आमोस 7

चिड्डन कर अक्ठी सपना

1भगवान यहोबा मोके हइ दरसन दिखाइस, अउ मै का देखथो कि ओखर पाछु चारा के उगै के सुरुवात हे चिड्डा के पइदा करिस, अउ ऊ राजा के कटनी के बाद पहिले चारा रथै। 2जब चिड्डा चारा खाय चुकिस, तब मै कहों, “हे भगवान यहोबा, छमा कर, नहिता याकूब कसके स्थिर रह सकही? ऊ केतका कमजोर हबै।” 3एखर बारे हे यहोबा मन बदलिस अउ उके कथै, “असना बात अब नेहको होही।”

आगी कर सपना

4भगवान यहोबा मोके हइ सपना दिखाइस, अउ का देखथो कि भगवान यहोबा आगी के दवारा मुकद्दमा लडै के पुकारिस, अउ ऊ आगी लग बडे सागर झुराय गइस, अउ देसो नास होय लगे रथै। 5तब मै कथो, “हे भगवान यहोबा रुक जा, नहिता याकूब कइसन ठाड रही सकही? ऊ कसना कमजोर हबै।” 6एखर बारे हे यहोबा मन बदलिस अउ भगवान यहोबा कथै, “असना बात फेर नेहको होही।”

साहुल कर सपना

7ऊ मोके हइ सपना दिखाइस मै देखों कि परभु साहुल लगाय के बनाय हर कउनो भीठी हे ठाढ हबै, अउ ओखर हाथ हे साहुल हबै। 8यहोबा मोर लग कथै, “हे आमोस, तोके काहिन दिखथै?” मै कथों, “अक्ठी साहुल।” तब भगवान कथै, “देख, मै अपन परजा इस्राएल के बीच हे साहुल लगाहूं, अब मै उनही बिना सजा दय बिगर नेहको छंडिहों। 9इसहाक के बेदी उजड जही, अउ इस्राएल के पवितर जिघा सुन्ना हुइ जही, अउ मै यारो-बाम के घराना हे तलबार खींचे हर चढाई करिहों।”

आमोस अउ अमस्याह

10तब बेतेल के पुजारी अमस्याह इस्राएल के राजा यारोबाम के लिघ्घो संदेस पठोथै, “आमोस इस्राएल के घराने के बीच हे तोर लग राज-दोरह के साजिस करे हबै, ओखर सगलू बचनन के देस नेहको सहि सकथै। 11काखे आमोस हइ कथै, यारोबाम तलबार लग मारे जही, अउ इस्राएल अपन भुंइ लग जरूर गुलामी हे जही।” 12तब अमस्याह आमोस लग कथै, “हे सपना देखामै बाले, इहां लग निकरके यहूदा देस हे कढ जा, अउ उहै रोटी खाय के, अउ उहै आगू कर बात गुठे। 13पय बेतेल हे फेर कबहुन आगू कर बात झइ करबे, काखे हइ राजा के पवितर जिघा अउ राज-सहर1 हबै।” 14आमोस जबाब दइके अमस्याह लग कथै, “मै न तो अक्किल बाले रथों, अउ न अक्किल बाले कर टोरवा, मै तो बरेदी अउ ऊमर कर रूख के छांटै-बाले रथो,2 15अउ यहोबा मोके गेडरा छेडी के पाछू-पाछू फिरे लग बुलाय के कथै, जा, मोर परजा इस्राएल लग आगू कर बात गुठे दे। 16इहैनिता अब तै यहोबा कर बचन सुन, तै कथस, इस्राएल के बिरोध आगू कर बात झइ कर, अउ इसहाक के घराना के बिरोध बेर-बेर बचन झइ सुना। 17हइ कारन यहोबा हइ कथै, तोर डउकी सहर हे बेसिया हुइ जही, अउ तोर टोरवा-टोरिया तलबार लग मारे जइहे, अउ तोर जमीन डोरा डालके बांट लय जही, अउ तै खुदय दूसर के देस हे मरही, अउ इस्राएल अपन भुंइ लग जरूर गुलामी हे जही।”