मनसे सुबेन्नेन ले सांझ तक उनके घेरके ठाड रथै। 14जब मूसा के ससुर उनही मनसेन के नियाव करत देखथै, तब उनखर लग पूंछथै मनसेन कर निता तुम हइ का करथा? का तुम अकेल्ले बइठथा? काखे मनसे सुबेन्नेन ले सांझ तक तुम्हर अगल बगल ठाड रथै। 15मूसा अपन ससुर लग कथै, मनसे मोर लिघ्घो भगवान कर लिघ्घो सलाह लेय के निता आथै। 16जब उनखर हे झगडा सुरु होथै, तब उन मोर लिघ्घो आथै, मै लडाई झगडा के बीच नियाव करथों, मै उनही भगवान के बिधि अउ नियम गुठेथों। 17मूसा के ससुर उनखर लग कथै, जउन मेर तुम काम करथा, ऊ निक्खा नेहको हबै। 18तै अउ तुम्हर संग के हइ मनसे थक जइहिन, काखे हइ काम तुम्हर निता बोहत मुस्किल हबै, तै अकेल्ले इके नेहको कर सकथा। 19अब तुम मोर बात सुना, मै तुमके सलाह देथों, भगवान तुम्हर संग होय, तुम भगवान के आगू मनसेन के आगू करिहा, अउ उनखर मुकदमा भगवान कर लिघ्घो लानबे। 20तुम उनखर हे भगवान कर बिधि अउ नियम उजागर करबे, तुम उनही रास्ता बताबे, जेखर हे उनही चलै चाही, उहै काम सिखाबे जउन उनही करै चाही। 21तुम सगलू इस्राएली मनसे हे काबिल, भगवान के भक्त सही निस्ठा अउ घूस ले घिरना करैबाले मनसे चुना, असना मनसेन के हजार-हजार, सव-सव, पचास-पचास अउ दस-दस के समूह हे मुखिया चुना। 22उन सगलू टेम मनसेन के नियाव करै, सगलू बडा मामला तुम्हर लिघ्घो लाय जाय, पय सगलू नान-नान नियाव उन खुदय करै, इहैमेर उन तुम्हर संग देख रेख सम्भारिन, अउ तुम्हर बोझ हलका होही। 23अगर तुम असना करिहा, अउ अगर भगवान असना आदेस देही, ता तुम बलवान बने रह सकिहा, अउ मनसे अपन-अपन रहै बाले जिघा हे सान्ति लग जही। 24मूसा अपन ससुर के बात सुनिस, जउन इतरो कथै, उन उहै करथै। 25मूसा सगलू इस्राएली मनसेन मसे काबिल मनसेन के चुनिस, अउ उनही मनसेन के मुखिया बनाइस, उनही हजार-हजार, सव-सव, पचास-पचास अउ दस-दस के समूह हे मुखिया नियुक्त करिस। 26उन सगलू टेम मनसेन कर नियाव करथै, उन कठिन मामला मूसा के लिघ्घो लातिन, पय नान मामला के नियाव खुदय करथै। 27मूसा अपन ससुर के बिदा करिस, इतरो अपन देस छो कढ गइस।