आमोस 8

फडुहा लग भरे टोपरी कर सपना

1भगवान यहोबा मोके सपना देखाइस, कि धूपकाल के फडुहा1 लग भरे हर अक्ठी टोपरा हबै। 2ऊ कथै, “हे आमोस, तोके काहिन दिखथै?” मै कथों, “धूपकाल के फडुहा लग भरे अक्ठी टोपरी।” तब यहोबा मोर लग कथै, “मोर परजा इस्राएल के आखरी टेम आय गय हबै, अब मै ओही नेहको छंडिहों।” 3भगवान यहोबा कर बचन हबै, “ऊ रोज राज-मन्दिर के गाना दुख हे बदल जही, अउ लहास कर बडा ढेर लगही, अउ सगलू जिघा हे उन चुप चाप फटक दय जइहीं।”

इस्राएल कर बिनास

4हइ सुना, तुम जउन गरीबन के लीलै अउ देस के दीन मनसेन के नस्ट करै चाहथा, 5जउन कथा, “नबा जोनइहा कब गुजरी कि हम दाना बेच सकि? सुस्ताय कर रोज कब बीतही, कि हम दाना के कोठला खोलके पइला के नान अउ सेकेल के भारी कर दे, अउ धोखा लग तखरी रख के कांटा मारे,2 6कि हम गरीबन के पइसा दइके, अउ गरीबन के अक्ठी जोडी बूट दइके खरीद लइ, अउ बेकार दाना बेची?” 7यहोबा, जेखर उप्पर याकूब के घमंड करै के जरूरी हबै, उहै अपन किरिया खाय के कथै, “मै तुम्हर कउनो काम के कब-हुन नेहको बिसरिहों। 8का हइ कारन भुंइ नेहको कांपही? का उनखर उप्पर सगलू रहैबाले दुख नेहको करइहे? हइ देस के सगलू के सगलू मिस्र देस के नील नदिया के जसना होही, जउन बढथै, फेर लहर मारथै अउ घट जथै।”3 9भगवान यहोबा कर हइ बचन हबै, “ऊ टेम मै बेरा के दुपहरी के टेम सांझ करिहों, अउ हइ देस के दिन दुपहरी अंधियार कर दइहों।4 10मै तुम्हर तेउहार के खुसी के दुरिहां करके दुख कराहुं, अउ तुम्हर सगलू गीतन के दुरिहां करके दुख के गाना गवाहुं, मै तुम सब के कनिहा हे टाट कर कपडा पहिरै के परी, अउ सगलू के मूंड के मुंड-वइहों, अउ असना दुख करिहों, जसना अक-लउता टोरवा के निता होथै, अउ ओखर आखरी कठिन दुख के रोज के जसना होही।” 11भगवान यहोबा कर हइ बचन हबै, “देखा, असना रोज आथै, जब मै हइ देस हे अकाल पठोहूं, ऊ रोज हे दाना कर भूख अउ न पानी कर पियास होही, पय यहोबा कर बचन के सुनै के भूख पियास होही।” 12मनसे यहोबा कर बचन के खोज हे समुंदर लग समुंदर तक अउ उत्तर लग पूरब दिसा तक मारे-मारे भटकहीं, पय उके नेहको पइहीं। 13“ऊ टेम सुन्दर कुंवारिन अउ सग्यान डउका दुनो पियास के मारे अध-मरहा हुइहिन। 14जउन मनसे सामरिया राज के पाप-मूल देउता के किरिया खथै, अउ जउन कथै, दान के देउता के जीवन के किरिया, अउ बेर-सेबा के देउता कर किरिया, उन सगलू गिर पडहीं, अउ फेर नेहको उठही।”