निरगमन 17

पटपड लग पानी निकरथै

1परभु के आदेस के जसना सगलू इस्राएली समूह सीन नाम के रतेहली परदेस लग निकरके अलग-अलग जिघा हे तम्बू डालके आगू बढिस, उन रपीदीम नाम जिघा हे तम्बू डालिन, पय उहां मनसेन के निता पीय के पानी नेहको मिलिस। 2पय उन मूसा लग झगडा करै लगथै, उन कथै हमके पानी दे कि हम पी, मूसा उनखर लग कथै, काखे तुम मोर लग झगडा करथा? अउ यहोबा कर परिक्छा काखे करथा? 3पय मनसे उहां पानी के निता पियासा रथै, उन मूसा के बिरुध्द बक-बक करै लगथै, उन कथै, तै हमके हमर लरका अउ पसुन के पियासा लग मार डारै के निता मिस्र देस लग काखे लइ आय?1 4पय मूसा परभु के दुहाइ देइस, मै इन मनसेन के संग काहिन करो? इन सगलू चिल्लाथै अउ मोके पथरा लग मार डारै के तइयार हबै। 5परभु मूसा लग कथै, अपन संग इस्राएलिन के कुछ सियानन के लइके मनसेन के आगू-आगू जा, तै अपन हाथ हे उस डन्डा के लइके जाबे जेकर लग तै नील नदिया हे मारे रथै। 6देख उहां मै तोर आगू होरेब डोंगर के पटपड हे ठाड रइहो, तै पटपड हे मारबे, तब ओखर लग पानी निकरी कि मनसे उके पी सकै, मूसा इस्राएलिन के सियानन के आंखी के आगू असना करिस। 7मूसा ऊ जिघा कर नाम मस्सा मतलब परखना अउ मरीबा मतलब झगडा रखिस, काखे इस्राएली उहां मूसा लग झगडा करिस अउ परभु के परिक्छा करथै, उन कथै, “का हमर बीच परभु हबै या नेहको?”

अमालेकिन लग लडाई

8तब अमालेकी के मनसे आइन, उन रपीदीम हे इस्राएलिन लग झगडा करिन। 9मूसा यहोसू लग कथै, हमर निता इस्राएलिन मसे डउकन के चुन अउ जा अमालेक राज लग युध्द कर, कल मै भगवान के डन्डा अपन हाथ हे लइके डोंगर के इटिल्ली हे ठाड रइहों। 10जसना मूसा यहोसू लग कथै, ओसनेन ऊ करथै, ऊ अमालेक राज लग युध्द करिस, मूसा हारून अउ हूर डोंगर के इटिल्ली हे गइन। 11जब-जब मूसा अपन हाथ उप्पर उठाथै, तब-तब इस्राएली जीतथै, पय जब ऊ अपन हाथ तरी छो कर लेथै, तब अमालेक राज जीत जथै। 12मूसा के हाथ थक जथै, तब हारून अउ हूर अक्ठी पथरा लइस अउ ओही तरी धरिस, मूसा ओहमा बइठ गइस हारून अउ हूर उनखर हाथ पकरे रथै, अक्ठी ओखर टेटरा पल्ला अउ दूसर दहिना पल्ला, उनखर हाथ बेरा बुडै तक उठे रथै। 13यहोसू अपन तलबार के धार ले अमालेक के हराय दइस। 14यहोबा मूसा लग कथै, हइ बात सुरता के निता किताब हे लिख अउ उके यहोसू के कान हे डाल कि परभु आकास के तरी लग अमालेक के सुरता कर निसानी पूर मिटाय देही।2 15तब मूसा अक्ठी बेदी बनायके ऊ ओखर हइ नाम यहोबा निस्सी3 रखिस। 16अउ कथै, “यहोबा कर झन्डा पकरे रहा, पीढी लग पीढी परभु के निता अमालेक लग हमर युध्द होत रही।”